بیگواھانی روچ ءَ جرمنی منندیں بلوچ ھم زھرشانی کن اَنت

کولن : جرمنی منندیں بلوچ بیگواھانی میان اُستمانی روچ ءَ کولن ڈوم ءَ زھرشانی کن اَنت ۔ چَہ بلوچ فیرائن ڈوچلینڈ [ بلوچ کمیونٹی جرمنی ] ءِ نیمگ ءَ شنگ بوتگیں پریس ریلیزے ءِ تہ ءَ گْوشگ بوتگ کہ وائس فار بلوچ مسنگ پرسنز ءِ رِد ءَ  چَہ دوازدہ ھزار ءَ برز بلوچ اے وھدی پاکستانی چیریں ادارھانی بندی جاھان اِنت گوں اے بیگواھیں مردماں چَہ انسانی راھبندیں دریں کردگار بوگ ءَ اَنت ءُ چر ایشاں پنچ سد ءَ برز دیم شریتگیں میت دست کپتگ ءُ  ترس اِنت کہ آ دگہ ھم کشگ ءُ چگل دیگ بنت ۔ سی اگست ءَ جرمنی منندیں بلوچ کولن ڈوم ءِ دیم ءَ زھرشانی کن اَنت ۔ زھرشانی ءِ مول میان اُستمانی تک ءِ مردمانی اے نیمگ ءَ دلگوش پرینگ اِنت ۔ چَہ یورپی یونین ، تپاک راجانی گل ءُ امریکہ ءَ لوٹ کنگ بیت کہ پہ بیگواھیں بلوچانی زند ءِ پھریزگ ءَ وتی کردار پیش بہ دار اَنت ۔