جرمنی ءَ پُرتگال گوں چار ھچ ءَ بُرت

بولی ءِ جھانی جام ءَ گْوستگیں روچ ءَ جرمنی ءُ پُرتگال دیم پہ دیم بوتگ اَنت ءُ گوازی تیزی ءَ بندات بوتگ ءُ پُرتگال ءِ نامی ئیں گوازگر کرسٹینا رونالڈو چوش گروک ءَ پہ پُرتگال  ءِ بول دروازگ ءَ شھم اِت بلئے رونالڈو ءِ زور ءُ شور جرمنی ءِ دیمپانیں گوازیگراں گوں آسانی سگ اِت ءُ زیت گوازی دست ءَ آؤرت ءُ پد ما پد گول جنان کُرت.

گوازی ءِ اولی گول جرمنی ءِ توماس مولر ءَ پینلٹی ءَ جَت ءُ چَہ نیم گوازی ءَ پیش دومی گول ھم توماس مولر ءَ وتی نام ءَ کُرت.  توماس مولر ءَ براھداری ءُ بیداری ءَ گوازی کنان ءَ سیمی گول ھم جت ءُ اے جھانی جام ءَ اولی ھیٹ ٹرک اَت ، بزاں اے گوازی نام ءَ کنگ بیت توماس مولر ءِ.

گوازی توماس مولر ءِ سئے گولانی نام ءَ بلئے رونالڈو کہ بلوچستان ءِ گوازیگر ءُ چاروکانی بامرد اِنت ھم یات کنگ بیت کہ آئی ءِ زْرنگ ءُ تمردی، نام ءُ کار جرمنی ءِ گوازیگرانی دیم ءَ پوڑے بیت ءُ آپ ءَ کپت.

گوازی یات کنگ بیت پہ ٹکرے ءَ کہ پیپے ءَ چَہ زھر ءَ توماس ءَ جت بلئے اے گوکی کارے اَت ءُ ھوڈی یے منگ بوت، پیپے ءِ نام ھالانی تہ ءَ اَتک بلئے چوش کہ آئی ءَ زردکارڈے وارتگ ءُ دربازی بوتگ ءُ گوازی گوں چار ھچ ءَ جرمنی ءَ بُرت کہ پہ پُرتگالی گوازیگراں لجی ھبرے.