راجی تپاکی ھژدری اِنت، راجی جُنز ءِ پروش ورگ ءَ گوں بلوچ ءِ پجار بیگواہ بیت، نواب براھمدگ بگٹی

بام:  بلوچ رھشون ، بی۔آر۔پی ءِ سروک نواب براھمدگ بگٹی ءَ گُشتگ، ھستیں وھد ءَ راجی تپاکی ھژدری اِنت،  مرچیگیں جنز ءِ پروش ورگ ءَ گوں بلوچ راجی پجار ءُ وجود ھم گار ءُ بیگواہ بیت،  شھید نواب اکبر خان بگٹی ءِ سالروچ ءِ درگت ءَ نواب براھمدگ ءَ تران کنان ءَ گُشتگ، راجی آجوئی ءِ ھاترا جھد ءِ برجاہ دارگ مئے فرض جوڑ بیتگ کہ راجی جھد ءِ ھاترا نواب اکبر خان بگٹی ءَ ھوار دگہ بازیں بلوچ کماش ءُ ورناھاں وتی گھگیریں سر ندر کُتگ اَنت۔

نواب براھمدگ بگٹی ءَ نواب اکبرخان بگٹی ھوار سرجمیں شھیدان ءَ سلام دیان ءَ گُشتگ کہ مرچیگیں روچ ءَ ما غم ءُ اندوھانی درنگازی ءِ روچ نہ اِنت، نواب اکبر خان بگٹی دژمن ءَ جسمانی صورت ءَ چہ جتا کُتگ، بلے  اے روچ ءِ یات پہ ما پھر ءُ شان ءِ گپ اِنت کہ ھمے روچ ءَ نواب اکبر خان ءَ  ھچ وڑیں نادراھی ءُ جنجال دیم ءَ نیاؤرتنت ءُ پہ راجی آجوئی ءِ ھاترا وتی تمرد ءُ گھگیریں سر ندر کُت۔ پیریں اکبر خان ءَ گوں وتی ھمراہاں وتی سر دات ءُ بلوچ راج ءَ غلامی ءِ ھلاپ ءَ جنگ کنگ ءُ مِڑگ ءِ نشون دات۔

آئی ءَ گُشتگ بلوچ راج ءَ کماش اکبر خان ءِ لیکہ ءُ فکر ءِ سرا گام جنان ءُ گوں راجی یکوی ءَ راجی جنز دیم ءَ برگی اِنت۔  آئی ءَ گُشتگ دژمن راجی جنز ءِ ھتم کنگ ءَ زلم ءُ زوراکی ءِ آخری سیمسراں سر بوتگ، بلوچ کماش ءُ ورناھانی ٹپ ءُ ٹوریں لاش دیگ بیئگ ءَ اَنت۔ بلوچ راج ءَ راجی آجوئی ءُ راجی پجار ءِ پھازگ ءُ ماں میان استمانی درچاں راجی توار ءِ سر کنگ ءِ ھاترا یکجاہ بیئگی اِنت۔ اگاں ڈژمن مرچیگیں دؤر ءَ راجی آجوئی ءِ جنز ءَ پروش دیگ ءَ سوب مند بہ بیت تہ مرچیگیں جاورھالاں راجی جُنز ءِ پروش ورگ، راجی پجار ءُ وجود ءِ بیگواھی ءِ سوب جوڑ بیت کنت۔