شال : بانک کمبرانی ءِ گس ءِ سر ءَ پاکستانی لشکرکشی ءِ ایرجنی ءَ زھرشانی

شال : سردار بھادر خان وومن یونیورسٹی ءِ لیکچرار ءُ نامی ئیں لچہ کار نوشین کمبرانی ءِ لوگ ءِ سر ءَ پاکستانی لشکریانی بیڑ آرگ ، چلوپگکاریں جنین آدم ءَ لٹ کٹ کنگ ءُ آَئی ءِ چک ءِ آوار جنگ ءِ کوشست ءِ ایرجنی ءَ شال پریس کلب ءِ دیم ءَ کمبرانی ٹک ءِ جنین آدماں زھرشانی کرتگ ۔

ھُما کمبرانی ءَ تْران کنان ءَ گْوشتگ کہ بلوچستان ءَ ھچ شرپمندیں مردم چَہ ریاستی دھشت گردی ءَ نہ پھازاِتگ ۔

مئے چاگرد ءِ تہ ءَ جنین آدم ءِ شرپ درور کرز اِیت بلے چَہ گْوستگیں ھپتگ ءَ منی تْری  بانک نوشین کمبرانی ءِ لوگ ءَ بے نمبریں گاڑیاں لھتیں مردم اَتکگ ءُ آ کشگ ءِ بیھار داتگ اِش ءُ زیک اَتکگ اَنت بانک نوشین ءِ کماشیں مات ءَ گوں بدتمیزی کرتگ ءُ آئی ءِ لوگ ءِ چلوپگکاریں جنین آدم جتگ ءُ آوار جنگی کرتگ ۔ 

نوشین کمبرانی چَہ گْوستگیں سئے سال ءَ ادب وانینگ ءَ اِنت زانگ نہ بیت کہ چَہ آئی ءَ آھاں چی تْرس اِنت ما چَہ مزن آمیدگس ءَ دزبندی کن اِیں کہ اے کارپد ءِ پول ءَ بہ کنت ءُ ھرکسی اے کار ءَ دست مان اِنت آئی ءِ ایرموشی ءَ انکوائری کنگ بہ بیت ۔