بازخان مری ءِ لوگ ءَ اُرش ءَ عابد ءُ عبداللہ آوار' سرجمیں بلوچستان ءَ زوگرانی بیڑءُ لُٹ پُل ' بی ایچ آر او

 بلوچ ھیومن رائٹس آرگنائزیشن ءَ وتی روتاکی بیان ءَ گْوشتگ کہ بیست ءُ شش جولائی دو ھزار چاردہ ءَ پولیس ءُ ایف سی ءِ کارمنداں مچ ءَ آپریشن بندات کُرتگ آ اُود ءَ علی شیر کرد ءِ گس ءِ سر ءَ بیڑ بُرتگ ۔

فورسزاں لوگ ءَ کماشیں پت گوں زاھاں مان بستگ ءُ دست دراجی ھم کُرتگ ءُ لوگ ءِ مردم بیھار داتگ اَنت ۔

کوھلو ءِ ھنکیں بوھری ءَ فورسزاں بازخان ءِ مری ءِ لوگ ءِ سر ءَ اُرش کُرتگ ءُ چَہ آ اُود ءَ دزخان ءِ چُک '' عبداللہ '' ءُ ھنبو ءِ چک '' عابد '' لٹ داتگ ءُ بے راھبندی دزگیر کنگ ءَ پد بیگواہ کُرتگ ۔

چَہ ایشاں ابید تربت ءَ کوہ مراد ءِ مزنیں ڈک ءَ ایف سی کارمنداں گوں دموکا جتگیں مردمانی ھمراھی ءَ مردم پٹ اِتگ اَنت ءُ ھمے میان ءَ شاھداد ءِ چک '' دلیپ '' آوار جتگ ۔ جنین آدم ءَ دلیپ برگ ءَ نہ اِشتگ بلئے آھاں جنین آدماں گوں لٹاں جتگ ءُ پہ زور دلیپ گوں وت بُرتگ ۔

بیست ءُ سئے جولائی دوھزار چاردہ ءَ فورسزاں چَہ پنجگور ءِ ھنکیں گرمکان ءَ آپریشن بندات کُرتگ ۔ آپریشن ءِ میان ءَ سرجمیں دمگ انگیر کُرتگ ۔ چادر ءُ چاردیوال ءِ شرپ لگتمال کُرتگ ءُ لوگ ءِ جنین ءُ چُک لٹ داتگ اَنت  ءُ گوں عبدالحق ءِ پجیگ ءَ بازیں دگہ آوار جتگ ۔

فورسزاں پہ زور دکان بند کنگ ءِ بیھار داتگ ءُ ھمروچ دکاندارآزاد دیگ بوگ ءَ اَنت ۔ فورسزاں دمگ ءَ لُٹ پل ھم کُرتگ ، آپریشن ءِ وھد ءَ آزمان ءَ ھیلی کاپٹراں ھم گشت کُرتگ  اے آپریشن ءِ تہ ءَ چَہ بیست ءُ پنچ ءَ برز فوجی گاڑیاں بھر زُرتگ ۔

بلوچ ھیومین رائٹس آرگنائزیشن ءَ گْوشتگ کہ بلوچستان ءَ ھمروچ چَہ آمیدگس ءِ پرمان ءَ ڈن بلوچ پسگ آوار جنگ بنت ءُ رند ءَ آھانی میت ویرانگاں چگل دیگ بنت ۔ سرجمیں بلوچستان ءَ بے میار شکنجہ کنگ ءُ آزار دیگ بنت مردم  پہ لڈگ ءَ لاچار کنگ بو گ ءَ اَنت ۔ میان اُستمانی ادارہ بلوچستان ءِ اے نگیگیں جاورانی سر ءَ بے توار مہ بنت ۔

بلوچ ھیومن رائٹس کونسل ءَ چَہ انسانی حقانی گل ءُ میان اُستمان ءَ دزبندی کُرتگ کہ آ بلوچستان ءِ جاور ءَ بہ چار اَنت ، داں اے کار دارگ بہ بنت ۔