شال : بلوچ ھیومین رائٹس زالبول کراچی ءِ ماں آواریں بلوچانی شد گدان ءَ گوں کھولاں ھمدردی

شال :پاکی سرکار ءِ آوارجتگیں بلوچانی دراھی ءَ بستگیں شدھ کشیں ھڑتالی گدان ءَ ھشت سد ءُ چل ءُ ششمی روچ سرجم بوتگ ۔ گوں آوار جتگیں مردمانی کھولاں ھمدردی کنگ ءَ بلوچ ھیومن رائٹس زالبول کراچی ءِ لھتیں جھدکار شدکشیں گدان اَتکگ ۔ آھاں چَہ کراچی ءِ بلوچانی نیمگ ءَ گوں آوارجتگیں مردمانی کھولاں ھمبستگی دْرشانتگ ءُ ھرچ وڑیں کمک  دئیگ ءِ باوری داتگ ۔
آھاں گْوشتگ سنچ نامیں شے یے ھست کہ مارا وتی تہ ءَ ودی کنگی اِنت ءُ انسان بوگ ءِ سبب ءَ پہ راجکاری ءَ ھرچ پڑ ءَ وتی براتانی ھمراھداری ءِ پجیگ ءَ راھشونی ھم کنگی اِنت انچوش کہ دگہ راجانی زالبولاں راج زْرمبش ءِ تہ ءَ کردار پیش کرتگ ءُ اے راستی وتی جاہ ءَ ھست کہ آزادی ءِ جنگ ءِ تہ ءَ بھر زورگ آسان نہ اِنت ۔
وائس فارمسنگ پرسنز ءِ چیئرمین قدیر بلوچ ءَ گْوشتگ بلوچانی درد ءُ رنجیں جاور ءِ سر ءَ بہ گندئے یک سنگدلے وتی اَرساں داشت بہ کنت بلے اے بلوچ راج اِنت کہ سگگ ءُ اُوپار کنان اِنت ۔ پدا ھم ما بے وس ءُ غلامیں بلوچاں پہ گلزمین ءَ سرمتابی ءِ راہ زُرتگ ءُ پہ غلامی ءِ سانکلاں چَہ گردن ءَ کشگ ءَ ھروھد ءَ ساڑی اِنت ۔
آئی ءَ گْوشتگ کہ پاکستانی چیف جسٹس ھرچ پیم آوار جتگیں بلوچانی کھولانی توار ءَ نگٹ کنگ ءِ جھد ءَ اِنت ءُ سرپوستی ایف سی ءُ چیریں اداراھانی اے  کارپد ڈسگ ءِ ھبر ءَ کنگ ءَ اِنت ءُ چَہ وتی بیاناں بلوچ چکچین کنگ ءِ کارپدانی میان اُستمانی تک ءَ دلگوشی ءِ دارگ ءِ جھد  ءَ اِنت ءُ بلوچ مات دلوارگ ءَ اَنت کہ مئے بچ پرچا مرگ ءَ اَنت ۔ بلوچستان ءَ ھمروچ  دست کپوکیں دیم شریتگیں میت ءُ شھادت ریاستی جبر ءِ گْواچن اَنت ۔