مھران ءِ سردار گچین بوگ وشیں پالے ، زوت راج ءَ تپاکی ءِ وشیں ھالے دئے اِیں

شال : بلوچ ری پبلکن پارٹی ءِ سروک نواب براھمدگ بگٹی ءَ چَہ مری کماشانی نیمگ ءَ نوابزادہ مھران مری ءِ '' مری ٹک ءِ سردار '' گچین کنگ ءِ مرادبادت داتگ ءُ گْوشتگ کہ نواب خیربخش مری ءِ بیرانی ءَ پد بلوچ راج ءُ گچین مری ٹک چکاسی اَدرانی دیمپان بوتگ بلئے مری کماشاں '' نواب مھران مری '' سردار گچین کُرت ءُ وتی داناگی ءُ پھتوئیں راجی سنچ ءِ نشون دات ، پہ اے کاری آ مبارکباد کرز اَنت ۔ 

وتی پریس ریلیز ءِ تہ ءَ نواب براھمدگ بگٹی ءَ گْوشتگ کہ نواب خیربخش مری ءِ بیرانی ءَ ھمے پیم کہ زورگریں ریاست ءُ آئی ءِ کاسگ چٹاں وتی پسندیں مردمے سردار نامینت  ءُ ٹکی ساچ ءِ ھائی جیک کنگ ءُ  ایشی ءَ پہ بلوچ آجوئی ءِ جھد ءِ بگیری ءَ کارمرد کنگ ءِ چن لانچ ءَ اِت اَںت ،اے جاورءَ مری ٹک ءَ نواب مھران مری ھدامرزی نواب خیربخش مری ءِ راستیں جانشین گچین کُرت ءُ مری ٹک ، بلوچ راج ءُ بلوچ راج آجوئی ءِ جھد چَہ مزنیں پندلے ءَ پھریز اِت ۔

بابا مری ءِ بیرانی ءَ پد مری ٹک ءُ بلوچ راج ءَ انچیں راھشونے پکار اَت کہ نہ ایوک مری ٹک ءَ چَہ سست ءُ سید ءُ شنگ ءُ شانگی ءَ بہ دار اِیت ءُ بہ تْرام اِیت بلکیں راجی تک ءَ بابا مری ءِ لیکو ءِ سر ءَ کاربند بہ بیت ، آئی ءِ جھد ءُ مشن ءَ دیم ءَ بہ بارت ۔

نواب براھمدگ بگٹی ءَ مری ٹک ءِ شَور بندی ساڑاتگ ءُ گْوشتگ کہ ما مری ٹک ءِ شَور ءَ شرپ بکش اِیں ءُ گوں نواب مھران مری ءَ ٹکی ءُ راجی تک ءَ ھرچ وڑیں کمک ءِ سَدکی دئے اِیں ۔ بلوچ راج ءَ اے وھدی یکجائی ءُ ھم پتی لوٹ اِیت۔ مارا بلوچ آجوئی ءِ منزل ءَ گوں سوبمندی سر بوگ ءَ وت ما وتی تپاکی پیشدارگ ءُ جھد دیم ءَ برگی اِنت ۔ پہ ایشی ءَ نواب مھران مری ءِ مری ٹک ءِ سردار گچین بوگ  جوانیں گامگیجے ۔

نواب براھمدگ بگٹی ءَ  مزن شھید نواب اکبرخان بگٹی ءُ نواب خیربخش مری ءِ بلوچ راج ءَ سنگل پلیٹ فارم ءِ سر ءَ یکجا کنگ ءِ دَروَر دئیان ءَ گْوشتگ کہ زیت سرجمیں راج ءَ یکیں پتر ءَ یکجا کن ءُ راج ءَ وشیں ھالے دیگ بیت ۔

آئی ءَ اُمیت دْرشانتگ کہ نواب مھران مری  وتی سر ءَ اَتکگیں ٹوھیں ٹکی ءُ راجی ذمہ واریان جوانیں پیمے ءَ پیلو کنت ءُ  پہ راج  ءِ یکجائی  وتی کرد ءَ پیش کنت ۔