راج جنین آدم ءَ ھرجاہ بہ پھریز اِیت ، آھاں وت پھازی ءِ ھیلکاری بہ دنت ءُ دژمن ءِ چاریگ بہ بیت ' نائلہ قادری

شال :  ورلڈ بلوچ وومنز فورم ءِ مستر پروفیسر نائلہ قادری ءَ چَہ میان اُستمان ءَ لوٹ کُرتگ کہ آ بلوچستان ءَ پہ بلوچ جنین آدمانی کمک ءَ دیم ءَ بہ کنز اِیت کہ چَہ زورگریں ریاست ءِ سکین ءَ تیزاپ پرریچگ ، وانگجاھانی بندش ءُ جنین چکیں نودربرانی بس ءِ سر ءَ وتکش اُرش وڑیں چَہ انسانیت ءَ ڈنیں کارپدانی آماچ اَنت ۔

آئی ءَ گْوشتگ کہ اے بلوچ جنین آدماں چَہ آجوئی ءِ جھد ءَ ھوار بوگ ءَ دارگ ءِ پندل اِنت ، مئے ھزارھاں تنگوئیں بچ  ءُ براتانی بیگواہ کنگ ءُ ژانگولیں لاشانی چگل دیگ ءَ پد ھم بلوچ جھد توانمند بوان بوت  ، پمیشکا جی ایچ کیو ءَ ماں راولپنڈی ءَ بلوچ جنین آدمانی بگیری ءَ سلیں پندلے جوڑ کُرتگ داں آ چَہ وانگ ، روزگار ، چاگردی ءُ سیاسی سرگرمیاں گچینی چَہ آجوئی ءِ زْرمبش ءَ دور دارگ بہ بنت ءُ بلوچستان ءِ سر ءَ پاکستانی زورگری برجاہ دارگ بہ بیت ۔

آئی ءَ گْوشتگ کہ بلوچ ھنکین شال ، مستونگ ، نوشکے ، کلات  ءُ خضدار ءَ یکدْرچ ءَ  تیزاپی اُرش بوتگ چَہ ایشی ءَ یک دوازدہ سالی ئیں جنیں چکے ھم نشانگ بوتگ ۔ بیست ءُ چار ساھتانی تہ ءَ شال ءُ مستونگ ءَ شش جنین آدم تیزاپ پرریچگ ءُ سوچگ بوتگ اَنت ۔

آئی ءَ گْوشتگ پنجگور ءَ جنین چکانی وانگجاھانی بند کنگ  ءُ اُستادانی سر ءَ اُرش ، شال ءَ بلوچ جنین چکیں نودربرانی پُریں بس ءِ گوں بمبا ں تْراکینگ ءُ نو جنین زھگیں نودربراں شھید کنگ ءُ بازینے ءَ ٹپی ، اے کلیں کار چَہ بدنامیں زورگریں ریاستی ادارہ آئی اس آئی ءِ چَہ وتی سیمسراں سر گْوزی اِنت کہ ایشی ءِ دمگ ءِ سر ءَ ھرابیں اسرمندی بنت ، آ وھد دور نہ اِنت  کہ  بیرگری ءِ آس بُن گیپت ءُ چَہ ایشی ءَ دژمن ءِ مات ءُ گھار ھم پھریز نہ بنت ۔ پدریچی کینگ پیداک کنوگ شموشتگ اَنت کہ بلوچستان ھزارھاں میل زر ءَ آ دستیں بنگلہ دیش نہ اِنت اگاں  آس چست بوت گڑا چَہ ایشی ءَ دژمن ءَ تچگ ءَ واھگہ بارڈ ءَ ھم راہ بھر نہ بیت ۔

آئی ءَ گْوشتگ میان اُستمان پہ وھد وتی اسرمندیں کردے پیلو کنان پہ بلوچ جنین آدمانی پھریزگ ءَ توار چست بہ کنت ، تپاکیں راج ءِ سر ءَ زور دیگ بہ بیت کہ آ پاکستان ءِ سر ءَ داں ھما وھد ءَ مالی ءُ سیاسی بندش بہ جنت داں آئی ءِ انسانی حقانی ریکارڈ پلگار مہ بیت ۔

آئی ءَ چَہ بلوچ راج ءَ دزبندی کُرتگ کہ آ اے گْرانیں ساھتاں پریشان مہ بنت بلکیں دژمن ءِ چاریگ بہ بنت ءُ بلوچ جنین آدماں وانگجاھاں ، دگ ءُ بازارانی پجیگ ءَ ھرجاہ چَہ دژمن ءَ بہ پھریز اَنت ءُ آھاں وتی پھریزگ ءِ ھیلکاری بہ دئے اَنت ، بلوچ آجوئی ءِ زْرمبش گوں سرجمیں راج ءِ ھمدستی ءَ اِنت ۔