کورستان ءِ آجوئی ءِ پلہ مرزی وشیں پالے ، بید کورد ءُ بلوچانی آجوئی دمگ ایمن نہ بیت'ھیربیار

لندن (پ ر) بلوچ راجدوستیں راھشون ھیربیارمری ءَ چَہ ازرائیلی وزیراعظم بنجامین نیتنیاھو ءِ نیمگ ءَ کوردستان ءِ آجوئی ءِ پلہ مرزی وشیں پالے من اِتگ ءُ گْوشتگ کہ کورد ءُ بلوچ سرجمیں دمگ ءَ لٹ کٹ ءُ لُٹ پُل ءِ آماچ اَنت ۔

میان اُستمانی ءُ دمگی تواناں بلوچ ءُ کوردانی زمین آھانی لوٹ ءِ بگیری ءَ بھر کُرتگ ءُ آ زورگرانی دست ءَ داتگ اَنت پرچا کہ بلوچ ءُ کورد برداشت ءُ رواداری ءُ وتی راجی پجار ءُ ملکی سلامتی ءِ سر ءَ دمگی ءُ میان اُستمانی واکانی ناجائزیں لوٹ ءُ وت مستری ءِ منگ ءَ ساڑی نہ بوتگ اَنت ۔

بلوچستان ھما تیوکیں دمگ اِنت کہ اد ءَ ھندوستان ءِ بھر بوگ ءِ وھد ءَ یک ھندوے ءَ ھم تاوان نہ رستگ ھما وھد ءَ ھندوستان ءُ پاکستان ءَ ھزارھاں مردم کشگ بوگ ءَ اَت بلئے بلوچ راج ءَ بلوچستان ءَ نشتگیں ھندو پھاز اِت اَنت پرچا کہ بلوچستان مذھبی کینگ ءِ جاہ ءَ پہ کلیں مذھبانی منوکاں اوپار ءِ گْوانزگ اَت ۔

ھیربیارمری ءَ گْوشتگ کہ پدا ھم میان اُستمانی ءُ دمگی تواناں بلوچ ءُ کورد بھر کُرتگ ءُ مذھبی کینگدار ءُ بنیادپرستیں راجدوستیں ریاستانی دست ءَ دات اَنت کہ مروچی پہ سرجمیں دنیا ءُ دمگ ءَ سردرد جوڑ اَنت ۔

آئی ءَ گْوشتگ کہ پاکستان ءُ ایران مذھبی کینگ ءِ بنجاہ جوڑ اَنت ءُ اے درس روکپت ءِ ناسوبیں پالیسیانی سبب ءَ بوتگ کہ آھاں کورد ءُ بلوچ سرگوز کُرتگ ءُ پاکستان وڑیں دودیمی ملکانی سر ءَ بھیسہ کُرتگ کہ مروچی وت مذھبی کینگ ءَ روکپت ءِ بگیری ءَ کارمرد کنان سرجمیں دمگ ءَ بے ایمنی ءُ پروشت پُروش ءِ آماچ کنگ ءَ اَنت ۔

پاکستان ءَ وتی دودیمی کرد ءِ سبب ءَ دائم روکپتی ءُ دمگی توانانی لوٹ من اِتگ اَنت بلئے باپشت ءَ گوں وتی چالبازی ءُ پندلی تب ءَ روکپت ءُ دمگی توانانی لوٹانی بگیری ءَ کارکنان  وتی مذھبی کینگ دارپہ آھانی تاوان ءَ کارمرد کُرتگ اَنت ، آھانی کمک ءَ سرجمیں دمگ چَہ ایمنی ءَ  زِبھر کُرتگ ۔

آئی ءَ گْوشتگ وھد ءَ گواچن کُرتگ کہ انچوش کورد مروچی میان رودرتک ءَ مھکمی ءُ ایمنی ءِ مانزمان اِنت ھمے پیم بلوچ ھم مزن ھور ،  میان رودرتک ءُ زرباری ایشیا ءِ دپ ءِ دمگ ءِ مھکمی ءُ ایمنی ءِ مانزمان اِنت ۔ ابید چَہ بلوچ ءُ کوردانی آجوئی ءَ دمگ ءَ مھکمی ءُ ایمنی ءِ واب پدنبوتگیں گپاں شمار بیت ۔

ھیربیار ءَ گْوشتگ کہ بلوچ ءُ کورد ابید چَہ ایشی ءَ کہ مسلمان اَنت چَہ مسلمان ملکانی نیمگ ءَ زورگری ءُ جبراکی ءِ آماچ اَنت ۔ رسانکدر ءُ اسلامی ریاستاں بِھ بلوچانی پلہ مرزی نہ کُرتگ بلئے آھاں دائم بلوچانی بگیری ءَ جابر ءُ زورگریں پاکستان ءُ ایران ءِ پلہ مرزی کُرتگ ءُ مئے دود ءُ ربیدگانی کمرنگ کنگ ءِ جھد کُرتگ ۔

آئی ءَ گْوشتگ کہ ما چَہ آجوئی ءَ پد گوں ازرائیل ءَ ھوار کلیں ملکاں سیاسی ھمگرنچی جوڑ کن اِیں ءُ ذمہ وار ءُ مڑاھداریں ریاستے ءِ پیم ءَ دمگ ءُ دنیا ءِ ایمنی ءُ مھکمیں لوٹ اِیں ۔

ھیربیار ءَ گْوشتگ کہ مروچی آئی اِیس آئی اِیس کہ  گوں مذھبی کینگ ءَ سرجمیں عراق ءَ دستیگ کنان اِنت ءُ یک مزنیں توانے جوڑ بوگ ءَ اِنت باند ءَ پاکستان ءَ ھم پاکستانی فوج ءُ چیریں ادارھانی کمک ءَ مذھبی کینگ داروکیں مردم پاکستانی ایٹم بم ءَ وتی کنٹرول ءَ کُرت کن اَنت ۔

آئی ءَ گْوشتگ چَہ ھما روچ ءَ کہ پاکستان ایٹمی توانے جوڑ بوتگ چَہ ھما روچ ءَ پاکستان پہ سرجمیں دنیا ءَ ترسے جوڑ بوتگ اگر باند ء اے ایٹم بم  پاکستانی فوج ءِ رودینتگیں شدتیانی دست ءَ بہ کپ اِیت گڑا پہ سرجمیں دنیا ءُ دمگ ءَ تباھی کَہ اِت ۔ پمیشکا مھذبیں دنیا ءُ روکپت ءَ اے نیمگ ءَ چَہ ایشی ءَ پیس سما گْور کنگ لوٹ اِیت ءُ اے مذھبی کینگداریں ریاستانی سر ءَ بھیسہ کنگ ءِ بدل ءَ اُوپار ءُ برداشت کنوکیں بلوچ راج پلہ مرزی کنگ لوٹ اِیت ۔