چاردہ اگست ءَ میان اُستمانی ٹپاسی پہ پاکستان ءَ بلوچانی زھر ءِ چارگ ءَ بیا اَنت ' ودود رئیسانی

شال : بلوچ ری پبلکن پارٹی ءِ راھشون عبدالودود رئیسانی ءَ وتی بیانے ءِ تہ ءَ گْوشتگ کہ ما میان اُستمانی چار ءُ ٹپاسیاں لوٹوکی کن اِیں کہ آ زور گیپتگیں بلوچستان ءَ بیا اَنت ءُ پاکستان ءِ آزادی ءِ روچ ءَ بلوچ راج ءِ بیزاری ءُ کینگ ءَ چمان ء وت بہ گند اَنت کہ چون بلوچ راج سیاہ روچ دار اِیت ءُ اے سیاہ روچ بلوچ راج ءِ پہ پاکستان ءِ نہ مننگ ءَ ریفرنڈم اِنت کہ چَہ زورگریں پاکستان ءَ بلوچستان ءَ آزاد کنگ لوٹ اَنت ءُ پہ آئی ءَ جھد کنگ ءَ اَنت ۔
آئی ءَ گْوشتگ کہ یازدہ اگست ءَ بلوچاں چَہ انگریزانی دست ءَ بلوچانی آجوئی ءِ روچ داشتگ ، اے گْواچن اِنت کہ بلوچ راج پہ بلوچستان ءِ آزادی ءَ چینکس واھوک ءُ وژدل اِنت ءُ بلوچستان ءِ آجوئی ءِ زْرمبش ایوک یک مردمے ءِ زْرمبش نہ اِنت بلکیں اے کلیں بلوچ راج ءِ زْرمبش اِنت ایشی ءِ تہ ءَ دْرسانی ھونانی دیمونی ھوار اَنت مروچی پاکستانی لشکر وتی بھا زرتگیں لھتیں ڈنی مردمانی کمک ءَ چاردہ اگست ءَ مراگش ایر کنگءُ وتی جند ءَ ریپینگ ءَ اِنت ۔ کینٹ ءُ ایف سی کلاتاں ابید ھچ جاہ ءَ مھلوک اے رنگیں مراگش برجم نہ کنت ۔ ٹینک ءُ تپنگانی ساھگ ءَ زورگریں فوج وتی بیرک ءَ چنڈین اِیت ءُ اے ڈاہ دنت کہ آزادی ءِ لوٹ ایوک لھتیں مردم کنگ ءَ اَنت دگہ دْرس پاکستان ءَ ھمسنگ اَنت اگاں انچوش اِنت گڑا مھلوک پرچا بیرک ءَ چست نہ کنت ، اینکس جبر ءُ سنگینیں انسانی حقانی لگتمالی ءَ پد ھم بلوچ راج پاکستان ءِ آزادی ءِ روچ ءَ سیاہ روچ ءِ نام ءَ دار اِیت ءُ اے ھبر ءَ دْرشان اِیت کہ توری ھمینچک دیمونی دیگ بہ لوٹ اِیت پہ آزاد بلوچستان ءَ دئے  اِیں ۔
عبدالودود رئیسانی ءَ گْوشتگ کہ مروچی بلوچ سرمچاراں چَہ وتی گیدری ءُ دلیری ءَ پاکستانی زورگریں لشکر گنوک کرتگ ۔