دھونی ءَ بھگوان بوگ گْران ءَ کپت

انتپور : کرکٹ ءِ نامداریں ھندوستانی لیبی مھندرسنگھ دھونی ءَ بھگوان بوگ گران ءَ کپت ۔ چوناھیا ءَ ھندوستان ءَ کسمانک ءُ تامرانی تہ ءَ ھندوانی ھدا بزاں بھگوانی کرد کنگ انچائیں ھبرے وَ ایشی ءِ سر ءَ برانز گرگ ھم نہ بیت بلئے وھدے کہ دھونی ءِ پہ بزنس ٹوڈے نامیں تاکے ءَ بھگوان وشنو ءِ کرد ءَ ھکسے شنگ بوت اے پہ آئی ءَ جنجالے جوڑ بوت ۔ ھکس ءِ تہ ءَ بھگوان وشنو بزاں دھونی ءِ ھشت ءِ دستانی تہ ءَ بازیں چی ءُ سامان اَنت ءُ  دستے ءَ چمپل اَنت کہ ھندوانی برانز گرگ سبب جوڑ بوتگ اَنت ءُ آھاں آمیدگس ءَ دھونی ءِ بگیری ءَ کیس کُرتگ کہ آئی ءَ ھندوانی مذھب ایر جتگ ءُ ملنڈ کُرتگ ۔ انتپور ءِ آمیدگس ءَ آ سئے رند ءَ گْوشتگ کہ آمیدگس ءِ دیم ءَ پیش بیت بلئے دھونی پیش نہ بوتگ  پمیشکا آمیدگس ءَ دھونی ءِ دزگیری ءِ پرمان داتگ ءُ پولیس ءَ گْوشتگ کہ داں جولائی ءِ شانزدہ ءَ دھونی آمیدگس ءَ پیش کنگ بہ بیت ۔