گریشہ : زیارتیانی بس ءِ سر ءَ دیرواگ ءِ اُرش ءَ ھپت نگیگ ' پہ درمان ھسپتال ءَ نپادی

گریشہ ءَ گوں دیرواگاں تْراکینگ بوتگیں بس ءِ وھیل ءَ ھپت زیارتی نگیگیں رنگے ءَ ٹپی اِنت ۔

لیوز ءَ گْوشتگ ٹپی بوتگیں چَہ کوہ ء مراد ءِ زیارت ءَ آیگ ءَ بوتگ اَنت  ، وھدے آھانی بس گریشہ تاب ءِ سر ءَ رستگ ، تْراک بوتگ ۔ چَہ تْراک ءَ بس ءَ دیمی نیم ءَ تاوان رستگ ءُ گوں ڈرائیور ءَ ھپت مردم نگیگیں رنگے ءَ زدگ اِںت کہ پہ درمان ءَ نال ءَ برگ بوتگ اَنت ۔

سوشل میڈیا ءَ شنگ بوتگیں ھالانی رِد ءَ ایف سی ءُ دگہ زورگریں لشکریاں گریشہ ءِ راہ انگیر کُرتگ ءُ ٹپی ھم ابید ء پاکستانی فوج ءِ پرمان ءَ ھسپتال ءَ برگ ءَ نہ اِشتگ اَنت ءُ چَہ آھاں آرمی ءِ نیمگ ءَ کلیرنس سرٹیفکٹ ءِ لوٹ کُرتگ ۔

اے وھیل ءَ پد بلوچ مھلوک ءِ تہ ءَ بے تاھیری یے چست بوتگ ءُ ایشی ءِ پژدر ءَ زورگریں سرکار ءِ پلہ مرزی ءِ شبین ءُ گمان دْرشان کنگ بوگ ءَ اِنت ۔

گریشہ ءِ جاھمنندیں مردمانی گْوشگ اِنت چَہ اے وھیل ءَ پیش پاکستانی زورگریں لشکر ءَ گریشہ ءِ راہ ءُ در بستگ ءُ نشتگ ، چَہ ایشی ءَ پد ھم اے رنگیں تْراک ءِ بوگ جستے پہ آھانی کرد ءَ ۔ بلوچستان ءَ ذگری زیارتیانی سر ءَ چد ءُ پیش چوشیں اُرش نہ بوتگ بلئے لھتے روچ اِنت کہ نہ ایوک زیارتیانی سر ءَ بلکیں بلوچستان ءَ جنین آدمانی سر ءَ ھم تیزاپ پرریچگ ءِ کارپد دیم ءَ آیگ ءَ اَنت کہ ایشانی پشت ءَ مذھبی ٹکانی دست سما بیت بلئے بلوچستان ءِ جاوراں سرپدیں مردمانی گْوشگ اِنت کہ اے کارانی پشت ءَ تیوک مذھبی ٹک نہ اِنت بلکیں زورگریں سرکار ءِ واھگ ھم ھمیش اِنت کہ بلوچستان ءَ مذھبی واک توانمند بہ بنت داں بلوچ زْرمبش ایرماد کنگ بہ بیت ۔