آروارا : امریکای سیمناے ءِ سر ءَ تیرگْواری ' دوازدہ مُرتگ پنجاہ ءُ نوٹپی' بیرک سرجھل

 آرورا : امریکہ ءِ ریاست کولوراڈو ءِ شھر ءَ یک سیمناے ءِ سر ءَ تیرگْواری ءَ دوازدہ مرتگ ءُ پنجاہ ءُ نو ٹپی بوتگ ۔ ھالانی رِد ءَ گیس ماسک دیم ءَ بستگیں مردمے سینما ھال ءِ تہ ءَ پترتگ ءُ اَرس ریچیں گیس چگل دئیگ ءَ پد تیر گّواری  ئِے کرتگ ۔ آ وھدی مردم نوک اَتکگیں انگریزی تامر بیٹ مین ءَ چارگ ءَ بوتگ اَنت ۔
لھتیں تامر چاروک بیٹ مین ءِ تامری کارستانی پوشاکانی تہ ءَ بوتگ ءُ تیر گْواری کنوک ھم بیٹ مین ءَ گوں کنتی ئیں کارست '' جوکر '' ءِ پوشاکاں بوتگ ءُ آئی ءَ مردمانی سر ءَ دوازدہ رگبار جتگ۔
اے رِد ءَ پولیس ءَ  جیمز ھومز نامیں یک بیست ءُ چارسالی نودربرے چَہ سیمنا ھال ءَ ڈن دزگیر کرتگ چَہ آئی ءَ رائفلے، شاٹ گنے ءُ دو پستول دست کپتگ ۔
نیویارک پولیس کمشنر ریمنڈ کیلی ءَ گْوشتگ کہ ملامکار ءَ وتی مود سھر کرتگ اِت اَنت ءُ وتا تامری کارست ''جوکر'' گْوشتگ  کہ بیٹمین تامر ءِ تہ ءَ بیٹمین ءِ دژمن اِنت ۔
صدر اوباما ءَ اے ھال ءِ رسگ ءَ پد وتی گچینکاری سرگرمی مھتل داشتگ اَنت ءُ ملک ءِ بیرک ءِ سرءِ جھل کنگ ءِ پرمان داتگ۔