لوگ ءِ سر ءَ بوتگیں بیڑ ءَ چَہ جھد ءَ پد نہ کنز آں' کریمہ بلوچ

بلوچ اسٹوڈنٹس آزاد ءِ بنجاھی جارکش ءَ گْوشتگ بلوچ جھدکارانی سر ءَ ریاستی زورگرانی بے سببیں اُرش برجاہ اَنت ۔ گْوستگیں روچ ءَ بی ایس او آزاد ءِ وائس چیئرپرسن بانک کریمہ ءِ لوگ ءِ سر ءَ اُرش کنگ ءُ لوگ ءِ مردم ٹپی کنگ بوتگ اَنت ۔

کریمہ بلوچ ءَ اے درگت ءَ ماں ٹیوٹر اکاونٹ گْوشتگ کہ آئی ءِ لوگ ءَ سر ءَ ھپت رند ءَ اُرش بوتگ آ چَہ اے اُرش ءَ وتی جھد ءَ دست کش نہ بیت ۔ سوشل میڈیا ءَ اے  ھال ھم ترگ ءَ اِنت  کہ ایف سی کرنلے ءَ آ فون کُرتگ ءُ بیھار داتگ کہ اگاں آئی ءَ وتی زبان بند نہ کُرتگ گڑا وتی پادانی میار نہ بیت ۔

جارکش ءَ گْوشتگ کہ بی ایس او آزاد یک ایمنیں گلے ءُ گوں ایمنیں راھبنداں جھد کنگ ءَ اِنت بلئے بلوچستان ءَ کہ آ اُود ءَ ھرچ وڑیں مذھبی شدتی گل پہ کار ءَ یلہ اَنت آ اُود ءَ بی ایس او آزاد وڑیں گلانی جھدکار ءُ راھشونانی زندگی ترس ءِ آماچ کنگ بوتگ ۔

بی ایس او ءِ جنرل سیکریٹری رضاجھانگیر شھید ءُ بنجاھی چیئرمین زاھد بلوچ  ءِ آوار جنگ ءَ پد نی زور گریں ریاست یکشل ءَ جھگیر چیئرپرسن بانک کریمہ ءَ نشانگ کنگ ءَ اِنت ۔

گْوستگیں شپ ءَ ماں تمپ ءَ زورگریں لشکر ءَ آئی ءِ لوگ ءِ سر ءَ بیڑ بُرتگ ، مردم لٹ داتگ اَنت ءُ چار مردین دزگیر کُرتگ ءُ گوں وت بُرتگ ءُ سئے ساھت ءَ دارگ ءَ پد یلو کُرتگ اَنت ۔

زانگ بہ بیت کہ چَہ ایشی ءَ پیش ھم بانک کریمہ ءِ لوگ ءِ سر ءَ ایف سی ءَ دو مارٹر گولہ دور داتگ ءُ چَہ ایشی ءَ لوگ ءَ تاوان رستگ ۔

جارکش ءَ گْوشتگ کہ بستگیں شوربندی ءِ پد ءَ  زورگریں ریاست بی ایس او آزاد ءَ نشانگ کنگ ءُ آئی ءَ ھلاس کنگ لوٹ اِیت ۔ دنیگت بی ایس او ءِ سداں جھدکار شھید کنگ ءُ آوار جنگ بوتگ ۔ بی ایس او ءِ چیئرمین زاھد بلوچ ھم آوار جنگ بوتگ ءُ ایشی ءِ بگیری ءَ بی ایس او آزاد زھرشانی کنگ ءَ اِنت ۔

آَئی ءَ گْوشتگ کہ یک ایمنیں گلے ءِ سر ءَ اے رنگیں اُرش پہ آئی ءَ پرایمنیں سیاسی راھاں بندگ اِنت ۔ بی ایس او آزاد ھما راھبنداں کہ پُرایمنیں جھد کنگ ءَ اِنت ایشی ءِ اجازت آئی ءَ میان اُستمانی راھبند دئے اَنت ۔ گلکاری ، وتی لیکو ءِ شنگ کنگ ءُ گپ جنگ ءِ آجوئی ھرکس ءَ ھست ءُ اے سیاسی آجوئیءَ کلیں میان اُستمانی راھبند الم کن اَنت ۔

آئی ءَ گْوشتگ کہ اگاں چیئرپرسن کریمہ بلوچ ءَ چیزے بوت آئی ءِ ذمہ وار زورگریں ریاست اِنت ءُ اے درگت ءَ میان اُستمان ءَ دلگوش گْور کنگ لوٹ اِیت ۔