ناشرکارانی پاکستانی بنجلاں امریکا بے تاھیر کُرتگ' ایساف کمانڈر

 اوگانستان ءَ ایساف ءِ نامزد کُرتگیں کمانڈر جنرل جون ایف کیمبل ءَ گْوشتگ کہ امریکا پاکستان ءَ ناشرکارانی نِوانیں بنجلانی درگت ءَ بے تاھیر اِنت بلئے پد ءَ ھم امریکا گوں پاکستان ءِ ھمدستی ءَ کار کنت ۔

آئی ءَ امریکی سینٹ ءَ فوجی جیڑھانی سر ءَ گپ جنان ءَ گْوشتگ کہ اگاں من ءَ ایساف ءِ کمانڈر جوڑ کنگ بوت گڑا من پاکستان ءُ اوگانستان ءِ فوجیانی ھمدستی ءَ ناشرکارانی بنجلاںی کم کنگ ءِ جھد کن آں ۔ اے درگت ءَ پاکستان ،اوگانستان ءُ امریکا ءِ میان ءَ گھتریں فوجی ھمکاری ءِ گیش کنگ ءَ جوانیں وھد اِنت ۔

زانگ بہ بیت کہ امریکی مزنواک باراک اوباما ءَ جنرل کیمبل افغنستان ءَ ایساف کمانڈر نامزد کُرتگ ءُ آ سینٹ ءِ آرمڈ سروسز کمیٹی ءِ دیم ءَ پہ وتی نامزدگی ءِ برجم کنگ ءَ پیش بوتگ ۔ اگاں کمیٹی آئی ءِ نامزدگی ءَ بہ من اِیت ، آ ایساف کمانڈر ءِ بستار ءَ کار کنت ۔