طرابلس: بنی ولید ءَ یاگیانی لشکر کرنل قذافی ءِ منوگرانی نیمگ ءَ ترند تریں جنگ ءِ دیمپانی ءَ کنگ انت۔سداں مردمانی مرگ ءِ گُمان۔۔۔

طرابلس: لیبیا ءِ عبوری سرکار ءِ گوشگ ءِ ردا یاگیانی لشکر کرنل قذافی ءِ مُھکم تریں بُنجاھی شھر بنی ولید ءَ پترتگ۔۔یاگیاں بنی ولید ءِ شھر چاریں نیمگاں اَنگر کُتگ۔۔بنی ولید ءَ یاگیانی ءُ کرنل قذافی منوگرانی دو دیمی جنگ برجاہ انت۔ ءُ یاگیانی لشکر گوستگیں وھد ءِ جنگ ءُ بجنگانی نسبت ءَ بنی ولید ءَ عھد ءِ ڈکٹیٹر قذافی ءِ منوگرانی نیمگ ءَ ترند تریں جنگ ءِ دیمپانی ءَ کنگ ءَ انت ءُ دوئیں نیمگاں ٹوھیں ٹوھیں سلاہ ءُ ٹوپ کارمرز بئیگ انت۔۔ادا طرابلس ءَ ڈکٹیٹر قذافی ءِ گُڈی نشان کلات ”العزیزیہ” بلڈوزر کنگ ءُ پروشگ بیتگ۔۔وھدیکہ عبوری سرکار ءَ قذافی ءِ بچ متصم قذافی ءِ دزگیر بئیگ ءِ راستی من اِتگ۔۔ فرانسی رسانکی کارگس ءِ ردا یاگیاں بنی ولید شھر چاریں نیمگاں انگر کُتگ ءُ ارش بندات کُتگ۔عبوری سرکار ءِ کمانڈر جمال سالم ءِ گوشگ ءِ ردا یاگیاں جنوب روکپتی نیمگ ءَ اُرش کُتگ ءُ بنی ولید شھر ءِ نزیک ءَ سر بیتگ انت بلے یاگی قذافی ءِ منوگرانی نیمگ ءَ چہ ترندیں اُرشانی دیمپانی ءَ کنگ ءَ اَنت۔۔برطانوی رسانکدر ءِ ردا سرت شھر ءَ یاگی قذافی لشکر ءِ ترندیں تیلانکانی دیمپانی ءَ کنگ ءَ انت۔۔اے درگت ءَ عبوری سرکار ءَ نوکیں توجیل سازی کنگ لوٹیت۔ بنی ولید ءَ ھم بازیں جنگ ءُ بجنگاں ابئید یاگی دنیگہ  قزافی لشکر ءِ پروش دیگ ءَ بے سوب بیتگاں۔۔ھندی ھالانی ردا یاگیانی لشکر بنی ولید ءُ سرت شھر ءِ کش ءُ گوراں لُٹ ءُ پُل کنگ ءَ اَنت۔۔مال ءُ مڈیاں مزنیں مزنیں ٹرکان لڈگ ءُ دگہ ھنداں برگ ءَ انت۔۔بلے لیبیا عبوری سرکار ءَ چوشیں گپانی ھچ وڑیں راستی نہ من اِتگ۔۔۔