ایرانی جھداں بے سوب کرت کن اِیں ' امریکہ / سپاہ نہ ترس اِیت 'ایران

ھالرسان رویٹرز ءِ رِد ءَ پانیٹا ءَ گْوشتگ '' ایران ءِ راھشون باید بہ زان اَنت کہ امریکہ ءُ میان اُستمان پہ بوجیگانی راہ ءِ بندگ ءَ بوتگیں ھرچ رنگیں کارپد ءَ ایران ءِ ڈس اَنت توری آ وت بہ کنت یا آئی ءِ ھمدست ءُ پلہ مرز۔''

پانیٹا ءَ گْوشتگ '' امریکہ سرجمی ءَ پہ ھرچ رنگیں دیم پہ دیمی ءَ کہ آ اُود ءَ گمان اِنت  بہ بیت ساڑی اِنت '' ءُ دیمتر ءَ گْوشتگ '' مئے وس ءَ اِنت ، ما  پہ بوجیگانی راہ ءِ بندگ ءِ ایران ءِ شوھاز ءُ گامگیجاں پُروش دات  بہ کن اِیں ۔''

ایران ءُ امریکہ ءِ نیام ءَ چَہ ایران ءِ سر ءَ امریکہ ءُ ھمدستیں ملکانی نیمگ ءَ باپاری ءُ مالی پابندی جنگ ءَ پد دپ جنگی گیش بوتگ ۔ 

ھپدہ جولائی ءَ سپاہ ء پاسداران انقلاب ءِ ڈپٹی کمانڈر میجر حسین سلامی ءَ مشھد ءَ بوتگیں یک دیوانے ءِ تہ ءَ ھم بیھار ءُ ڈاہ داتگ کہ '' امریکہ ءِ چَہ جنگی گُراباں باریں آپی بیڑہ سپاہ ء پاسداران انقلاب ءِ چماں ایوک آسنی بھر اَنت ءُ مارا چَہ دمگ ءِ ڈن ءِ واکانی اے دمگ ءِ تہ ءَ لشکرکشی ءِ ھچ تُرس نیست ۔'' سلامی ءَ اے ھم گْوشتگ '' سپاہ ءَ چَہ آپی ''گُرابانی مزنی ءَ نہ ترس اِیت پرچا کہ آ ھمینچک مستر بنت آھانی نشانگ کنگ ھمینچک آسان بیت ۔