اوگانستان : گچینکاریانی تہ ءَ '' اشرف غنی '' چَہ عبداللہ ءَ دیمتر

کابل: اوگانستان ءِ راجی الیکشن کمیشن ءِ گْوشگ اِنت کہ مزن واکی گچینکاریانی دومی باریگ ءِ بنداتی آسر ءَ رِد ءَ اشرف غنی احمدزئی دیم ءَ تر اِنت ۔

الیکشن کمیشن ءِ سروک ءَ دوشمبے ءِ روچ ءَ کابل ءَ پریس کانفرنس ءِ تہ ءَ گچینکاری ءِ آسر ءِ جار جتگ ءُ گْوشتگ کہ اشرف غنی ءَ چَہ کپتگیں ووٹاں 4885888ووٹ رستگ ءُ عبداللہ عبداللہ ءَ 3461639 ووٹ رستگ ۔

بنداتی ھساب ءِ رِد ءَ اشرف غنی ءَ چَہ کپتگیں ووٹاں چل ءُ شش ٹک چار درسد ووٹ گیپتگ وھدے کہ پیشیگیں ڈنی کارانی وزیر عبداللہ عبداللہ ءَ چل ءُ سئے در سد ووٹ رستگ ۔

زانگ بہ بیت کہ پہ سوبمندیں اُمیدوار ءَ المی اِنت کہ آ چَہ پنجاہ درسد ءَ گیشتر ووٹ بہ گیپت ۔

الیکشن کمیشن ءَ گْوشتگ کہ اے ھساب گڈی ءُ الم منگ مہ بیت پرچا کہ گچینکاریانی تہ ءَ بوتگیں جنجالانی سبب ءَ آسر بدل بوت کنت ۔

اوگان مزن واکی گچینکاری ءِ اولی باریگ اپریل ءَ بوتگ اَت آئی ءِ تہ ءَ عبداللہ عبداللہ چَہ درساں دیمتر اَت بلئے آئی چَہ کپتگیں ووٹاں پنجاہ درسد ءَ برز ووٹ نہ گیپتگ اَت پمیشکا گچینکاریانی دومی باریگ چاردہ جون ءَ برجم دارگ بوت ۔

 دوئیں اُمیدواراں گچینکاریانی تہ ءَ گوچلی ءِ بھتام جتگ ۔ عبداللہ عبداللہ ءَ لھتے روچ پیش گوں بی بی سی ءَ گْوشتگ کہ آ وتی بگیری ءَ اُوشتوکیں اُمیدوار ءِ سوبمندی ءَ پہ شرپ من اِیت بلئے اے ھما وھدی بیت کہ اگاں اے ھبر گْواچن بہ بیت کہ گچینکاریانی تہ ءَ گوچلی نہ بوتگ ۔

آئی ءَ گْوشتگ کہ آ چاردہ جون ءَ گوں اشرف غنی ءَ بوتگیں گچینکاری دیم پہ دیمی ءِ تچکیں آسرانی درگت ءَ ھرچ وڑیں گامگیج زور اِیت ۔

آئی ءَ دو ھپتگ پیش گْوشتگ اَت کہ ووٹانی ھساب ءِ کارمھتل کنگ بہ بیت داں وھدے مزنیں کساسے ءَ بوتگیں گوچلیانی بھتامانی پٹ ءُ پول مہ بیت ، آسر منگ نہ بنت ۔

اے درگت ءَ عبداللہ عبداللہ ءِ پلہ مرز زھرشانی ھم کنگ ءَ اَنت ۔