شال : نوک کاھان ءَ پاکی لشکری ءِ اُرش ' بازیں بے میار لٹ ءُ کٹ

شال : نوک کاھان ءَ کہ غزہ پٹی ءِ نام ءَ ھم نام کپتگ یک رندے پد ءَ پاکستانی لشکریاں اُرش کرتگ ۔ 

ھالانی رِد ءَ سئے شمبے ءِ روچ ءَ فجر ءِ نماز ءِ وھد ءَ پاکستان ریگولر آرمی ، پاکستانی ایجنسی ءُ ایف سی ءَ ھمپتی ءَ نوک کاھان ءِ یک کسانیں پھناتے انگیر کرتگ ءُ تیر گْواری بنا کرتگ چَہ تیرانی تْوار ءَ مردم جاھسر اِتگ اَنت ۔

پاکستانی لشکریاں لوگ یک پہ یک پٹ اِتگ اَنت ءُ گوں چک ءُ جنینانی ناروائی پیش اَتکگ اَنت ۔

لوگ ءِ شرپ ءُ مڑاھاں سرگْوز کنان پاکستانی لشکریاں گْرانھریں چی ءُ سامان ھم پْروشتگ اَنت ۔ 

اے میان ءَ چَہ لوگاں سئے درزن ءَ گیش مردم ڈن ءَ برگ بوتگ ءُ آھانی چم بستگ ءُ آ مُچی مُچی ءَ دگ ءِ کش ءَ نندارینتگ اَنت آھانی تہ ءَ کسانسالیں نودربر ءُ سی سالی ئیں کماش ھم ھوار بوتگ ۔ 

دزگیر کرتگیناں بازیں جست ءُ انچیں مردمانی درگت ءَ جست کنگ بوتگ کہ نوک کاھان ءِ مردماں چد ءُ پیش آھانی نام ھم نہ اِش کرتگ ۔

اُرشیاں جستانی میان ءَ دزگیرانی سر ءَ تپنگ داشتگ ءُ آ کشگ ءِ ھم بیھار داتگ اَنت ۔

زوگریں لشکریانی لگت ، مشت ءُ کنداکانی سبب ءَ بازیں مردم ٹپی بوتگ ،چَہ بازیں جنگ ءَ لھتیانی شانگ ءُ پیشاپ ءِ تہ ءَ ھون ھم اَتکگ ۔

اُرشی دہ گاڑیاں سوار بوتگ اَنت ، دوھاکی ئیں ڈبل ڈور گاڑیاں پاکستان ریگولر آرمی ءِ وردی پوشیں کارنندہ سوار اَت وھدے کہ دو اسپیتیں کروزنگ ، یک اسپیتیں گاڑی یے ءُ یک اسپیتیں کرولاکارے ءَ سادہ گدیں پاکستانی انٹلی جنس ادارھانی مردم سوار بوتگ وھدے کہ چار ھاکی ئیں یک کیبنے لینڈ کروزر گاڑیانی تہ ءَ ایف سی ءِ پوشاک ءَ ایف سی کارنندہ سوار بوتگ ۔ توامیں گاڑی چَہ سرکاری لشکریاں چَکار بوتگ اَنت ۔ اے لشکرکشی داں دو کلاک ءَ برجاہ بوتگ ءُ دو کلاک ءَ پد لشکریاں دزگیر یلہ کرتگ ءُ وتی راہ گیپتگ ۔ اے اولی رند نہ اِنت کہ نوک کاھان ءِ سر ءَ چوشیں اُرش کنگ بوتگ چد ءُ پیش ھم رمضان ءِ ماہ ءَ پاکستانی لشکریاں تراویح ءِ وھد ءَ نمازیانی سر ءَ تیر گْواری کرتگ ۔