شال : پاکستانی گچینکاری لڑ ءِ تہ ءَ لکھاں بلوچانی نام ھوار نہ اِنت ' بی این پی

شال : بلوچستانی نیشنل پارٹی ءَ گچینکاری لڑ ءِ تہ ءَ لکھاں بلوچانی نام ءِ ھوار نہ کنگ ایر جتگ ءُ گْوشتگ کہ اے پہ زور بلوچانی ایرموشی ءَ پندل کنگ بوگ ءَ اِنت یک پندلے کہ بلوچ لوگ شماری ءُ گچینکاری لڑ ءِ تہ ءَ کم پیشدارگ بوگ ءَ اَنت ۔اے بلوچ ءِ کم پیش دارگ ءِ پالیسیانی دْرچ اِنت کہ ھچ رنگ ءَ منگ نہ بیت ۔ آئی ءَ گْوشتگ کہ شال ،چاگی ءُ بلوچستان ءِ دگہ ھنداں پشتون لکھانی ھساب ءَ اوگان درانڈیھاں لڑ ءِ تہ ءَ ھوار کنگ ءَ اَنت ۔ درانڈیھانی نامانی ھوار کنگ ملکی ءُ میان اُستمانی راھبندانی سرگْوز کنگ اِنت ءُ بی این پی ایشی ءِ ایر جنی ءَ ھرجاہ ءَ توار چست کنت ۔

بی این پی ءِ بیان ءِ تہ ءَ اے ھم گْوشگ بوتگ کہ بی این پی یک راجی پارٹی یے کہ پہ بلوچ ءِ لوٹ ءُ گزراں چماں بست نہ کنت ءُ ھچ رنگیں ریابندی ءِ آماچ نہ بیت بلکیں مارا وتی راجی سوت سک دوست بنت ءُ اے مئے راجی ذمہ واری اِنت کہ ما وتی زبان ، دود ءُ ربیدگ ، رسم ءُ روال ءُ گلزمین ءِ پھازگ ءَ جھد بہ کن اِیں ءُ ھچ رنگیں درملکی آبادکاری ءَ مہ من اِیں ۔ بی این پی یک دیمروی دوست ءُ رژناہ پگریں پارٹی یے کہ ھچ راج ءَ گوں کینگ نہ داراِیت ءُ ٹکبندی نہ کنت ۔