آوار جتگیں بلوچانی کھولاں شد ھرجاپی برجاہ اِنت ' 250 شھید ،14000انگت ریاستی شکنجہ جاھان اِنت

شال : پاکستانی سرکار آوار جتگیں بلوچ ودود رئیسانی ، جلیل ریکی ، سنگت ثنا ، ڈاکٹر دین محمد ، ذاکر مجید ، علی اصغربنگزئی ، غفور بلوچ ، مشتاق ردوینی ، سمیع مینگل ، حافظ سعیدالرحمن بلوچ ءِ شد ھرجاپی گداناں 439 روچ سرجم بوتگ ۔ وھدے کہ ماسٹر غلام قادر ، مزارخان ، الطاف بگٹی ءِ کھول ءَ 91روچ ، رحیم بلوچ ، گھرام بلوچ ، اقبال بلوچ ، کریم جان ، غلام اللہ بلوچ ءِ کھول ءَ 36روچ ماں شد ھرجاپی گوازینتگ ۔ پاکی سرکار آوار جتگیں بلوچاں ءَ گوں ھمدردی کنگ ءَ چَہ بی ایس نال ھنکین ءِ نیمگ ءَ لھتیں باسکاں شد حرجاپی گندان ءَ گوں آوارجتگیں بلوچانی کھولاں گندک کرتگ ءُ گوشتگ کہ بلوچ راج ءَ دل مزن کنگی اِنت بلوچ  منزل ءِ نزیک ءَ سر بوتگ ۔ پاکستان ءِ چیریں ادارہ نوں سر گنوک بوتگ اَنت ءُ بلوچ ءِ ورناھاں چست کنگ ءُ شھید کنگ ءَ اَنت ۔ وائس فار مسنگ پرسنز ءِ وائس چیر مین قدیر بلوچ ءَ اے درگت ءَ گپ جنان ءَ گوشتک کہ سئے سال اِنت بیگواھیں بلوچانی کیس بلوچستان ھائی کورٹ ءَ پہ گوشدارگ ءَ مھتل اِنت بلے دنیگت چیف جسٹس ھائی کورٹ قاضی فائز عیسی  یک ھم بلوچے ءَ درگیجگ ءَ سوبمند نہ بوتگ ءُ پاکستان ءِ سپریم کورٹ ءَ پہ 250 آوار جتگیں بلوچ ورناھانی شھید کنگ ءَ پد  ھم سوموٹو ایکشن  نہ زرتگ   اے سوال ءَ بیگواہ بوتگیں بلوچانی کھول چَہ چیف جسٹس ءَ جست کن اَنت کہ چار دہ ھزار بیگواہ ھم ھست اَنت ۔