چاردہ اگست ءَ سیاہ روچ ، کسانیں عید گوں سادگی ءَ ' بی این ایم ش ب

کراچی : بلوچ نیشنل موومنٹ ( شھید غلام محمد ) ءِ جارکش ءَ چاردہ اگست یک کھرناکیں غلامی ءِ نام داتگ ءُ گْوشتگ ۔ پاکستان نہ ایوک یک ابرم دریں ریاستے بلکیں ایشی ءِ بنیاد بازیں راجانی تباھی ءِ مز ءَ  اُوشتاتگ ۔ اے ریاست ءِ جوڑ بوگ  برٹش زورگرانی یک پندلے بوتگ اے ریاست ءَ پہ زور بازیں راج وتی پاکستان نامیں زندان ءِ تہ ءَ مان کرتگ ،نہ ایوک کم شرپ کرتگ اَنت بلکیں گوں یک دومی  ءَ گرءُ چیل کرتگ ءُ آھانی میان ءَ کینگ ءُ کست رودم داتگ ۔
آئی ءَ گْوشتگ کہ اے ھم یک دپتری راستی یے کہ چاردہ اگست نوزدہ سد ءُ چل ءُ ھپت ءَ پیش اے دمگ ءَ بلوچ ، سندھی ، پشتون ءُ پنجابی ءِ میان ءَ ھچ رنگیں دلرنجی ءُ اَڑ نہ بوتگ بلکیں راج وتی دپتری ءُ زمین جاوری سیمسراں نشتگ ءُ گوں یک دومی ءَ شیر ءُ شکراِت اَنت ۔
چاردہ اگست ءَ یک شوربستگیں پندلے ءِ پد ءَ ھندوستان ءَ مسلمان ءُ ھندو یک دومی ءِ سر ءَ شور دیگ بوت اَنت ءُ مسلمان چَہ وتی دپتری گلزمین ھندوستان ءَ لڈگ  ءَ لاچار کرتگ اَنت ءُ لکھانی کساس ءَ بلوچ ءُ سندھی ءِ دپتری زمینانی سر ءَ آورتگ ءُ آباد کنگ بوتگ  ءُ چَہ ایشی ءَ بازیں اَڑ ودی بوتگ ۔
پاکستان ملٹری ءُ سول بیوروکریسی کہ برٹش ھندوستان ءِ انگریزانی ھیل داتگین اِت اَنت ءُ برٹش سوتانی پھریزوک ، ھما پاکستان ءِ واھند ءُ واکدار جوڑ کنگ بوت اَنت  ۔ پمیشیکا اے ابرم دریں ملک وتی تچکیں آسر ءَ رسگی اِنت ، اے ایوک زوراکانی کاسگ چٹیں ملکے ایشی ءِ ھلاسی پدر اِنت ۔
جارکش ءَ گْوشتگ کہ اے رنگ ءَ بِھ نہ بیت کہ ملکے شپو ءِ شپ جوڑ بہ بیت بلکیں ریاست کرنانی دپتری دْرچ ءَ پد جوڑ بنت اگاں ریاست لھتیں مردمانی واھگانی پد ءَ جوڑ بوتین اَنت گڑا مروچی گوسلاویہ ، چیکو سلواکیہ ءُ داں سوویت یونین رنگیں مزن واک نہ پُرشتگ اِت اَنت ۔
جارکش ءَ گْوشتگ بلوچ راج آجوئی ءِ زْرمبش ءِ برورد ءَ پاکستان ءِ یک دگہ ایردستیں راج ءُ سک ایردست ءُ جبر آماچ سندھی ءَ ھاٹیگ رستگ کہ آ چہ راجانی زندان ءَ ھمینچک زوت بوت کنت وتا در بہ کنت ۔ دپتر ءِ اے ھبر گیشینوکیں تاب ءُ مانتر ءَ پنجاپی فوج ءُ زور گر دپتر ءَ سیل دیان اے بہ جیڑ اِیت کہ چوش مہ بیت پنجابی زورگر رند ءَ سومیری ءُ عقادی راجانی پیم ءَ ایوک دپتر ءِ تاکاں بے مان اِیت ۔
جارکش ءَ گْوشتگ کہ بلوچ راج زْرمبش انسانی ربیدگ ءُ روالانی شر پ ءَ کنان توامیں راجانی سیمسراں مڑاہ وند اِیت بلے وتی ماتیں گلزمین ءِ یک موردانگ ءِ کساسیں زمین  ءَ ھم یلو نہ کنت ۔
آئی ءَ گْوشتگ کہ چاردہ اگست ءَ بلوچ راج یک شومیں روچے بہ زانت ءُ یاد بہ کنت ءُ بہ دار اِیت داں وھدے بلوچ گلزمیں بلوچستان پاکستانی ریاست ءِ چنگل ءَ اِنت ۔ بلوچ وتی سْرپانی تہ ءَ یکجاھی ءُ تپاکی بیار اَنت ءُ بلوچ راج ءَ آجوئی ءَ منزل ءَ سر بہ کن اَنت ۔
گڈی ءَ جارکش ءَ گوں بلوچ راج ءَ دزبندی کرتگ کہ زورگر ءِ جبر ءُ زوراکیاں کلیں بلوچانی گس ءُ گداناں آسروک کرتگ پمیشکا بلوچ کسانیں عید ءَ گوں سادگی ءَ بہ گْوازین اَنت ۔