بلوچ چکچینی گامگیج ھرگْور ءَ تالان ، مستونگ ءَ اُرش گوادر ءَ ھپت آوار ' بی ایچ آر

شال : بلوچ ھیومین رائٹس آرگنائزیشن ءِ جارکش ءَ گْوشتگ کہ ریاست ءَ  بلوچ چکچینی گامگیج گیش ءُ ھر گْور ءَ تالان کُرتگ ۔ بلوچ درانڈیھانی کیمپ ءَ پراری کمیپ ڈسگ ءُ آھانی سر ءَ مزنیں کساسے ءَ فوجی لشکرکشی بنا کنگ بوتگ ۔ چَہ ریاستی لشکرکشی ءَ مزنیں کساسے ءَ جانی ءُ مالی تاوان ءِ گمان اِنت ۔ چَہ ایشی ءَ پیش ھم آھانی سر ءَ لشکرکشی کنگ بوتگ پمیشکا مروچی آ درپہ دری ءِ زندگْوازینگ ءَ لاچار اَنت ۔ گْوستگیں روچاں پاکستانی لشکریاں ڈیرہ بگٹی ءُ راجن پور ءِ سیمسراں اُرش کرتگ ءُ موالی ء قیصر بگٹی ءُ گھانڑا ء کھرگی بگٹی شھید ءُ شش ٹپی کنگ ءَ پد دزگیر کرتگ ءُ گوں وت برتگ اَنت۔ بلوچستان ءَ پد سندھ ءُ پنجاب ءَ ھم بلوچانی سر ءَ لشکرکشی تیز کنگ بوتگ ۔ چَہ ڈیرہ بگٹی ءُ آئی ءِ ھمگْوریں دمگاں لڈ اِتگیں بگٹی درانڈیھ سندھ ءُ پنجاب ءَ ھم ریاستی لشکرکشی ءِ دیمپان اَنت ۔ بلوچ درانڈیھانی گدانانی سر ءَ یکشل ءَ بوتگیں ریاستی لکشر کشی ءَ درانڈیھ ئیں مردم ترس ءُ بیم ءِ آماچ اَنت وھدے کہ بازیں آوار جنگ ءَ پد کشگ ءُ چگل دئیگ بوتگ ۔
گْوستگیں روچاں مستونگ ءِ ھند اسپلنجی  ءُ گوادر ءُ پسنی ءِ میان ءَ نلینٹ ءَ  ریاستی لشکریاں اُرش کرتگ ءُ چَہ ھپت ءَ برز بلوچ پسگ دزگیر کنگ ءَ پد وتی چیریں بنجلاں برتگ ءُ آھانی درگت ءَ ھچ مالومداری نہ دئیگ ءَ اَنت وھدے کہ آبادیانی سر ءَ ھم بم گْواری کُرتگ اِش ءُ لوگ ءُ دلوت تاوان داتگ اَنت ۔
بلوچ ھیومن رائٹس آرگنائزیشن ءَ گْوشتگ کہ بلوچستان ءَ ھچ جاہ ءَ انسانی حقانی ھیالداری نہ بوگ ءَ اِنت ءُ ریاستی دھشت گردی روچ پہ روچ گیشتر بوان اِنت کہ یک پریشانی ھبرے ۔
آَئی ءَ لوٹ کرتگ کہ ایف سی ءُ پاکستانی دگہ ادارہ پاکستانی عدالت ءِ تہ ءَ پہ لس مردمانی ریپنگ ءَ  دروگ بُرگ ءَ اَنت  اے رنگیں نہ گیگیں جاوراں  یواین ءِ پجیگ ءَ توامیں انسانی حقانی گل ءُ میان اُستمانی میڈیا بلوچستان ءِ سر ءَ بوتگیں ریاستی جبر ءُ زوراکیانی دارگ ءَ وتی ذمہ واری ءَ پیلو بہ کن اَنت ۔