بلوچستان ھمے کرن ءَ چَہ پاکستان ءِ غلامی ءَ آزاد بیت ‘ بلوچ بابا

گوادر : بلوچ بابا خیربخش ءَ گْوشتگ کہ دنیا ءِ نکش ءِ تہ ءَ پاکستان ءِ ھستی ءِ سبب امریکہ ءِ کمک اِنت ۔ اگاں امریکہ وتی پوڑیاں بند بہ کنت اے ھفتگے ءِ تہ ءَ چَہ دنیا ءِ نکش ءَ گار بیت ۔ نوں اے بستگ گوں امریکہ ءَ کہ پاکستان ءَ داں دگہ سالے زندگ دار اِیت یا یک ھزار سال ءَ ۔

بلوچاں وتی ٹک ءُ بولکانی جھگیر ءُ سرھیل بوگ ءِ بدل ءَ یک راجے جوڑ بوگ لوٹ اِیت ۔ بلوچ راج ءَ گوں بلوچ راجی پجار چَہ پاکستان ءِ غلامی ءَ آجوبوگی اِنت انچوش کہ دنیا ءِ نکش گوں تیزی ءَ بدل بوان اِنت ۔ من یک ءُ ٹک ءَ گْوشت نہ کن اِیں کہ بلوچچ چَہ پاکستان ءِ غلامی ءَ کدی چُٹ اِیت بلے اے گوں ستک ءُ باور گْوشت کن اِیں کہ بلوچستان ھمے کرن ءَ یک آزادیں ملکے بیت ۔

بلوچ بابا خیربخش ءَ اے ھیال چَہ گوادر ءَ سیادی داروکیں یک اھوالکارے ءَ ماں وتی کراچی ءِ بندر ءَ گلگدار کنان ءَ دْرشانتگ اَنت۔

بابا ءَ گْوشتگ بلوچستان چَہ ابرمی مڈیاں سیر اِنت بلے چَہ پاکستان ءِ زورگری ءِ سبب ءَ پہ زور سنگ ءِ دور ءَ زند گْوازینگ ءَ لاچار کنگ بوتگ ۔آئی ءَ گْوشتگ کہ پہ بلوچ ءَ داں وھدے یک سیرءُ آسیدگیں بانداتے بوت نہ کنت کہ چَہ پاکستان ءَ وتی آجوئی ءَ پچ مہ گیپت ۔

بابا ءَ گْوشتگ کہ پاکستان یک ابرمی راھبنداں دریں ریاستے ءُ ایشی ءَ باندات نیست ۔ آئی ءَ دیمتر ءَ گْوشتگ :'' اے ماں دنیا ءِ نکش ءِ تہ ءَ چَہ امریکہ ءِ کمک ءَ زندگ اِنت وھدے کہ امریکہ پہ اے ملک ءَ وتی پوڑی ءُ پنڈگ ءَ بند بہ کنت اے گیشتر اے دنیا ءِ نکش ءِ تہ ءَ نہ مان اِیت ۔ پاکستاں ناں اُستمانی [ جمھوری ] ملکے نہ اد ءَ اُستمانی راھبند ھست اَنت ۔''

چَہ ھندوستان ءَ گستا بوگ ءَ گر داں انوں اے چَہ ابرمی راھبنداں دریں ملکے [ غیرفطری ملک ] ایشی ءِ راستیں ھاکم فوجی جنرل اَنت ءُ اے داں مروچیگ ءَ اے ملک ءِ سر ءَ واجھی کنگ ءَ اَنت ۔ یک جستے ءَ پسو کنان بابا ءَ گْوشتگ '' توری پاکستان ءِ سیاسی گل بہ بنت ، مذھبی یا بے مذھب درس فوج ءِ جوڑ کرتگین اَنت ۔ آ اے پارٹیاں جوڑ کن اَنت ءُ پروش اَنت ، اے جنرل ھم امریکہ ءِ غلام اَنت ۔

دگہ جستے ءَ پسو کنان بابا ءَ گْوشتگ کہ اے ریاست ءِ گچینکاریاں [ الیکشناں ] بھرزورگ پہ بلوچ ءَ ابید چَہ وھد زوالے ءَ دگہ ھچے نہ اِنت '' ایوک لھتیں وتی لاپ چاریں سیاستدان پہ زر کٹگ ءُ وتی پاگ ءِ چوڑ ءِ برز کنگ ءَ گچینکاری ءِ سیاست ءَ کنگ ءَ اَنت آ بلوچ ءَ ھچ نہ دئے اَنت ۔''

بابا ءَ گْوشتگ کہ :'' ھما کہ گْوش اَنت پارلیمانی سیاست بلوچ ءَ گھتریں بانداتے دات کنت ، آ بلوچ ءَ کمک بہ کن اَنت مارا ایرادے نیست ۔ ما چپ اِیں ءُ پہ آھاں ھچ نہ گْوش اِیں البت گپے کہ ما گْوش اِیں اِیش اِنت کہ بلوچ ءَ پاکستان ءِ تہ ءَ ھچ باندات نیست ''