لندن، بی۔ایس۔او آزاد ءَ سی اگست ءَ عالمی تکاں زھرشانی ءِ تیاری کُتگ۔

بام: بی ۔ ایس ۔ او آزاد ءِ لندن ھنکین ءِ مراگش ، لندن ھنکین ءِ کارمستر جمال ناصر بلوچ ءِ پاگواجہی ءَ برجم دارگ بیتگ۔  بی ۔ ایس ۔ او آزاد ءِ لندن ھنکین ءِ سنگتاں سی اگست ءَ عالمی تکاں بیوکیں زھرشانی ءِ سرا شور ءُ سلاہ کُتگ۔ سی اگست ءَ بی۔ ایس ۔ او آزاد ءُ ”انٹرنیشنل وائس فار بلوچ مسنگ پرسنز‘‘ ءَ گار ءُ بیگواھیں مردمانی بابت ءَ ”عالمی سطح“ ءَ زھرشانی ءِ جار جتگ۔

اے درگت ءَ ماں لندن ءَ مزن وزیر ءِ کارگس ءِ دیم ءَ زھرشانی کنگ بیت۔ مراگش ءَ بی۔ ایس۔ او ءِ پریس سکریٹری نوبت مری ءُ جوائنٹ سکریٹری نیاز بلوچ ءُ لندن ھنکین ءِ دگہ باسکاں  بھر زُرتگ۔ بی۔ ایس۔ او آزاد لندن زون ءَ چہ لندن، آسٹریلیا، کینیڈا، سویڈن ءُ ناروے ءِ جاھمنندیں بلوچاں دزبندی کُتگ کہ آ زھرشانیاں بھر بہ زور اَنت۔ بی۔ ایس۔ او آزاد ءَ بلوچستان ءِ جاھمنندیں کُلیں مھلوک ءَ چہ دزبندی کُتگ کہ آ سی اگست ءَ بلوچستان ءَ دربندیں ھڑتال ءَ بھر بہ زور اَنت۔۔۔

بی۔ ایس۔ او ازاد لندن ھنکین ءِ کارمستر جمال ناصر بلوچ ءَ برجم داشتگیں مراگش ءَ تران کنان ءَ گُشتگ، سی اگست ءَ عالمی سطح ءَ گار ءُ بیگواھیں مردمانی روچ ءِ درگت ءِ دارگ بیت ءُ عالمی سطح ءَ زھرشانی کنگ بیت۔ آئی ءَ چہ کُلیں بلوچ راج ءَ دزبندی کُتگ کہ زھرشانیاں بھر بہ زورنت ءُ وتی بلوچ دوستی ءَ بہ مناریننت۔