نہ گیگیں جاوراں بلوچ جنین سرپچیں سیاست ءَ بھر بہ زور اَنت ' بانک ھوران

شال : بلوچ ری پبلکن پارٹی شال ھنکین ءِ ترامکار بانک ھوران بلوچ ءَ گْوشتگ کہ ما بلوچ جنین گوں سنجداری ءَ آزادی ءِ جھد ءَ لوگ لوگ ءَ سر بہ کن اِیں ءُ وتی براتانی ھم کوپگی ءَ جھد کنان دنیا ءِ دگہ آزادی پسندیں جنینانی رنگ ءَ دپتر ءِ بھر جوڑ بہ بئے اِیں ۔ اے نہ گیگیں جاوراں بلوچ جنین سرپچیں سیاست بہ کن اَنت ءُ وتی جھد ءِ تہ ءَ تیزی بیار اَنت ۔

آئی ءَ گْوشتگ جنین آدم جاورانی پد ءَ وتی جھد ءَ دیم ءَ بہ بر اَنت راج آجوئی ءِ جنگ ءَ وتی تہ ءَ ھمت ءُ جوزگ ودی کنگ لوٹ اِیت ۔ راجی جنگ ءَ بھر زورگ آسانیں کارے نہ اِنت ایشی ءِ تہ ءَ جنجال ءُ شکنجھانی [ تشدد ءِ] دیمپانی کنگی بیت بلے جاور چوناھیں ھم بہ بنت ایشی ءِ مراد اے نہ اِنت کہ ما دست ءَ سر ءِ چیر ءَ کن ءُ بے وپس اِیں کہ جنجال باز اَنت ھچ مہ کن اِیں ما جنین اِیں نزور اِیں ، ند [ قلم ] چست کرت نہ کن اِیں ، تپنگ چست کرت نہ کن اِیں ، جنگ ءِ مڑگ مردینانی کاراِنت مئے ناں ، اے ھچ رنگیں بھانہ نہ اَنت ۔ مارا باز کار کنگی اِنت ، مارا چی کنگی اِنت ؟ ایشی ءِ ھبربندی مروچی بہ بیت گھتر اِنت اگاں ناں دپتر مارا پھل نہ کنت ۔