عراق:کوردستان ءِ نیم وتواجھیں سرکار ءِ پہ آجوئی ءَ ریفرنڈم ءِ جار

عراقی کوردستان ءِ نیم وتواکیں سرکار ءِ مزن واک ءَ  کوردستان ءِ پارلیمان ءَ گْوشتگ کہ آ  پہ آجوئی ریفرنڈم کنگ ءَ ساڑی بہ بیت. 

کوردستان سرکار ءِ مزن واک مسعودبرزانی ءَ  پارلیمان ءَ گْوشتگ کہ آ پہ ریفرنڈم ءَ آزاتیں الیکٹرول کمیشنے جوڑ بہ کنت کہ سرجمیں کوردستان ءَ پہ آجوئی ءَ ریفرنڈم ءِ بندبست بہ کنت.

آئی ءَ گْوشتگ : " اے مارا مھکم کنت ءُ مئے دست ءَ توانمندیں سِلاھے بیت.  " 

آدینگ ءِ روچ ءَ برزانی ءَ پہ بغداد ءَ گْوشتگ کہ کورد کرکوک ءِ واک ءَ یلو نہ کن اَنت ، کرکوک ءَ تیل ءِ چات ھم ھست اَنت .

امریکا ءَ ھم گوں برزانی ءَ گْوشتگ کہ وت ءَ گوں بغداد ءَ ھمگرنچ بہ دار اِت بلئے گْوستگیں آدینگ ءَ گوں جان کیری ءَ بوتگیں نند ءُ گند ءَ برزانی ءَ گْوشتگ کہ اے گمان کنگ سک مشکل اِنت کہ عراق یکجا مان اِیت.

دیر اِنت کہ کوردستان گوں عراقی سرکار ءَ بگیردار اِنت ،گچین کورد سیاستدان پہ کوردستان گیشینتگیں کمیں بجٹ ءَ ھم ناوش اَنت.

بلئے جیڑہ کرکوک ءُ آتراپ ءَ کوردانی واکمندی ءِ گیش بوگ ءَ پد مستر بوت وھدے مالکی سرکار ءَ اے کار دوست نہ کُرت.

چَہ 1990 ءَ پنچ میلون کورد نیم وتکواکیں رنگے ءَ گوں ایمنی ءَ ھاکمی کنگ ءَ اَنت ءُ گْوستگیں ھپتگاں آھاں وتی واکمندی چل در سد گیش کُرتگ ءُ کورد لوٹ اَنت کہ چَہ اے جاور ءَ وتی دیریگیں دستیگ بوتگیں وتواجھی ءَ پچ بہ گر اَنت ءُ پہ راستی کورداں چَہ اے جاوراں شرتریں موہ نہ رس اِیت ھم.