28 جون ءَ پاکستانی چیریں زنداناں دزگیرانی جیڑہ ءَ بلوچستان ءَ دربندی بیت' بی این ایم

بلوچ نیشنل موومنٹ ءِ بنجاھی جارکش ءَ  گْوشتگ کہ بیست ءُ ھشت جون ءَ پارٹی ءِ بنجاھی سروک ڈاکٹر دین محمد ءِ آوار ءُ بیگواھی ءَ پنچ سال پُر بیت ۔ چَہ زورگریں ریاست ءِ نیمگ ءَ ڈاکٹر دین محمد ، رمضان بلوچ ، صادق جمالدینی ءُ غفور بلوچ ءِ آوار گْونگیں دزگیری ءَ بازیں سال گْوستگ بلئے انسانی حقانی پھازکاریں گل پاکستانی چیریں ادراھانی سر ءَ پہ ایشانی دَرائی ءَ ھچ رنگیں زور نہ دیگ ءَ اَنت ۔ 

 بی این ایم 28 جون ءِ روچ ءَ ڈاکٹردین محمد، غفور بلوچ ، صادق جمالدینی ءُ رمضان بلوچ ءِ نام ءَ کنت ءُ زورگر ءِ زندان ءَ بندیگیں بلوچانی سر ءَ بیوکیں زور ءُ ناروائیانی بگیری ءَ 28 جون ءَ سرجمیں بلوچستان ءَ دربندی ءِ جار ءَ جنت ۔ 

زیردستیں بلوچستان ءُ چَہ گلزمین ءَ در نشتگیں جھدکار اے درگت ءَ یاتگیری دیوان برجم بہ دار اَنت۔

بنجاھی جارکش ءَ گوں باپاری ءُ دکانداراں دزبندی کُرتگ کہ آ بیگواھیں بلوچانی جیڑہ ءِ پہ میان اُستمان ءِ سرکنگ ءَ بی این ایم ءَ کمک بہ کن اَنت ءُ اے روچ ءَ وتی دکاناں بند بہ کن اَنت ءُ گوں زورگریں ریاست ءَ وتی زھر ءُ کینگ ءَ بہ دْرشان اَنت ۔