امریکا ءِ اولی آزمان گولیں جنک مُرتگ

کیلیفورنیا:امریکا ءِ اولی آزمان گولیں جنک مُرتگ۔ھالانی ردا امریکی آزمان گول(خلاءباز)”سیلی رائڈ” ءِ عمر شست ءُ یک سال ءِ سیمسراں بیتگ کہ آ کینسر ءِ آماچ بوتگ کہ مرچی ماں امریکی استان کیلیفورنیا ءَ بیران بیتگ۔ سیلی رائڈ نوزدہ صد ءُ ھشتاد ءُ سئے ءَ آسمان ءِ سفر ءَ در کپتگ ءُ خلاء ءَ سر بیتگ۔ چوناھا آزمان گندیں اولی بانک سوویت یونین ءِ ”ویلنتینا تیریسکووا” اِنت کہ آئی ءَ خلاء ءَ درستاں چہ پیش نوزدہ صد ءُ شست ءُ سئے ءَ  سفر جتگ۔ وھدیکہ ماں امریکا ءَ اولی آزمان گول (خلاء باز) بانک ”سیلی رائڈ” بوتگ۔

سیلی رائڈ امریکا ءِ استان ”کیلی فورنیا” ءَ ودی بوتگ۔ آئی ءَ کیلی فورنیا ءِ ”سٹینفورڈ یونیورسٹی” ءَ طبیعیات ءَ ماسٹر ءِ ڈگری گیپتگ۔

”سیلی رائڈ فاؤنڈیشن” ءِ ردا سیلی نہ تھنا امریکی اولی آزمان گول اِنت بلکیں کستریں امریکی جاھنند اِنت کہ آئی ءَ سی دو سال ءِ عمر ءَ ”خلائی مدار” گول اِتگ۔

دومی نیمگ ءَ امریکی صدر ”بارک اوباما” ءَ سیلی رائڈ ءِ مرگ ءِ سرا دلپدردی درشان کنان ءَ گُشتگ کہ سیلی اولی جنک اِنت کہ خلاء ءَ شُتگ ، آ پہ امریکیاں مزنیں شان ءُ شرپے ءِ واھند اِنت۔