ایران ءُ نائیجریا ءِ گوازی بے آسر، پدا ھم شاباش روحانی

تھران:  ایران ءُ نائیجریا ءِ گوازی ھچ پہ ھچ.  بزاں اے گوازی برابر بوتگ بلئے پدا ھم مزن زھرگیں ایرانی سرکار ءِ کماش واجہ حسن روحانی ءَ گْوشتگ:  " شاباش منی بچاں شما جوان گوازی کُرت من شمئے سر ءَ پھر بند آں ".

واجہ حسن روحانی ءَ وتی بے پاگ ءُ بے ملای پشک ءَ اَکسے ھم ٹیوٹر ءَ شنگ کُرتگ ھمے اَکس فیس بک ءَ ھم بھر ءُ تالان اِنت اَکس ءِ تہ ءَ روحانی گوں واب ءِ گداں تیوک ءَ نشتگ ءُ ٹی وی چارگ ءَ اَنت.

اَکس ءِ سر ءَ چَہ ایرانیانی نیمگ ءَ دلچسپ ءُ وشیں چمشانک ھم دیگ بوتگ.

پہ درور:

"  چد ءُ پیش من روحانی اے بُر ءُ پیم ءَ نہ دیستگ. " سمیعہ یکتا

" اگاں اے وھدی احمدی نژاد بوت اِنت گوں سادھیں سیاہ ءُ اسپیتیں ٹی وی ءَ گوازی ئِے چار اِتگ اَت " اے ھبر پہ تژن نویس اِتگ اَنت محبوبہ شاہ نامیں فیس بک کارمرد کنوکی ءَ.

ایران ءَ گوازی بہ بیت یا زند ءِ دگہ پڑ ھزار پابندی ءُ ترس ءَ اَبید ھم سیاسی ھبر پہ تژن ءُ ملنڈ یا تچک ءُ راست گْوشگ بنت ءُ روحانی وَ وَت ھم سوشل میڈیا ءِ آزادی ءِ منوگر اِنت.

ھمے اَکس ءِ چیر ءَ اشکانی عبیدی ءَ نویس اِتگ:  چَہ روحانی ءِ نیمگ ءَ " آزادی یواشکی " روحانی ءَ وتی مید ھم سالونکانی پیم ءَ کُرتگ اَنت. "

فروغ ءَ گْوشتگ:  اولی رند اِنت کہ اسلامی جمھوریہ ءِ واکدارے ءَ وتی  چوشیں ساکم ءُ تاھیریں اَکسے شنگ کُرتگ، باز وش. "

مہ شموش اِت کہ ما گوازی ءِ ھالاں شنگ کنگ ءَ اِیں.