مصر ءِ نوکیں قانونی رھبند، ”اُگدہ ءِ واجہ بس اللہ اِنت“، ”زکواه فرض اِنت“، دگہ رھبندانی مان گیجگ ءَ چار ءُ تپاس کنگ بوتگ

بام:  مصر ءِ نوکیں آئینی رھبندانی درگت ءَ ملک ءِ قانونی زانوگر ، مذھبی درسگاہ ”جامعہ ازھر“ ءِ نیمگ ءَ شون داتگیں شور ءُ سلاھانی سرا چار ءُ بچار کنگ ءَ اَنت۔ قاہرہ ءَ نوکیں قانونی رھبندانی ٹھینگ ءَ  زانوگرانی مراگشے برجم دارگ بوتگ۔ مراگشے ءَ نوکیں رھبندانی تھا اللہ تعالیٰ ءِ بستار ءُ بسات ءُ ، نبی ءُ صحابہ آنی شرپ ءِ نگھپانی، زکواه  ءِ فرضیت ءِ سرا چار ءُ بچار کنگ بوتگ۔

مصر ءِ مذھبی دربرجاہ ” جامعہ ازھر“ ءِ نیمگ ءَ داتگیں شور ءُ سلاھانی سرا چار ءُ تپاس کنگ بوتگ۔ نوکیں آئین ءَ اللہ تعالیٰ ءِ ھلاپ ءَ گپ، نبی ءُ صحابہ آنی شرپ ءِ ھلاپ ورزی مستریں جرم نامینگ بنت۔ ھالانی ردا ملایانی گل ”اخوان المسلمین“، دگہ سنی مسلک ءِ باسک ”جامعہ ازھر“ ءِ شور ءُ سلاھانی پلہ مرزی ءَ کنگ ءَ اَنت۔  نوکیں آئین ءَ زکواه اسلام ءِ بنکی رکنے ءِ بستار ءَ ھوار گیجگ بیت۔

نوکیں آئین ءَ اے بابت ءَ ھم چار ءُ تپاس کنگ بوتگ کہ ”اُگدہ ءِ واجہ بس اللہ اِنت“، اللہ ءِ قانونانی تھا دزمانجی کنگ ءِ سزا مرگ اِنت۔۔۔۔ مصر ءَ چہ دگہ سئے ملکاں بس اللہ ءِ قانون نافذ اِنت ءُ بس سئے اسلامی ملکاں اُگدہ ءِ واجہ اللہ تعالیٰ منگ بوتگ، چد ءُ پیش پاکستان ، سعودی عرب ءُ ایران ءَ خدا ءِ قانون نافذ اِنت۔ مئے دعا اِنت کہ مصریانی خدا چہ سعودی عرب، پاکستان ءُ ایران ءِ خداہاں گِھتر بہ بیت ءُاللہ تعالیٰ وت ایشانی خدایاں عقل ءُ ھوش بہ دنت کہ آ انسانی کارانی تھا دزمانجی مہ کن اَنت۔