ایرانی زورگریں لشکرءِ تیر گواری چہ شہید بوتگینے پجار عبدالستار ءِ نام ءَ چہ بوتگ ، ھو بلوچ ورناہانی پاھو دائیگ ہم برجاہ انت
روکپتی بلوچستانءِ شہر نوبندیان ءَ ایرانی زورگریں لشکرءِ تیر گواریءَ چہ یک بلوچ ورناءِ شہید بوتگ

گیشتر بہ وان…

 چھبار : بازیں سرکاری ءُ مردمی شرکت ءُ ادارھانی کاگد ءُ کراچانی تہ ءَ داتگیں  ڈس ءُ نشان ءِ تہ ءَ '' بلوچستان '' ءِ نام ءِ دُور کنگ ءُ  تیوک  '' سیستان '' نوشتہ کنگ ءِ سر ءَ سرجمیں روکپتی بلوچستان ءِ وانندہ ءُ سرپدیں مردمانی تہ ءَ بے تاھیری تالان اِنت ۔

ھالانی رِد ءَ چھبار ءَ '' قرض الحسنہ مِھر '' نامیں بینکے ءَ وتی ڈس ءُ نشان ءِ تہ ءَ بلوچستان ءِ نام دور کُرتگ ءُ تیوک '' سیستان ۔ چھبار '' نوشتہ کُرتگ ۔ اے درگت ءَ لھتے وانندھیں مردماں گوں بینک ءِ منیجر ءَ گپ جتگ ءُ جست کُرتگ کہ '' بینک ءِ رسیدانی سر ءَ بلوچستان ءِ نام ءِ دور کنگ ءِ سبب چی اِنت ؟ ''

آئی ءَ پسو داتگ کہ '' من اے درگت ءَ وت بگیری کُرتگ ءُ من ءَ ھمے پسو رستگ کہ سرجمیں نام رسیدانی سر ءَ جاہ نہ کنت  ۔ ''

مردم بینک ءِ منیجر ءِ چر اے گپاں ایمن نہ بوتگ اَنت ءُ اے یک لوچیں دلیلے من اِتگ ءُ گْوشتگ : '' اگاں گپ انچوش اِنت گڑا پرچا بلوچستان نوشتہ نہ کُرتگ یا '' اُستان ءِ مخفف س وب '' بزاں سیستان ءُ بلوچستان ۔  اگاں رسیدانی تہ ءَ '' چھارمحال و بختیاری '' ءَ جاہ بیت گڑا '' سیستان و بلوچستان '' ءَ پرچا نہ بیت ؟ ''

بینک ءِ منیجر ءَ چَہ اے ھبراں پد مردم سَدکی داتگ اَنت کہ '' آ اے درگت ءَ رندگیری کنت ءُ زاھدان ءَ نوشتہ کنت داں رسید شر کنگ بہ بنت ۔''

بلئے تیوک ءَ ھمے یکیں بینک ءَ اے کار نہ کُرتگ بلکیں بلوچستان ءِ جتا جتائیں دمگاں جتائیں ادارھاں ھمے پیم ءَ بلوچستان ءِ نام چَہ وتی کاگدانی سر ءَ دور کُرتگ ۔

ھمے پیم '' نیاگارا '' نامیں دکاندارے ءَ ھم وتی ایڈریسی کارڈانی سر ءَ بلوچستان ءِ نام دور کُرتگ ءُ ھم لھتے اداراھانی وبتاکانی تہ ءَ بلوچستان ءِ نام دور کنگ بوتگ چوش ھمے گمان بوگ ءَ اِنت کہ اے پندل ءِ بن گوں ھما پندل ءَ یک اِنت کہ'' بلوچستان  سئے بھر کنگ ءُ آئی ءِ نام گار کنگ بہ بیت '' ۔

ھمے رنگ ءَ '' بیمہ ھای تامین اجتماعی شھرستان ایرانشھر '' ءِ ایڈریس ءِ تہ ءَ ھم بلوچستان ءِ نام دور کنگ بوتگ ۔      

مردماں گوں ھمے کلیں ادراھانی مستراں اھوال کُرت ءُ اے کارپد ءِ سر ءَ تّْرندیں وڑے ءَ وتی زھرشانی دْرشانتگ ءُ گْوشتگ کہ بلوچستان ءِ نام ءِ گار کنگ ھچ رنگ ءَ منگ نہ بیت ءُ چَہ ایشی ءَ چم بندگ نہ بنت ءُ بلوچ ھچ پیم ءَ بلوچستان ءِ نام ءِ دور کنگ ءَ نہ من اَنت ءُ اے پیمیں ھرچ کارے  کہ بوگ ءَ اِنت بلوچ آھاں وتی  نشان ءِ گار کنگ ءِ پندل سرپد بنت ءُ یک انچیں پندلے کہ چَہ ایشی ءَ بلوچانی تہ ءَ مزنیں بے تاھیری ودی بوت کنت ءُ اگاں چوش بہ بیت اے پہ ملک ءِ ایمنی ءُ تپاکی ءَ ھم جوانیں مستاگے نہ اِنت ۔

اے درگت ءَ مردمان وت ماں وت اھوالگری ءُ ھمگرنچی یے جوڑ کُرتگ ءُ چَہ روکپتی بلوچستان ءِ کلیں بلوچاں دزبندی کُرتگ کہ آ پہ اے کار ءِ ایرجنگ ءَ ھم پت بہ بنت ۔آھاں اے درگت ءَ ھمے ادارھانی نمبر تالان کُرتگ ءُ مردماں کڈن کنگ ءَ اَنت کہ آ ھم گوں ادراھانی مستراں گپ بہ جن اَنت ءُ بلوچستان ءِ نام ءِ دور کنگ ءِ سر ءَ وتی زھر ءَ دْرشان بہ کن اَنت ۔


05453331604
شمارہ بانک قرض الحسنہ مھر چابھار
-------------------------------------
03113387292
03113391715
شمارہ شرکت نیاگارا

مردماں چَہ چھبار ءُ دشتیاری ءَ گچین بوتگیں ایرانی مجلس ءِ باسک یعقوب جدگال ءِ اے درگت ءَ سُستی ءُ دلگوش نہ دیگ ءِ کرد ھم ایر جتگ ءُ گْوشتگ کہ یعقوب بلوچانی جھگیر اِنت آ باید وتی اُگدہ ءُ ذمہ واریاں بہ زانت ءُ اے جیڑہ ءَ سنگینے جیڑھے سرپد بہ بیت ءُ چَہ ایشی ءَ پیش کہ جیڑہ مستر بہ بیت پہ ایشی ءِ شر کنگ ءَ وتی کرد ءَ پیلو بہ کنت ۔ آھاں یعقوب جدگال ءِ گوشی ءِ نمبر ھم تالان کُرتگ ءُ چَہ مردماں لوٹ اِتگ کہ پہ یعقوب ءِ واب ءَ پاد کنگ ءَ آئی ءَ زنگ بہ جن اَنت بلکیں آ دلگوش بہ دنت ۔

آھاں پہ یعقوب اے کلو جوڑ کُرتگ ؛

'' سلام واجہ یعقوب جدگال ، دولتی ءُ شخصی ادارھانی تہ ءَ بلوچستان ءِ نام ءِ دور کنگ ءِ جیڑہ ءِ سر ءَ دلگوش بہ دئے ۔''

ءُ چَہ مردماں لوٹگ اِتگ کہ اے کلو ءَ واجہ یعقوب ءِ جھل ءِ داتگیں نمبر ءِ سر ءَ دیم بہ دئے اَنت ۔

09153456917

گیشتر بہ وان…

بریس [ گچینی اھوالکار] : بلوچی زبان ءِ نامی ئیں شاعر ابراھیم تاج چَہ کوڑھیں دنیا ءَ لڈ اِتگ ۔ ھدا مرزی ءَ پشت پدانی تہ ءَ یک جنوزامے پشت داتگ ۔ ھدامرزی ءَ سئے سور کرتگ اَت بلے بے رندی چَہ جھان ءَ لڈ اِت ۔

ھدامرزی 9 ستمبر ءَ یک بھمانگیں وڑے ءَ بیران بوت ۔ 9 ستمبر 2012 ءَ نیمروچ ءِ وھدءَ  ھال شنگ اِت کہ ھدامرزی چَہ جیمڑی ءَ کاھک ءِ سر ءَ  بریس ءَ واتر بوگ ءِ میان ءَ توجانی پاسگاہ نامیں جاھے ءَ بڈ اِتگ ءُ بیران بوتگ ۔ مئے اھوالکار ءَ رستگیں ھالانی رِد ءَ پوسٹ مارٹم ءِ رپورٹ گوں اے ھال ءَ ھمدپ نہ اِنت ءُ ڈاکٹر ءَ گمان دْرشان کرتگ کہ ھدامرزی چَہ آ وھد ءَ پیش بیران بوتگ کہ مردمانی گْوشگ اِنت ۔

ابراھیم تاج کساس مروچیگ ءَ پنجاہ سال پیش 1962 ءَ روکپتی بلوچستان ءِ تیابدپی ھند بریس ءِ ھمگْور ءَ رودیگ نامیں کْوچگی ءَ ودی بوتگ ھدامرزی ءَ رسمی وانگ داں مڈل ءَ دربرتگ ۔ ھدا مرزی چابھار ءِ ھند ءُ دمگاں روکپتی بلوچستان ءِ چَہ ھما شاعراں یکے شمار بیت کہ اد ءَ بلوچی زبان ءِ رُشت ءُ ردوم ءِ تہ ءَ مزنیں کردے پیلو کرتگ اِش ۔

ھدامرزی بریس لبزانکی گل ءِ پاگواجھی ءِ اُگدہ  ءِ سر ءَ ھم بوتگ ءُ پہ بلوچی زبان ءِ دیم ءَ برگ ءَ شپ روچ یک ئِے کرتگ ۔ ھما زمانگ ءَ کہ چابھارءِ دمگ ءَ بلوچی زبان ءِ وانگ ءُ گوشدارگ ءِ ھب نوکباھندانی تہ ءَ نزور اَت آروسی مراگشانی تہ ءَ لچہ گْوشی دیوان ءِ بھر ھوار کرتگ ءُ نوکباھند ھمے پیم بلوچی زبان ءِ نیمگ ءَ سکین داتگ اَنت ۔ ھدا مرزی ءَ وتی شئرانی دپتر '' گم ءِ اُوتاک '' ءِ نام ءَ سرجم کرتگ ءُ  پہ چاپ ءَ مھتل اَت کہ زند ءَ موہ نہ
دات ۔

ھدامرزی بریس ءِ سیمی مزن نامیں شاعراِنت کہ نیم سند ءِ تہ ءَ اناگتیں مرگ ءَ دوچار کپتگ ۔ چد ءُ پیش صدیق سلیمی ءُ میم مولی ھم ماں ورناھی ءَ چَہ ما سستگ ءُ بریس ءِ ھاکانی میار اَنت ۔ ابراھیم تاج ھم بریس ءِ ھمے کبرانی میان ءَ ھاکانی میار کنگ بوتگ ۔

 

گیشتر بہ وان…

گوادر :  چَہ روردرتکی ءُ روکپتی بلوچستان ءِ سیمسری ڈک دوسد ءُ پنجاہ ءَ چَہ جنین آدمے ءِ اُرداں پستولے درکپگ ءَ پد ایرانی مرزبان ءَ دزگیر کرتگ ۔ مارا رستگیں ھالانی رِد ءَ پستول  ءُ ھشت دانگ تیر یک موبائلے ڈبھے ءِ تہ ءَ بوتگ اَنت کہ  پٹ ءُ پولے میان ءَ ایرانی مرز بان ءَ دست کپتگ اَنت ۔ پاکستانی کسٹم ءِ کارمنداں اے درگت ءَ گوں مئے اھوالکار ءَ گْوشتگ کہ آھاں اے رِد ءَ بازیں مالومداری نیست اے کار ایرانی سمیسر ءَ بوتگ ءُ پہ ھال دزگیر بوتگیں جنین آدم ایرانی شھروند اِنت ۔ 

چم گندوکاں اے رِد ءَ گوں ما ھال کنان گْوشتگ کہ چَہ جنین آدم ءَ پستول ءِ دست کپگ ءَ پد ایرانی مرزبان ءِ سپاھیگاں جنین ءِ گْور جیگ گیپتگ ءُ ژابلینتگ ءُ موداں گیپتگ ءُ گْران کرتگ ءُ پاسگاہ ءِ تہ ءَ برتگ ۔ اِے رِد ءَ پاکستانی کسٹم ءِ کارمند ءَ وتی نام درانہ کنگ ءِ ڈک ءَ گوں اھوالکار ءَ گْوشتگ کہ '' ایران ءُ پاکستان ءِ سیمسراں پہ راھداری ءِ سر ءَ گْوزوکاں ھچ رنگیں آسراتی نیست ۔ ھر دو نیمگ ءِ سرکار ءَ اے نیمگ ءَ دلگوش دئیگ لوٹ اِیت پہ شپکی ءُ سِلاہ ایران ءِ تہ ءَ برگ ءَ ایرانی مرز سک دْراج اَنت چَہ اے رنگیں جاھاں سلاہ یا دگہ بے راھبندیں سامان برگ مشکل اِنت ، البت اے رنگیں کسانیں کار چَہ لھتیں مردمانی ناسرپدی ءَ بنت ۔ پہ ایشانی دیم ءِ دارگ ءَ ھردو نیم ءِ واکداراں مزنیں تک ءَ گند ءُ نند کنگ لوٹ اِیت ''

آئی ءَ گمان دراکرتگ کہ ''  گیشتر ھمے گمان اِنت نام گیپتگیں جنین آدم یکے ءَ رَد داتگ ءُ ٹیکی ءِ نام ءَ داتگیں ڈبہ ءِ تہ ءَ سِلاہ چیر داتگ '' 

آئی ءَ دگہ جستے ءِ پسو ءَ گْوشتگ :''  چَہ راھداری ءِ سر ءَ گْوزوکیں مردم چَہ ایرانی مرزبان ءِ سپاھیگانی رَوش ءَ دلسیاہ اَنت ۔ بوت کنت آھانی لھتیں لاچاری بہ بنت بلے ھریک مردمے دُز ءُ شپک نہ اِنت اے درگت ءَ باید سپاھیگ ھیلکاری ءُ سوج دئیگ بہ بنت ۔ اگاں مرز ءِ ھر دو نیمگ ءَ نوکتریں آسراتی، اسکینر ءُ دگہ پٹ ءُ پولی مشین ایر کنگ بہ بنت پہ اے رنگیں کارانی گر ءُ دار ءَ آسانی بیت ۔''

آئی ءَ چَہ اھوالکارے نیمگ ءَ جست کرتگیں دگہ پسوے ءَ گْوشتگ ''  چَہ مئے نیمگ ءَ گیشتر جھد ھمیش کنگ بیت کہ مسافر دلسیاہ مہ بنت ۔ اے سوج ھم جْوان اِنت کہ پہ جنین آدمانی سامانانی پٹگ ءَ باید جنین آدمیں کارمند ءُ سپاھیگ اُوشتارینگ بہ بنت ۔ سرکار ءِ کار مردمانی دلسیاہ کنگ نہ اِنت بلکیں آھانی زندمانی ءِ پھریزگ ءُ نگھوانی اِنت ۔''

چَہ اے دزگیری ءَ مردماں گمان دْرشان کرتگ کہ سرکار باید اے نیمگ ءَ ھم دلگوش بہ دنت کہ جنین آدم رَد دیگ نہ بوتگ ءُ چَہ میار ءِ راست بوگ ءَ پیش باید گوں آئی ءَ گھتریں رنگے ءَ پیش آیگ بہ بیت ءُ پہ جست ءُ پرس ءَ جنین آدمیں سپاھیگ گْوشگ بہ بنت داں اے کارپد پہ دگہ شھرونداں یک چاگردی ءُ سیاسی جیڑھے جوڑ مہ بیت ۔ 

 آھاں اُوست بستگ کہ ایرانی سرکار وتی شھروند ، میار ءُ بے میارانی میان ءَ کشک رست کنت ۔ لھتیں مامورانی بدروشی ءَ مُراد اے نہ اِنت کہ سرکار پہ بے میاراں تْرند اِنت ءُ سددر سد گمان ھمیش اِنت کہ گوں جنین آدم ءَ اسلامیءُ  جمھوری سلامی ایران ءِ راھبندانی پد ءَ پیش آیگ بیت ۔ اگاں کسے ءَ بدگمانی یے ھست ما گوں دمگ ءِ وکیل واجہ الحاج یعقوب جدگال ، صدر اسلامی جمھوری واجہ احمدی نژاد ءُ رھبر ءَ گوں دزبندی کن اِیں کہ آ اے نیمگ ءَ دلگوش بہ کن اَنت ءُ ضامن جوڑ بہ بنت کہ ریاست ءِ مامور گوں دزگیر بوتگیں جنین آدم ءَ راھبنداں  در رَوش اختیار نہ کن اَنت ۔ 

گیشتر بہ وان…

راسک: نوکیں ھالانی ردا مرچی ماں روکپتی بلوچستان ءِ دمگ راسک ءَ مولوی عثمان بلوچ ءِ دزگیری ءِ جھد ءِ بے سوبے ءَ رند ملایانی لشکر ءَ لس مھلوک ءِ سرا تیرگواری کُتگ۔ چر اے تیرگواری ءِ آسرا سئے بلوچ شھید بیتگ ءُ دو ٹپئیگ اَنت۔

گیشتر بہ وان…

بام ھال: روکپتی بلوچستان ءِ دمگ راسک ءَ مرچی ایرانی مُلایانی لشکر ءَ مولوی عثمان ءِ دزگیر ءِ کنگ ءِ ھاترا ارش کُتگ، دومی نیمگ ءَ لس مھلوک دگانی سرا درکپتگ ءُ ایرانی لشکر بے سوب بیتگ۔ ھالانی ردا رندا مھلوک ءِ زھرشانیاں جنگ ءُ چوپ ءِ دروشم گِپتگ ءُ مھلوک ءَ بازیں سرکاری کارگس ءُ گاڑی مانداشتگ اَنت۔ ایرانشھر ءُ چاھبار ءِ دگ بند کنگ بیتگ ءُ گاڑی دارگ بیتگ اَنت۔ روکپتی بلوچستان ءِ زرگوری شھر چاھبار ءَ ھم عوامی رد عمل دیم ءَ اَتکگ اَنت۔۔۔

روکپتی بلوچستان 1928 ءَ ایرانی لشکر ءَ آوار جتگ ءُ بلوچستان ءِ وتواکیں بستار ھتم کُتگ۔ وھدیکہ 1928 ءَ پیش روکپتی بلوچستان ءَ سردار امیر دوست محمد خان ءِ حاکمی بیتگ ءُ روکپتی بلوچستان یک آجوئیں اسٹیٹے ءِ بستار ءَ ”فیڈریشن آف کلات” ءِ دست ءَ بیتگ ، بلے ھما وھد ءَ کہ انگریز ءَ سوویت یونین ءِ دیمگیری ءِ ھاترا گوں لھتے زرخریدیں سردارانی کمک ءَ بلوچستان بھر ءُ بانگ کُت ءُ روکپتی بلوچستان شاھی لشکر ءِ دست ءَ دات۔ اے ردا پہ روکپتی بلوچستان ءِ آجوئی ءِ ھاترا بازیں جنز چست بہ کنت۔ اے جنزانی دروشم سلاہ بندیں گلانی شکل ءَ ھم بیتگ ءُ سرفیس ءَ ھم۔ پدریں مثال دادشاہ ءِ جنگ اِنت۔ اے گپ راستیں کہ دادشاہ ءِ جنگ ءَ حاصیں نظریاتی بنیاد نہ بیتگ۔ بلے الم اے نشون دُنیا ءِ دیم ءَ اَتکگ کہ بلوچ نفسیاتی صورت ءَ ایران ءِ غلامی ءَ وش ءُ آسودگ نہ اِنت۔

ایشی ءَ چہ رند روکپتی بلوچستان ءِ ورناھاں نظریاتی صورت ءَ ھم بلوچ جُنز رھبند داتگ۔ ایشی ءِ پدریں مثال واجہ رحیم زردکوھی بیتگ کہ 26 دسمبر 1980 ءَ ماں روکپتی بلوچستان ءِ دمگ پھرگ ءَ ایرانی ملایانی لشکر ءَ جت ءُ شھید کُت۔۔۔ ایشی ءَ چہ رند بازیں بلوچاں ایرانی ملائی لشکر ءِ ھلاپ ءَ وتی جنگ برجاہ داشتگ کہ اے ردا حاجی دین محمد بلوچ ، حاجی سالمی بلوچ ءُ دگہ بازیں، البت اے جنزانی بے سوب نظریاتی تکانی کمزوری بیتگ یا مھلوک ءِ بے سنچی کہ پروش واتگ اِت۔۔۔

ایشی ءَ ابئید روکپتی بلوچستان ءَ سوویت یونین ءِ دور ءَ بازیں آشوبی ورناہ ودی بیتگ اَنت۔ بلے ایشانی لیکہ کمیونزم ءِ بنیاد ءَ بیتگ ءُ ایشاں ایرانی سامراجیت ءِ ھلاپ ءَ جھد کُتگ ۔ ایرانی دومی راجاں چہ سیادی داروکیں کمیونسٹانی کمک کُتگ۔ البت ایشی ءَ ماں ایران ءَ کمیونسٹانی بے سوبے گُشئے کہ ردانقلابیانی سوب مندی، بلے کمیونسٹانی جاہ ءَ 1979 ءَ ملا دیم ءَ اَتک اَنت ءُ آھاں بازیں کمیونزم فکر چہ سیادی داروکیں ورناہ زھمانی دپار کُت اَنت ءُ بلوچ ورناہ کمیونسٹانی واھگ ھم گُٹگیر بیت اَنت۔۔۔۔

بلے بلوچ ءِ چہ ایرانی سرکار ءَ ناوشی ءِ کِسہ ھر دور ءُ ھر زمانگ ءَ برجاہ بیتگ۔ واجہ عبدالمالک ریکی ءِ مذھب ءِ نام ءِ سرا جنگے گُشئے یا ھما ایرانی باغی کہ نظریاتی تکانی کمزوری ءِ سوب ءَ رودرتکی بلوچستان ءَ آ شپکانی نام دیگ بیتگ اَنت۔ بلے آھانی بنیادی سوب چہ ایرانی ملایاں ناراضی بیتگ ءُ لاشعوری صورت ءَ آھاں ھم ھمے مارتگ کہ ما غلام اِنت۔۔۔۔او مرچی کہ ما راسک ءِ جنگ ءُ بجنگاں چاریں تہ ماریں کہ بلوچ ءِ ذھن ءِ تھا تہ انگت ھما مارشيیں چیر اِنت کہ ما غلامیں ، مئے زمین ءُ زر ءِ سرا قبضہ بیتگ۔ البت روکپتی بلوچستان ءِ ملائی فکر ءَ بلوچ قومی فکر باز اثرمند کُتگ۔

گیشتر بہ وان…

بام: ھالانی رد ایرانی ایردستیں بلوچستان ءِ دمگ پشامگ ءَ ایرانی فوج ءِ تیرگواری ءَ دو بلوچ زالبول شھید بیتگ، وھدیکہ یک زالبولے ءَ ھوار دو کسانیں زھگ ٹپی اَنت۔ روکپتی بلوچستان ءِ شھر پشامگ ءَ بلوچ زالبول وتی بُنکی لوٹانی ھاترا زھرشانی کنگ ءَ بیتگ اَنت کہ رستریں ملاھانی لشکر ءَ تیرگواری کُتگ ، تیرگواری ءِ آسرا دو بلوچ زالبول شھید بیتگ ءُ یک زالبولے ءَ ھوار دو زھگ ٹپی اَنت۔
گوستگیں روچاں ماں امریکی کانگریس ءَ منگ نامگے پیش بیتگ اَت، ایشی ءِ تھا اے گپ ھم دیم ءَ آرگ بیتگ اَت کہ بلوچ راج ءِ تاریخی سرزمین سئے بھراں ونڈ کنگ بیتگ، ایران ءُ پاکستان ءَ بلوچ راج ءِ سرا زُلم ءُ زیادتی بیئگ اِنت۔ بلوچ وتی حقانی لوٹ ءِ پدا کُشگ بیئگ ءَ اَنت۔ اے منگ نامگ ءَ رند ما ھمے گندگ ءَ اِنت ایرانی ملاھانی لشکر ءَ بد تریں رنگے ءَ بلوچ ءِ کُشت ءُ کوش بنگیج کُتگ۔ گوستگیں روچاں ماں روکپتی بلوچستان ءِ شھر لاشار ءَ ھم ایرانی فوج ءَ پنچ بلوچ شھید کُتگ اَت۔۔۔

گیشتر بہ وان…

بام ھال:ایرانی ایردستیں بلوچستان ءِ دمگ لاشار ءَ ایرانی قبضہ گیریں لشکر ءَ زالبول ءُ زھگاں ھوار پنچ بلوچ شھید کُتگ، آھانی تھا عبداللہ بلوچ ، آئی ءِ لوگبانک ،  سئے زھگ ءُ یک نماسگے ھوار اَنت۔

گیشتر بہ وان…

کوئٹہ: بلوچ کواس عبدالصبور بلوچ ءَ ھندی بلوچی چینل ءَ تران کنان ءَ گُشتگ کہ پاکی ٹی۔وی پروگرام ءَ بلوچ کلچر ءَ بدیں رنگے ءَ پیشدارگ پہ بلوچ راج ءَ باز دلپدردیں گپے زانگ بیت۔ بلوچ دُنیا ءُ جھان ءِ سرجمیں کلچر ءُ زبانانی شرپ ءَ کنت ، بلے کس ءَ اے اجازت ھم دیگ نہ بیت کہ آ بلوچ کلچر ءِ شرپ ءَ لگتمال بہ کن اَنت۔ اے کرد ءَ ھمینکہ ایر بہ جنئے کم اِنت۔ وش ٹی۔وی ءِ جُھد ستا کرزنت کہ آئی ءَ اے پژگرد (ردعمل) ءَ گامگیج زُرتگ۔ اے کرد شعوری صورت ءَ کنگ بیتگ۔ چیاکہ اگاں راجی حتم کنگی اِنت تا جسمانی صورت ءَ آئی ءِ مردمانی کُشگ ءَ ھتم نہ بیت، آئی ءِ کلچر ءَ ھتم کن۔۔۔۔۔۔۔۔۔۔۔۔۔۔ اگاں راجی ءِ اجتمائی ءُ چاگردی رویہ آں زانگ لوٹئے تا آئی ءِ کلچر زانگ لوٹیت۔ ایشی ءَ چہ ھمے زانگ بیت کہ مرچی ماں میان استمانی تکاں بلوچ ءِ حق ءَ آوازے چست بیئگ اِنت اے کار پہ شعوری ءُ ردعملے ءِ صورت ءَ کنگ بیئگ ءَ اَنت۔ آ پہ بلوچ کلچر ءِ ھتم کنگ ءَ وتی جُھداں جاری دار اَنت اے دیم ءِ مردماں گوں کار داریت کہ چنکہ ایشانی گپاں زیریت۔ بلوچ راج گوں وتی کلچر ءِ ھُنڈالاں ھمینکہ بندوک اِنت کہ اگاں انفرادی صورت ءَ بلوچ ھراب گُشگ بہ بیت تا برداشت کنگ بیت، بلے اجتمائی ارش برداشت نہ بیت۔ بلوچ راج اے عمل ءِ ھلاپ ءَ گیش ءَ چہ گیش ”ری زیسٹ” بہ کنت۔ مرچی ماتی زبانانی میان استمانی روچ اِنت کہ اے عمل کنگ بیتگ۔ ماں جھان ءَ ماتی زبان ءِ یک مزنیں بستارے۔ (اے ھمینکہ بہ کن اَنت) مرچی نہ باندا میان استمانی تکاں اے گپ الم دیم ءَ آرگ بیت۔

گیشتر بہ وان…

زاھدان  :  ایرانی  سرکا ر  ءِ  نوکیں  شور  ءُ  سوجانی  پد  ءَ روکپتی بلوچستان ءِ نام گار کنگ ءُ دگہ چار اُستان جوڑ کنگ بیت۔ اے درگت ءَ چَہ بلوچستان ءَ گچین بوتگیں مجلس ء شورای اسلامی  ( اسمبلی )  ءِ  باسک  حاجی  یعقوب  جدگال  ءَ گپ جنان ءَ اے ھال راست من اِتگ ءُ گوشتگ کہ انچیں شور ءُ سوڈگے بوتگ کہ انوگیں ایران ءِ چیر دستیں بلوچستان کہ '' اُستان سیستان و بلوچستان ءِ  '' نام دیگ بوتگ پہ چارگزاری کارانی گھتر کنگ ءَ چار بھر ءَ بھر کنگ بیت ۔ نوک جوڑ کرتگیں اُستانانی تہ ءَ ھچ اُستان ءَ بلوچستان ءِ نام پر نہ بیت۔ نوک جوڑ بوتگیں  اُستانانی نام ولایت ، سیستان ، مکران ءُ ساحلی سوج کنگ بوتگ اَنت ۔ اے درگت ءَ چَہ بلوچستان ءَ گچین بوتگیں مجلس ء شورای اسلامی ءِ باسک حاجی یعقوب ءَ سرکار ءِ پلہ مرزی کنان ءَ گوشتگ کہ بلوچستان ءِ نام گار کنگ نہ بوگ ءَ اِنت بلکیں مکران ھمے بلوچستان اِنت ۔ بلے دومی نیمگ ءَ بلوچانی تہ ءَ یک بے چاڑی ءُ بے  تاھیری یے  پہ سرکار ءِ سوجانی سر ءَ سر زورگ ءَ اِنت ءُ آھانی گوشگ ھمیش اِنت کہ بلوچستان ءِ نام ءِ گار کنگ ءَ مراد بلوچانی جند ءِ گار ءُ بیگواہ کنگ اِنت ءُ چَہ ایشی ءَ بلوچ ھچ وش نہ اَنت ءُ ایران سرکار باید چَہ اے کار ءَ پیش بلوچانی وشی ءُ لوٹاں گوش بہ دار اِیت ۔ بلوچ چَہ سرکار ءَ دگہ لوٹ کنگ ءَ نہ اَنت بلے واکدار اے ھبر ءَ وت بہ جیڑ اَنت ءُ بہ چار اَنت کہ بلوچستان ایران زمین ءِ یک دپتری نام ءُ ھندے آئی ءِ نام ءِ گار کنگ نہ ایوک پہ بلوچاں یک دلگران کنوکیں کارے بلکیں دپتر ءَ ھم مجاں اندیم کنگ ءَ ھساب اِنت ۔بلوچستان ایران ءِ اُستانانی تہ ءَ چَہ دُرساں گیشتر پر ایمن ءُ ساکمیں اُستان اِنت کہ چَہ بے آسراتی ءُ بے روزگاری ءَ ابید ھم مھلوکاں چوشیں راہ ءُ راھبندے نہ زرتگ کہ ایران سرکار یا کہ انوگیں اسلامی رژیم ءِ نہ منوگری ءَ ھساب بہ بیت پمیشکا آ چَہ سر کار ءَ واھگدار اَنت کہ بلوچانی ، ایمن ءُ ساکمی ءُ گوں ایران زمین ءَ دپتری سیادیانی مھکم دارگ ءَ چوشیں سوجانی سر ءَ گامگیج نہ زورگ نہ بیت اے سوڈگ رَد کنگ بنت۔     

گیشتر بہ وان…

گُشنت کہ زالم ءِ وتی یک تبے، آ ایر دستیں راج ءِ ایرموش کنگ ءَ ھر ھما کار ءَ کنت کہ آئی یے دل بہ لوٹیت۔ پہ وتی وتگڑیں قبضہ ءِ برجاہ دارگ ءَ آ ایر دست ءَ جنت ، کُشیت ، چیاکہ آئی واھگ بس ھمیش اِنت من ھما ایردستیں راج ءَ چر اے جھان ءَ گار ءُ بیگواہ بہ کناں ءُ آھانی مال ءُ مڈیانی سرا پہ مدامی وتی بہ کناں۔ آئی یے کُشت ءُ ھون ءَ ھچ وڑیں حد ءُ سیمسر نہ بیت۔ ایردستیں راج ءِ ھر فردے پہ زالم ءَ یک ٹوھیں دُژمنی یے بستار ءَ داریت۔ آ ایر دستیں راج ءِ ھر مردم ءَ وتی دژمن سرپد بیت۔آ پہ غلامیں راج ءِ کُشگ ءُ گار کنگ ءَ وتی ھمدستیں دگہ زالم ءُ زوراکیں  مُلکاں ھمتپاک ءُ یک دست بیت۔ پمیشا باز بر ءَ بازیں زالمیں مُلک پہ ایردستیں راج ءِ کُشگ ءُ گار کنگ ءُ آھانی مال ءُ مڈیانی پُلگ ءُ برگ ءَ ھمدست ءُ ھمکار بنت۔مرچی ما گندگ ءَ اِنت کہ پاکستانی ءُ ایرانی سرکار پہ بلوچ ءِ راج ءِ گار ءُ بیگواہ کنگ ءَ یک دست ءُ یک مُشتاں۔
بلوچ ھزاراں سالاں یک انچیں گُلزمینے ءِ سرا جاہ منند اِنت کہ اے گُلزمین ھر وڑیں مال ءُ مڈیاں چہ چکار اِنت۔ ھمے پُرگنجیں سرزمین ، ھمے مال ءُ مڈی ھر دؤر ءُ ھر زمانگ ءَ پہ بلوچ ءَ بلاہ ءُ بدے بیتگ۔ بزاں بلوچ ءِ جند ءِ گُلزمین پہ بلوچ ءَ گُشے یک خونانی یک نہ کُٹوکیں زرے ءِ راجدپترے داریت۔ اے زُلم ءُ زوراکی انوگین ئے نہ اِنت ۔ بلکیں اے زُلم ءِ تاریخ ھمینچو کوھن اِنت کہ بلوچ ءِ جند ءِ تاریخ۔ سکندر اعظم ءَ بگر تاں ایرانی زالمیں بادشاہ نوشیروان۔ خدا ءِ نیکیں مھلوک عربانی ماں اے سرزمین ءَ لُٹ ءُ پل ءَ بگر تاں پُرتگیزیاں درا، بزاں اے پراہ ءُ شاھگانیں زمین کسے چمانی زدا نہ رک اِتگ۔ انگریزاں ھم وتی چم داں کرنے ءَ ھمے زمین ءَ داشتگ اَنت ءُ مرچیگیں سامراجی قوت ھم سراپایاں۔ گُشے پہ بلوچ ءَ اے دُنیا تھار اِنت۔ بلوچ ءِ مات ءُ گُھارانی چیھال اے جھان ءَ کسے گوشاں نہ کپیت۔
بلے بلوچ ءِ سرا اے زُلم ءُ زوراکی۔ کُشت ءُ ھون ءِ تاریخ یک رندی پدا ھما وھد ءَ یک بد تریں رنگے دیگ بوت  کہ سامراجیاں گوں رپکاں بلوچ ءِ ماتیں گُلزمین سئے بھر ءَ بھر کُت ، نوزدہ سد ءُ بیست ءُ ھشت ءَ ایران ءَ روکپتی بلوچستان آوار جت ،پدا بیست سال ءَ رند  نوزدہ سد ءُ چِل ءُ ھشت ءَ سامراجی جوڑ کُتگیں استاں پاکستان ءَ سامراج ءِ مدد ءُ کمک ءَ پہ زور رودرتکی بلوچستان ءِ سرا قبضہ کُت۔ ھمدا چہ بلوچانی آزادی یے روچ پہ مدامی بیگاہ بیت۔ ادا چہ اے کُشت ءُ خون ءِ شھکور یک جُھلیں زرے ءَ بدل بوت۔
روکپتی بلوچستان بہ بیت یا رودرتکی بلوچستان مرچی ما گندگ ءَ اِنت کہ ھر نیمگ ءَ بلوچ ءِ ھون ماں وتی جند ءِ گُلزمین ءَ تالان اَنت او ھر نیمگ ءَ بلوچ مات ءُ گُھارانی جیھال چِست بنت ءُ بلے ھچ نیمگ ءَ اے جیھالانی گوش داروک نیست ، بلکیں سامراجی پروردھیں انسانی حقانی گل بہ بنت یا خدا ءِ نام گروکیں مُلا ءُ پیر بہ بنت، اے دُراہ ھمے سامراجی نپانی برجاہ دارگ ءَ لانک بند اَنت ءُ بلوچ ءِ کُشت ءُ ھون ءَ ھوار اَنت۔ پاکستانی مُلا ءُ وت گڑیں عالم کہ دُنیا ءِ کجام کُنڈ ءَ کسانیں جیڑھے بہ بیت اے وتی دپ ءَ پچ کن اَنت ، بلے وھدیکہ بلوچ ءِ باریگ کئیت گُشے ایشانی زبان سیاھمار ءَ وارتگ۔ اے گپ چوش کہ مرچی نیوز ءَ ھمے گپ شنگ بیتگ اَت کہ ماں مکران ءَ ایرانی زالمیں فوج ءَ ھفت بے گُناھیں بلوچ وتی جند ءِ ماتیں سر زمین ءَ جتگ ءُ شھید کُتگ۔ پدا مرچی خدا ءِ نیکیں بندہ حضرت مولانا عبدالغفور حیدری یے ھمے گپ نیوز ءَ شنگ کُتگ اَت کہ” ماں قبائلی ایریا آں پاکستانی فوج ھم مھلوک ءِ قتل عام ءَ کنگ اِنت اودا کس خُدا ءِ مُلک پاکستان ءِ ھلاپ ءَ چیا آواز چِست نہ کنت تا گُڑا (بلوچ  چیا پاکستان ءِ پروشگ ءِ گپ ءَ جنگ اِنت۔ اے واجہ اے گپ ءَ ھم سرپد نہ اِنت کہ اے وتگڑیں ریاست ءِ جوڑ کنگ ءَ ھما وھد ءَ ھم نالائق این پٹھان کارمرز بیتگ او انو ھم اے وتگڑیں ریاست ءِ دارگ ءِ ھاترا پٹھان کارمرز بیئگ اِنت۔ بلے بلوچ ءِ وتی یک جُتائیں بستارے بیتگ ءُ بلوچ ءِ سرا پہ زور اے سامراجی استان ءَ سامراج ءِ مدد ءُ کمک ءَ قبضہ کُتگ۔ او بلوچ مرچی وتی آزادی یے جنگ ءَ کنگ اِنت
ھئو مرچی پدا عہد ءِ زوراک ءَ ھفت بلوچ ورناہ شھید کُتاں۔ مرچی پدا زالم ءَ ھفت بلوچ گِسانی روکیں چراگ تھار دیم کُتاں۔ مرچی پدا وتی جند ءِ ماتیں گُلزمین ءَ بلوچ پُسگانی چیھال رُستاں۔ بلوچ ءِ زھگ زوراک ءِ شِل سریں تیرانی میار بیتاں۔ بلے دومی نیمگ ءَ ما چاریں عالمی ادارہ بہ بنت یا ورگڑیں میڈیا ءُ رسانکدر کُل خاموشاں۔ بلے مارا چہ دگرا گلگ نیست ،دگرا چے کار گوں منی رِتکگیں ھوناں ۔ بلے مرچی منی کُشگ ءُ گار کنگ ءَ منی جند ءِ برات ھم ھوار اِنت۔ ھمے منی زیکیں کامریڈ کہ  ایشاں آزادی یے گپ جت ، بلے مرچی گوں دُژمن ءَ ھوار کپتگاں۔ پہ بان ءُ بادگیر ءُ چیزے زر ءِ ھاترا ھمے دُژمن ءِ پارلیمنٹ ءَ نشتگ ءُ بلوچ ءِ کُشت ءُ ھون ءَ ھوار اَنت۔ مرچی مارا کس ءَ نہ جتگ ، مارا جتگ ھمے آستونک ءِ سیاھمار ءَ ۔۔ بلوچ ءَ وتی چم پچ کنگی اَنت ءُ ھمے گپ زانگی اِنت کہ دانکہ ھمے آستونک ءِ سیاھمار ھتم کنگ مہ بنت ، ما داں ھما وھد ءَ غلامیں۔ داں ھما وھد ءَ مئے خون تلان بنت
بلے ھمے آستونک ءِ سیاھمار اے گپ ءَ یاد بہ کناں کہ وھد یکیں وڑا نہ اوشتیت۔ مرچی بلوچ ءَ دُژمن ءِ ھلاپ ءَ تپنگ چِست کُتگ ءُ دُژمن ءِ ھلاپ ءَ جنگ ءَ اِنت ۔ آ وھد دیر نہ اِنت کہ ھمے تپنگ پہ آستونک ءِ سیاھماراں، پہ مات ءِ سوداگراں ھم گذبے جوڑ بیت ءُ اے سوداگر ذلیل ءُ رُسوا بنت۔۔۔ بلوچ وتی آزادی ءَ الم گیپت۔۔۔ بلوچستان سبز ءُ میزران بات

گیشتر بہ وان…

گوادر : رودرتک ءُ روکپتی بلوچستان ءِ سیمسری ھند زاران ءَ ایرانی مرز بان ءَ تیرگواری کرتگ ءُ ھپت بلوچ کُشتگ ۔ چَہ ایشاں شش پاکستان ءِ دزچیری بلوچستان ءَ جاھمندءُ یکے چَہ ایران ءِ دزچیرءِ بلوچستان ءَ بوتگ ۔ دنیگت اے زانگ نہ بوتگ کہ اے ھپتیں بلوچ پرچا جتگ اَنت اِش ۔ چَہ ایران ءِ نیمگ ءَ پاکستان ءِ دزچیری بلوچستان ءِ تہ ءَ پترگ ءُ مردم کشگ نوکیں گپے نہ اِنت گوستگیں سال ءِ گڈی ماہ ءِ گڈی روچ بزاں سی ءُ یک دسمبر ءَ ماشکیل ءِ سیمسری ھند مزاسر ءَ ھم ایرانی سپاھیگاں یک بلوچے شھید کرتگ ءُکشندہ بلوچستان لیوز ءَ دزگیر ھم کرتگ اَنت بلے پد ءَ شھید بوتگیں مردم ءِ کھول ءِ سر ءَ زور پر دیگ بوتگ کہ کشندہ ءَ پھل بہ کن اَنت ءُ ھمے رنگ ءَ ایرانی سپاھیگ یلہ بوتگ اَنت ءُ ھمیشی ءِ چندیں روچاں پد ایرانی دریاہ بانی بزاں کوسٹ گارڈ ءَ چَہ جیمڑی ءِ تیاب ءَ دریاوردانی پانزہ کاھک ھم  گیپتگ برتگ کہ رندتر ءَ پاکستانی واکدار ءُ ایرانی وکدارانی میان ءَ گپ ءُ رَپ ءَ رند یلہ دیگ بوتگ اَنت ۔ ایران ءِ اے زوراکی ءُ پاکستان ءِ اے درگت ءَ گامگیج نہ زورگ ءِ سر ءَ جمیڑی ءِ مید ھما اِنت کہ زھرشانی کنگ ءَ اَنت ۔

گیشتر بہ وان…

چوناھا فطرت ءِ وتی قانونے، زُلم حدا چہ گوزیت تا الم پدا زالم ءِ گُٹ ءَ طوق بیت، اللہ تعالیٰ زالم ءَ باز موہ دات ، بلے آخر آئی ءَ ھمے وڑ گیپت کہ زالم ءَ سما ھم نہ بیت کہ اے لٹ کُجا چہ من ءَ لگیت، بنی آدم ءِ تاریخ چوشیں مثالاں پُر اِنت۔ہلاکو خان، چنگیز خان، مسولینی ءُ ہٹلر ءُ دگہ بازیں کئے پش کپتگ۔ ہلاکو خان ءَ بغداد آس مانداشت، لکھاں انسان پہ بے دردی کُشتاں ھمے مردا ، بلے کُج انت مرچی؟

 مرچی پدا بلوچ قوم تاریخ ءِ مستریں زُلم ءُ زوراکیانی آماچ اِنت۔ وتی جند ءِ زمین ءَ بلوچ ورناھانی خون تلان اَنت۔ بلوچ گِس ماندارگ بیئگ ءَ اَنت۔ بلوچ زھگ چہ وتی گساں چست کنگ ءُ شھید کنگ بیئگ ءَ اَنت۔ زالم من ءَ جنت ءُ کُشیت ، منی لاشاں ماں دگ ءُ چاھراہانی لمباں چگل دنت۔ بلے انسانی حقانی نگھپان بہ باں یا مذھبی مُلا ءُ دانشور ایشانی گوشاں مورے ھم نہ وارت۔ انچو گُشے کہ اے دُنیا ءِ مھلوک ءُ مردم بلوچ ءَ یک انسانے سرپد نہ باں۔

انچو گندگ آیگ اِنت پہ بلوچ ءَ دُراھیں دُنیا گُنگ اِنت۔ ھما کہ وت ءَ انسانی حقانی نگھپان گُشنت ، دُنیا ءِ کُجام کُنڈ ءَ یک جیڑھے بہ بیت آھانی توار جھان ءَ جکسینیت ، بلے بلوچ ءِ ھوناں وتی جند ءِ زمین ءِ سرا اے تلان ءَ نہ گنداں  بلے ایشانی زبان للیں۔۔۔ ھما کہ وت ءَ اسلام ءِ چمپئین گُشنت، بلاھیں بلاھیں ریش ءِ داشتگ کہ ما خدا ءِ نمائندھیں، فلسطین بہ بیت یا کشمیر ، یا ڈاکٹر عافیہ کہ پنجابی ءَ وت  پہ زر ءِ ھاترا گیپت ءُ امریکا ءَ دات ، وھدیکہ ایشانی گپ ءِ دیم ءَ کئیت تا مُلا ، بزان خدا ءِ نیکیں مھلوک دُنیا ءَ سرا زیراَنت ۔ بلے پہ بلوچ ءَ گُشے ایشانی زبان ءَ زیمے دجیت۔

اے کُلیں گپانی کڑیاں اگاں ما یکجاہ بہ کنیں ، مارا ادا مزنیں سازشے گندگ ءَ کئیت۔ سامراجی سازشے، ایردستیں راجانی گار ءُ بیگواہ کنگ ءِ سازشے۔ مذھبی مُلا بہ بنت یا عالمی پہ نام جوڑ کُتگیں انسانی حقانی کارگس، اے دُراہ ھمے سازش ءَ ھوار اَنت، چوناھا اگاں ما بچاریں بلوچ ءُ کرد چہ ایدگہ راجاں جُتائیں بستاری یے واھنداں ،اے ھند ءُ دمگانی تھا بلوچ ءُ کُرد ، ھما بہادریں راجاں کہ ایشاں ھچ زالم ءُ زوراکیں سامراجی قوتانی دیم ءَ وتی سر جہل نہ کُتگ۔ مرچی ءَ چہ ھزار سال پیش سامراجیاں کہ عرب خطہ یے سرا ارش کُت تا گُڑا ھمے کُرداں جنگ کُت ءُ آ شکست داتاں۔ صلاحالدین ایوبی یک کُردی اَت کہ عرباں یک نامے دیم ءِ دات اگاں نا عرب اے خطہ یے سرا پش نہ کپتگ اِتاں،
او مرچی ھم سامراج زانت کہ ادا بس ھمے دوئیں راجاں کہ اگاں اے دیم ءَ بیاینت تا گُڑا آئی ءَ اے خطہ یے سرا نندگ گران ءَ کپیت۔ آ دگہ ھر راجی بہ بیت آھاں ھر دؤر ءُ ھر نوبت ءَ سامراجی راجانی غلامی کُتگ ، انچو کہ انو کنگایاں۔

دومی نیمگ ءَ سامراج ءِ مستریں ہتھیار مذھب ءُ مُلائیں کہ ا ایشی ءَ وتی نپانی برجاہ دارگ ءِ ھاترا کارمرز کنت۔ بزاں مُلا ءِ کار ھمیش اِنت کہ پہ زر ءُ  لاپ ءِ پُر کنگ ءِ ھاترا ھر چیز ءَ روا بدے۔ فتویٰ ھم دات، کافر ھم گُشیت۔ اے کاراں مُلا پہ سامراجی نپانی برجاہ دارگ ءِ ھاترا سامراج ءِ گُشگ ءِ پدا کنت۔ انچو کہ سوویت یونین ءِ ھلاپ ءَ مُلا کارمرز کنگ بیتاں۔ بنگلہ دیش ءَ نوزدہ سد ءُ ھفتاد یک ءَ اے مُلایاں چی نہ کُت۔ ھمے مُلا اتاں، ھمے خدا ءِ نیکیں نمائندہ اِتاں ، کہ ایشانی گُشگ ءِ پدا ھزاراں بنگالی مات ءُ گُھارانی گُما ھما کار اِش کُت کہ راجدپر ءَ چوشیں مثال کم اِنت۔
مرچی بلوچستان ءَ ھم ھمے مُلا بنجابی یا سامراجی نپانی برجم دارگ ءَ ھمے کارا گوں گُلائیش اَنت۔ گوں آئی۔ ایس۔ آئی ءَ یکمشت ءُ یک دستاں۔ بلوچ ءِ ھوناں گوں وتی دستاں رنگ کنگایاں،،
اے درستیں گپاں چہ ابئید مرچی اے زُلم ءُ زوراکی ءَ بلوچ بچانی کُشگ ءُ گار کنگ ءَ لھتے مئے وتی دپ چٹ ءُ دُز ءُ لاپ گاریں بلوچ ھم گون اَنت۔ پارلیمانی پارٹیانی شکل ءَ یا لھتے سردار ءُ نوابانی شکل ءَ اے پہ چرپیں چانوگی یے واستہ یا پہ زر ءُ دولت ءِ ھاترا ، وتی ننگ ءُ غیرت ءُ عزت ءُ آبرو ءِ سودا ءَ جنگ ءَ اَنت۔ وتی مات اِش بھا کُتگ۔ نشتگاں ھمے مات ءِ دلبند ءَ رُستگاں ھمے مات ءِ دامن ءَ بلے مرچی ھمنچو بے غیرت ءُ زلیل ءُ رُسوا جوڑ بیتگ اَنت کہ پہ چار کلدار  ءِ ھاترا پہ یک پراھیں لوگے ءِ ھاترا، پہ وتی چار روچی ذاتی ھیش ءُ نوش ءُ آسراتیانی ھاترا وتی عزت ، وتی غیرت ءُ وتی مات ءِ سودا ءَ گوں بدیں دُژمن ءَ جنگ ءَ اَنت۔
من ءَ افسوز اِنت پہ ھمے بلوچانی سرا ، کہ گوں دُژمن ءَ ھور بیتگ اَنت ءُ مات ءِ سودا ءَ جنگ ءَ اِنت ، وتی جند ءِ برات ءَ یک دری دُژمنی یے دست ءَ شھید کنائینگ ءَ اَنت،، بلے مات ءِ سوداگر اے گپ ءَ ھم بیھال مہ باں تاریخ ایشاں رُسوا ءُ ٹِنڈر کنت۔ بلوچستان الم آجو بیت ۔ اے شھیدانی رِتکگیں ھون الم یک روچی رنگ کاراں، انچو کہ فطرت ءِ اے رھبندیں کہ اگاں پہ یک مقصدے ءِ ھاترا خون ءِ یک ترمپے زمین ءَ بہ کپیت آ خون الم رنگ کاریت ، دُنیا ءِ راجدپتر اے گپ ءِ شاھدیں۔۔۔ بلے مات ءِ سوداگراں وھد کدی معاپ نہ کنت۔ ایشاں مات ءِ حق الم گر اَنت ءُ اے دُنیا ءَ رُسوا ءُ برباد بنت ، منی اے گپ ءَ یاد بہ کناں ، چیاکہ اے خدا ءِ قانونیں کہ حاک ءِ حق ،یا مات ءِ حق مردم ءَ ھمے دُنیا ءَ گر اَنت،،،

گیشتر بہ وان…

چھبار : اُستاد غلام رسول دینار زھی 68 سال ءِ سند ءَ 20اکتوبر 2011ءَ چَہ اے کوڑھیں دنیا ءَ لڈ اِتگ ۔آئی ءَ وتی پشت پدانی تہ ءَ سئے جنک ءُ پنچ بچ یل داتگ ۔ اُستاد ءِ بچکانی نام عطا ءاللہ ، سھراب ، اورنگ زیب ، جیھند ءُ رستم اَنت ۔ اُستاد ءَ دو آروس کرتگ ۔چَہ اولی جنین ءَ اُستاد ءَ چک نہ بوتگ ۔ اُستاد سئے برات بوتگ اَنت مستریں  غلام قادر کہ چھبار ءَ نندوک اِنت ، میانی غلام حیدر کہ پھرہ [ ایرانشھر] ءِ نندوک اِنت ءُ چَہ درساں کستریں اُستاد غلاُام رسول دینار زھی کہ نمیران اِنت ۔1977ءَ  اُستاد غلام رسول چَہ کراچی ءَ لڈ اِتگ چھبار ءَ اَتکگ ءُ داں زند ءِ گڈی اداراں ھمد ءَ  جاھمند بوتگ چَہ آئی ءَ پیش آئی ءِ مستریں برات غلام قادر دینار زھی ھم چَہ کراچی ءَ لڈ اِتگ ءُ چھبار ءَ اَتکگ ۔اُستاد ءِ کھول چَہ بن ءَ بنپور ءِ نندوک بوتگ اَنت ۔   

گیشتر بہ وان…

چھبار : بلوچی نامی ئیں شاعر ، آزمانکار ءُ زیمر ساچ اُستاد تاج محمد طاھر ءَ گوں بام ھال ءِ جھگیر ءَ گپ جنان ءَ گوشتگ کہ اُستاد غلام رسول دینار زھی یک وژدل ءُ وش تبیں مردے بوتگ آئی ءِ زیمر ءُ آھنگانی تہ ءَ دلپدری ءُ موتک رنگ سما بیت  کہ آئی ءِ تھی درد ءُ دورانی درانگازی بوتگ اَنت بلے ماں دیوان ءَ آ پُر کندگ ءُ وش ھبریں مردے اَت بلوچی زیمرساچی ءِ پڑ ءَ آ وتی مٹ وت اَت بے اُمیت بوگ نہ لوٹ اِیت بلے داں مدتےءَ اے رنگیں زیمر ساچ ودی بوگ ءِ گمان نیست آئی ءِ کمی داں دیر ءَ سما کنگ بیت ۔ اُستاد ھما اولی زیمر ساچ بوتگ کہ بلوچی زیمر ءِ تہ ءَ اولی رند ءَ دو ڈھولے کارمرد کرتگ ، غلام گولو ءُ نصرت ناز ءِ ڈیوٹ ئِے جوڑ کرتگ ۔آئی ءِ دھن سک باز مشکل بوتگ اَنت بازیں گشندھاں جتگ اَنت بلے آھاں ھم  ھما رنگ ءَ کہ  آ جنگ بہ بنت نہ جتگ اَنت ۔اُستاد ءَ گوں وتی ازم ءَ مزنیں شاعر گوں مھلوک ءَ پجاروک کنائینتگ اَنت چوش کہ سید ھاشمی ، جی آر ملا ، عطا شاد ءُ کریم دشتی ۔آ یکیں رند ءِ کار ءَ ایمن نہ بوتگ اَت بلکیں آئی ءَ یکیں دستونک یا لچہ دہ دہ رند ءَ دھن داتگ اَنت ۔ ھمے درگت ءَ غلام بھار ءَ ھم  درور دیان ءَ گوشتگ کہ اُستاد دینار زھی ءَ چَہ وتی زند ءَ چندیں روچ پیش سید ھاشمی ءِ یک دستونکے نوکیں دھنے داتگ چد ءُ پیش کہ اُستاد ءَ دھن داتگ اَت ما ھمے گوشتگ کہ نوں چد ءُ جوانتر بوت نہ کنت بلے ھمیں نوکیں دھن ءَ گوں  اُستاد ءَ گوشتگ کہ چَہ پیشگیں دھن ءَ ھم وشتراِنت ، اے آئی ءِ  زیمرساچی ءِ کمال ءُ آئی ءِ زانتکاری اَت کہ  زانتگ اِت ئِے کہ دھن انگت جوانتر چون کنگ بہ بیت ۔ اُستاد تاج محمد طاھر ءَ گوشتگ کہ اُستاد ءِ شاعری ءِ تہ ءَ ھم پھتوئی اَتکگ اے پھتوئی ءَ وانوک وت سما کن اَنت وھدے کہ آیوکیں روچ ءَ آئی ءِ شعراں وان اَنت ۔ اُستاد ءَ بلوچی زیمر ءِ نوکی آورتگ ءُ وتی یک جتائیں رنگے ءَ زیمر ساچی کرتگ ۔

گیشتر بہ وان…

چھبار :پہ اُستاد غلام رسول دینار زھی ءِ ازم ءُ زند ءِ سر ءَ پٹ ءُ پول ءَ بلوچی لبزانکی گل چھبار سئے جتا جتائیں مجلس [ کمیٹی ] جوڑ کنت ۔اے ھبر بلوچی لبزانکی گل چھبار ءِ کماش [ صدر] محمد فاروق ھوت ءَ گوں بام ھال ءِ جھگیر ءَ گپ کنان ءَ گوشتگ ۔ آئی ءَ گوشتگ اُستاد ءَ زیمر ، شاعری ءُ زبان دوستی ءِ باندات ءَ کار کرتگ ۔بلوچی لبزانکی گل چھبار ھمے زوت ءَ پہ آئی ءِ ازم ءِ نوکیں پدریچ ءَ سر کنگ ءُ آئی ءِ ازم ءُ ھیال ءِ زندگ دارگ ءَ سئے مجلس اڈ کنت ۔یکے پہ آئی ءِ ساز ءُ زیمل ءِ پڑ ءَ کرتگیں کارانی یکجا کنگ ءَاُستاد تاج محمد طاھر ، بابل ھمراز ءُ دگہ ھمکارانی سروکے ءَ ، پہ آئی ءِ شاعری ءِ یکجا کنگ ءَ اُستاد تاج محمد طاھر ، علی بخش دشتیاری ءُ غلام بھار ءِ سروکے ءَ مجلسے کار کنت ءُ اُستاد ءِ یک میوزیمے جوڑ کنگ بیت کہ آئی ءِ تہ ءَ اُستاد ءِ زند ءَ گوں بندوکیں سامان ایر کنگ بنت پہ میوزیم ءِ کارانی دیم ءَ برگ ءَ جوڑ بوتگیں کمیٹی بلوچی لبزانکی ءِ گل ءِ کماش محمد فاروق ءِ جند ءِ سروکے ءَ کار کنت ۔ آئی ءَ اُستاد ءِ بابت ءَ ھیال درشان کنان ءَ گوشتگ ۔اُستاد گوں وتی ازم ءَ دلستکی بندوکیں مردمے بوتگ پمیشکا آئی ءَ وتی ازم لاپ جوڑ نہ کرتگ بلکیں یک مھتریں کارے ءِ پیم ءَ کرتگ ۔انوگیں دور ءَ کہ گشندھانی زور کسیٹ کنگ ءُ بازار ءَ نام کٹگ اِنت اُستاد ءَ کیسٹ ریکارڈ نہ کنائینتگ بلے آئی ءِ گوں ازم ءَ مھر ءُ ھمبستگی سک برز تر اَت ءُ آئی ءَ ھمیں گوشتگ اَت کہ آئی ءَ زیمرساچی ءِ یک ازمے ھست  ءُ آ باید چَہ گشندھی ءَ گیش ھمے پڑ ءَ دلگوش بہ دنت ۔ بلوچی لبزانکی گل چھبار ءَ پہ آئی ءِ یاتگیری ءَ زوت یک مزنیں دیوانے لوٹائین اِیت کہ آئی ءِ تہ ءَ سرجمیں بلوچستان ءِ گوں ازم ءُ لوزانک ءَ بندوکیں مردم لوٹائینگ بنت ، داں آئی ءِ ازم ءِ بابت ءَ الکاپیں چمشانکے دیگ بہ بیت ۔   

گیشتر بہ وان…

چابھار: اُستادغلام رسول دیناررزئی کہ بیست اکتوبر 2011ءَ ماں چابھار ءَ دل ءَ گیپتگ ءُ بیران بوتگ  چَہ بلوچی زبان ءِ نامی ئیں  زیمل ساچ ءُ سوت گوشاں یکے اَت نیمرانیں اُستاد ماں ساز ءُ زیمل پڑ ءَ وتی مٹ وت ءُ چَہ درساں گستائیں رنگ ءُ آھنگے ءِ واھند اَت ۔ اُستاد غلام رسول دینارزئی ءِ پت ءِ نام لال محمد  اَت ۔ آئی ءِ پیرین  چَہ روایرشتی بلوچستان ءِ ھند بنپور ءِ  دمگاں کساس1860م ءَ چَہ گجرانی (قاجاری ) اُرش ءُ  ھاکمانی زپت ءُ زورءَ وتی ھنکین ءَ درکپتگ ءُ چَہ گوادر ءِ راہ ءَ کراچی ءَ شتگ ءُ سربوتگ اَنت  ۔ کراچی ءَ سالار کمپان ءَ بہ نند جاھی بوتگ اَنت ۔ چیزے سال ءَ پد چَہ اُود ءَ درکپتگءُ  گل محمد لین لیاری ءَ اُرد اِش کرتگ ۔ مدتے ءَ رند چَہ اُود ءَ ھم  لڈ ءُ بار کرتگ ءُ ریکسر ءَ ھنکین اِش کرتگ ۔ اُستاد دینارزئی 1943عیسائی ءَ ھمے میتگ [ ریکسر کراچی ] ءَ ودی بوتگ ۔ چیزے کلا س ھمد ءَ وانگ ءَ پد گل محمد لین لیاری اسکول ءَ  داں میڈل ءَ در ئِے برتگ ( بزاں 8کلا س ونتگ  ) پد ءَ وانگ یلہ کرتگ ءُ کیاماڑی ءَ مزوری ءَ گلائش بوتگ  ۔ بیست ءُ پنچ سالگی عمر ءَ اُستاد فتح محمد نسکنتی ءِ سوجکاری ءَ ھِندی کلاسیکل زیمر ءِ دربرگ ءُ ھیل کاری بنا ئِے کرتگ ۔ چیزے سال ءِ ھیل زیری ءَ پد وت بلوچی شعرانی سر ءَ ( چوکہ احمد جگر ۔ جی آر ملا ۔ احمد زھیر ءُ دگہ )ترز دیگ ءِ کار ئِے دست ءَ زرتگ  ۔ آئی ءِ اولی ترز احمد جگر ءِ شعر(بیا بیا ترارا اَے جان دل ءَ دار آں ) گوں بلوچی ءِ وشیں زیمرے ءَ مھلوک ءِ دیم ءَ اَتکگ ءُ سک نامدار بوتگ  ۔ آئی ءَ پد دینارزئی ءَ ترزسازی ءُ زیمرساچی ءِ میدان ءَ بے مٹ ءُ بے دروریں پیمے ءَ وتی کار برجاہ داشتگ اَنت ۔ 1969ءَ کوئٹہ ریڈیو ءَ بلوچی مراگشاں بھر زرتگ ءُ پاکستان براڈ کاسٹنگ کارپوریشن ءَ بلوچی ءِ بازیں آواز گوں وتی زیمر ساچی ءُ ترز اں ریکارڈ کنائینتگ ۔ چوش کہ محمد جاڑوک ، فقیر ءُ دگہ لھتیں ۔ پد ءَ سال 1975ءَ کراچی ءِ ریڈیو ءَ بلوچی برنامگانی بھر ءَ زیمرساچی ءَ لوٹائینگ بوتگ آ اُود ءَ ھم  دینار زئی ءَ مدتے گوں کراچی ءِ بلوچی بھر ءِ ریڈیو ءَ ھمکاری کرتگ ۔  مدتے ءَ رند ریڈیو  یلہ کرتگ ءُ کمیں مدتءِ پوریاتگری ءُ مزوری ءَ پد سال 1977ءَ وتی بنکی ملک روایرشتی بلوچستان چابھار ءَ کزک ءِ بندن ءَ رنگ کاری ءِ کار ءَ پہ لاپ کشگ ءَ دزگٹ بوتگ۔ پد ءَ زاھدان ءَ شتگ  ءُ ماشینی (ھوٹل ) روگن بھاکنگ ءِ کار ئِے کرتگ ۔ داں کہ ایرانی سال 1385ھ ش ءَ ایران ءُ عراق ءِ جنگ ءِ دوران ءَ ریڈیو زاھدان ءِ بلوچی مراگاھاں پہ کار ءَ لوٹگ بوت ۔ آ اُود ءَ  دینارزئی  ءَ اھوالکاری ، شنگ کاری ، رجانکاری ، زیمرساچی ءُ گشندھی ءِ پڑ ءِ رندگیری کرتگ ۔ یازدہ سال گوں ایران ریڈیو زاھدان ءِ بلوچی برنامھاں ھمکاری ءُ ھمراھداری ءَ رند ، اَتکگ چابھار ءَ زیمر جاھے پچ کرتگ ۔  اد ءَ وت ءُ تاج محمد طاہرءُ دگہ چندے ادبی ، ھنری ، سنگتانی ھمراھی ءَ زیمرءِ ھیلکاری ءَ گلائش بوتگ داں وتی زند ءِ گڈی روچاں ماں چابھار ءَ  زیمر ءِ ھیلکاری ءُ ترز سازی ءِ کارءَ دیم ءَ بران اَت  ۔ بلوچی ءِ بازیں گوستگیں ءُ نوکین گشنندھاں گوں اُستاد دینارزئی ءِ زیمر ءُ ترزاں نام کش اِتگ ۔ جاڑوک ءَ بہ گرداں نورخان ، عارف ، شاہ جان ،عاصم ، شوکت سفر، شاہ میر سبزل، ءُ دگہ بازینے ءَ وت ءَ گوں دینازئی ءِ ترزاں زیمرینتگ ۔ چَہ دینارزئی ءِ شاگرد ءُ ھیل گروکاں ،محمد علی محمد حسنی کہ انوں وت زیمر ءِ پڑ ءَ مزنیں نامے ءِ ھدا بند اِنت ءُ وشگٹی ءِ پڑ ءَ عبدالباسط چَہ سراوان ءَ ، بابل ھمراز ، وحید اسحاق بلوچ نسب چَہ چابھار ءَ دگہ بازینے اُرد ءُ مزنینے ءَ وت ءَ داں وھدے ءَ گوں نمیرانیں اُستاد غلام رسول دینارزئی ءَ ھمگرنچ کرتگ ۔ اُستاد غلام رسول دینار زئی اے نوبت ءَ بلوچی زبان ءِ چَہ درساں مستریں زیمر زانت ءُ ترزساچ اَت چَہ آئی ءِ بیرانی ءَ پد بلوچی زیمر ءُ زبان یک مزن نامیں زیمر ساچے ءَ زِبھر بوتگ ۔اُستاد غلام رسول دینار زئی ءَ ابید چَہ ترز ساچی ءَ راھگوز ءِ پنام ءَ شعر ھم گوشتگ بلے ھما پڑ کہ آئی ءِ تہ ءَ اُستاد مزن نام ءُ شھزانت اَت آ زیمر اِنت ۔

گیشتر بہ وان…

               چاھبار: بلوچی ساز ءُ زیمل ءِ نامداریں سازگر ءُ گُشندہ اُستاد غلام رسول دینارزئی بیران بیتگ۔۔

گیشتر بہ وان…

روکپتی بلوچستان( اوستمان سائٹ)  انسانی حقانی ادارہ ایچ۔ آر۔ اے۔ این۔ اے ءِ کارندھانی نیمگ  ءَ  شنگ  بیتگیں  رپورٹے  ءِ  ردا محمد صابر رئیسی  یک  ھژدہ سالیگیں  کسانیں  زھگے  کہ  ایرانی  ملایانی  زندان ءَ  بندیں۔ وھدیکہ  آئی  ءِ  عمر  ھپدہ سال بیتگ  آ ایرانی  ملایانی ایجنسی ءِ دست ءَ  دزگیر  کنگ  بیتگ۔ آ  زاھدان ءِ  زندانانی  تھا وڑ وڑیں ٹارچر  کنگ  بیتگ۔  پدا  ایرانی  ملایانی  آمیدگس ءَ  آ گونڈل پنچ سال  ءِ سزا  داتگ،  آ  ایران ءِ باز  دوریں  ھندی  ءَ  دیم  دیگ بیتگ۔ آ  با مشقت ایں زندان ءِ  سزا  دیگ  بیتگ۔ محمد  صابر  پمے  ھاترا  دز گیر  بیتگ  کہ  آئی  ءِ مستریں  برات  عبدالرحمٰن بلوچ  ایرانی  ملایاں  الزام  جتگ  کہ  آ ایرانی  سرکار ءِ  ھلاپ ءَ  سلاہ  بندیں  جُھد ءَ  ھواریں ۔بلے  راستی  ایش  اِنت  کہ عبدالرحمٰن بلوچ ءِ سرا پمیشا  وتگڑیں  بُھتام لڈگ بیتگ  کہ آئی  ءَ سُنی ملا ءُ دگہ طلبی ایں مردمانی  ھلاپ ءَ چاریگری نہ کُتگ۔ بزاں ایران ءَ ھمے کارا  فرماتگ کہ  دلاری بکن بلے  آئی ءَ نہ کُتگ۔ پمیشا  ایران ءِ  ملایاں  وارنٹ کُتگ۔  نو  آ  یاگی ایں۔۔ملایاں آئی ءِ  گونڈلیں برات  گپتگ ءُ  زندان ءَ  کُتگ۔ صابر  انو اردابیل ءِ  صوبہ ءَ  دیم دیگ بیتگ.  اردابیل  ایران ءِ روکپتی شمالی ھندیں  چہ مقبوضہ  بلوچستان ءَ  باز دوریں۔ صابر چہ وانگ ءِ حق ءَ زبھر کنگ بیتگ۔ آئی ءِ گُناہ  بس  ھمیش  اِنت آئی ءِ  برات  چہ ملائی سرکار ءَ  یاگی اِنت۔ آئی ءِ سیاد ءُ وارثاں چہ ملایانی انٹلی جنس ءِ  نیمگ ءَ  بیھار  ھم رستگ  کہ اگاں  عبدالرحمٰن  وتا  ملایانی  دست ءَ مہ  دات ، تا  گُڑا  ما  صابر ءَ کُشیں۔ محمد صابر ایرانی  ملایانی  کستریں  سیاسی زندانیاں  گوں  شُمار  بیت۔۔ آئی  ءِ سیاد ءُ وارثاں اے  ترس  ھم اَستیں کہ ایرانی  مُلا  عبدالرحمٰن ءِ دست نہ  كپگ ءِ سوب ءَ صابر ءَ  شھید کن اَنت۔

گیشتر بہ وان…

چابھار : گوستگیں روچاں ڈنگ ءَ چابھار ءِ جنینانی بازار ءَ یک زرگری دکانے پُل اِتگ ءُ درشتگ اَنت بلے پہ دور روگ ءَ سوبین نہ بوتگ اَنت ۔ زوت ھال رسگ ءِ سبب ءَ  نیرو انتظامیہ دزاں جتک بوتگ ۔ یک دزے ءِ پاد تیر ءَ ٹپی کرتگ ءُ چَہ ھمے سبب ءَ آ لاچار بوتگ اَنت کہ وت ءَ نیرو انتطامیہ ءِ دست ءَ بہ دئے اَنت ۔

گیشتر بہ وان…