پنجاپ:ڈگار ءِ آپ ءِ سر ءَ فوج ءَ دو دھکان کُشت

پنجاپ: پنجاب ءِ ھنکین اوکاڑہ ءَ پنجاپی فوج ءَ زمینانی ٹھیکہ ءِ سر ءَ  دو دھکان کشت.

دھکانی مُزانی پلہ مرزیں انجمن ءَ اے درگت ءَ گْوشتگ چَہ ھما روچ ءَ کہ فوج ءَ ایکٹرے زمینے ءِ ٹھیکہ ءِ سر ءَ پنچ ھزار کلدار گیش کنگ ءِ شَور کُرتگ دھکان ناوش اَنت.

دھکان ءُ فوجیانی میان ءَ ٹھیکہ ءِ زرانی گیش کنگ ءِ سر ءَ بگیری دیریں ھست اِنت ءُ جیڑہ رُستگ فوجیاں زمین چَہ پیشیگیں دھکاناں پچ گیپتگ ءُ نوکیں مردماں داتگ اَنت چَہ ایشی ءَ پیشیگیں دھکان زھر اَنت.

دو روچ پیش دھکاناں فوجی  چھاؤنی ءِ آپ بند کُرتگ وھدے فوجی پہ آپ ءِ پچ کنگ ءَ شُت اَنت دھکان ءُ فوجیانی میان ءَ جنگ بوت ءُ فوجیاں تیرگْواری کُرت ءُ دو دھکان جاہ پہ جاہ کُشت.

دھکانانی انجمن ءِ سیکریٹری مھرعبدالستار ءَ گْوشتگ ھما زمین ءِ سر ءَ کہ جنگ بوت آ چھاؤنی ءِ زمین اِنت ءُ آئی ءِ چاگرد ءَ چیک پوسٹ ھست.

آئی ءَ گْوشتگ کہ ٹھیکہ ءِ زرانی گیش کنگ ءِ مول ھمیش اَت کہ کْوھنیں دھکاناں چَہ زمیناں زِبھر بہ کن اَنت ءُ فوج وتی دل دوستیں مردماں بہ دئے اَنت اِش . پہ نوکیں دھکانانی دلپروش کنگ ءَ دھکاناں آھانی آپ بند کُرتگ وھدے فوجی سپاھیگ پہ آپ ءِ پچ کنگ ءَ اَتک اَنت مردماں زھرشانی کُرت ءُ فوج ءَ تیر گْواری کُرت ءُ دو دھکان مُرت.

فوج ءَ اے درگت ءَ دھکانی انجمن ءِ راھشونانی سر ءَ فوج ءِ سر ءَ تیر گْواری ءِ بھتام جتگ بلئے اے ھبر ءِ راستی شکی اِنت کہ اے جاوراں فوجی چھاؤنی ءِ تہ ءَ انجمن ءِ راھشونانی سِلاہ برگ ، پہ آسانی منگ بیوکیں ھبرے نہ اِنت.