دمشق : فھدجاسم الفرید نوکیں پھازکاری وزیر جوڑ

دمشق : سوریہ [ شام ] ءِ سرکاری ءِ ٹی وی ءِ رِد ءَ فھد جاسم الفرید سوریہ ءِ نوکیں پھازکاری وزیر جوڑ کنگ بوتگ ۔ سوریہ ءِ گْوستگیں پھازکاری وزیرجنرل دائود راجہ گوں کمک پھازکاری وزیرجنرل آصف شوکت ءُ کرائسز مینیجمنٹ ءِ سروک جنرل حسن ترکمانی بنجاھی شھر دمشق ءَ وزیرانی یک دیوانے ءِ تہ ءَ بوتگیں وتکش تْراک مرتگ ۔ سوریہ بشارسرکار ءِ دیم ءَ یاگیاں  شُور گیپتگ یاگی ملک ءِ تہ ءَ بشار ءِ پت پیرکی سرکار ءِ بدل ءَ اُستمانی سرکار ءِ واھوک اَنت ۔ بشار سرکار ءَ ھمگرنچیں مردم شیعہ ءُ یاگی گیشتر گوں سنی مذھب ءَ ھمبستگی دار اَنت ۔ یاگیاں گْوستگیں روچاں سوریہ ءِ    

بنجاھی شھر دمشق انگیر کرتگ ءُ تْرندیں اُرشانی بیھار داتگ اَت ۔  اے چَہ یاگیانی نیمگ ءَ دُرساں مستریں تاوان  کہ بشار سرکار ءَ دئیگ بوتگ ۔

العربیہ ءُ سی این این اے ھالانی رِد ءَ تْراک کنوک سوریہ پھازکاری وزیر ءِ سرکاری نگھوان بوتگ ، چَہ اے جاوراں ھمے پدر اِنت کہ بشار سرکار نوں چَہ تہ ءَ رِمیزاں وارتگ ءُ آئی ءِ سرکاری واک ءِ کلات زوت شکوندیم بوگی اِنت بلے سوریہ سرکار ءُ آئی ءِ پلہ مرز ھمے گْوشگ اَنت کہ آھاں یاگیانی لشکر سْرین پُروش کرتگ ءُ دمشق ءَ بوتگیں اُرش سوبمند نہ بوتگ ۔ سوریہ ءِ سرکار ءَ یک گْورے پھازکاری وزیر ءِ مرگ ھال ھم دروگ ڈس اِتگ بلے چندیں اَداراں پد نہ ایوک نوکیں پھازکاری وزیر ءِ گچین کنگ ءِ ھال شنگ کرتگ بلکیں کمک وزیر جنرل آصف شوکت ءِ مرگ ءِ ھال ھم داتگ ۔