ایران ءِ جوھری سلاھدار بوگ ءَ دوسال پشت کپتگ' سروک ایم سیکسٹین

اے ھبر آئی ءَ سد ءِ نزیک ءَ جم بوتگیں مزنیں سرکاری کارمندانی دیوانے ءَ جتگ اَنت ۔ نیویارک ٹائمز ءَ ھمے شنگ بوتگیں ھال ءِ درور دیان نوشتگ کہ ھال ایران ارادگ ءُ بودشت ءِ باندات ءَ یک مزنیں مانگیش اِتگیں جیڑھے ءِ تہ ءَ دور کنگ اِنت کہ آئی ءِ گمان ءُ کیاس مزنیں کساس ءَ دگری کن  اَنت ۔امریکہ ءِ چاروگاں دوھزار ھپت ءَ اے بیان داتگ کہ راستی ءَ ایران ءَ پہ جوھری بم جوڑ کنگ ءِ تکنیک ءِ سر ءَ پٹ ءُ پول دوھزار سئے ءَ وھیل داتگ ءُ پہ جوھری بم جوڑ کنگ ءَ پکاریں گڈی گامگیج زورگ ءِ شور نہ بستگ بلے برٹش ءُ ازرائیل ءَ گوں بے تاھیری ھمے زور داتگ کہ جوھری بم جوڑ کنگ ءِ بودشت پیدا کنگ ءِ کار ءِ دیم ءَ برگ ءِ شوربندی بوتگ ۔ سرجان ءَ اے ھبر ھم دیم ءَ آورتگ کہ برٹش انٹلی جنس ءَ دوھزار ھشت ءِ بندات ءَ پہ جوھری تکنیک ءَ رسگ ءَ ایران ءِ گامگیج داشتگ اَنت ۔ یک برٹش سرکاری کارمندے ءَ وتی ادارھانی راھبندانی سبب ءَ نام نہ گْوشگ ءِ ڈک ءَ گوں روتاک ءَ گْوشتگ کہ ''سر جان گوں سرکاری کارمنداں یک سروکانی مراگاھے ءَ ھبر ءَ بوتگ ءُ ھرچی کہ آئی ءَ گْوشتگ ھما بوتگ اَنت کہ چد ءُ پیش دگراں گْوشتگ اَنت ۔''

روتاک ٹیلی گراف ءِ رِد ءَ چَہ ایم سیکسٹین ءِ سروکے ءِ اُگدہ ءَ نندگ ءِ وھد دوھزار نو ءَ بہ گر داں انوں ایران  ءِ جوھری مول ءُ مرامانی درگت ءَ سر جان ءِ اے اولی لس بیان اِنت ۔آئی ءَ گْوشتگ'' ایران ءِ جوھری سلاھداریں ریاست جوڑ بوگ ءَ دوسال پشت کپتگ ۔'' دی ڈیلی ٹیلی گراف ءَ اھوال داتگ کہ اگاں ایران ھمے جاہ ءَ سر اِنت گڑا امریکہ ءُ ازرائیل ءَ آئی ءِ سر ءَ اُرش کنگ ءِ ھبر سندگ لوٹ اِیت ۔

 ایرانی گوں مھکمی ارادگاں ھمے کشک ءَ دورتر روان اَنت داں پہ سلاہ جوڑ کنگ ءَ کلکیں تک ءُ پھناتاں زانتکار بہ بنت ، توامیں تکنیکاں بلد کہ پہ جوھری بم ءَ پکار اِنت ۔آئی ءَ گْوشتگ اے ھبر پدر اِنت کہ ایران ءُ ازرائیل یک مزنیں بیمناکیں ایرانے ءَ گوں دیمپان بنت وھدے کہ آ جوھری سلاھداریں ریاستے بیت ۔ایران گْوش اِیت کہ آئی ءِ جوھری برنامہ پہ ایمنیں کاراں جوڑ کنگ بوتگ بلے ھمے گندگ بوگ ءَ اِنت کہ تھران جوھری سلاہ جوڑ کنگ ءِ بودشت ءِ شوھاز ءَ اِنت ۔ امریکہ ءُ آئی ءِ ھمدستیں ملکاں ھمے ماہ ءَ ایران ءِ سر ءَ ترندگریں مالی بندش جتگ ھمے پیم سفارتکاری جھد برجاہ اِنت کہ ایران جوھری سلاہ جوڑ کنگ ءِ نیمگ ءَ وتی گاماں بہ دار اِیت ۔ سرجان ءَ گْوشتگ کہ اے گوں برٹش انٹلی جنس ءَ بستگ کہ '' آ بیمناکیں اَدار ءَ دور بہ دار اِیت کہ سیاسدان چَہ یک جوھری سلاھدرایں ایران ءِ منگ ءُ گور آئی ءَ جنگ ءِ ھبر ءِ سر ءَ یکے ءَ تپاک بہ کن اَنت ۔"

'' منی ھیال ءَ اے سکیں مزنیں مشکلے پہ ھمک ازرائیلی سر وزیر ءُ امریکہ ءِ صدر ءَ کہ جوھری سلاھداریں ایران ءَ بہ من اَنت ۔''  روتاک ءِ رِد ءَ جان ءَ اے ھم دْرشانتگ کہ برٹش انٹلی جنس ءِ جھدانی برورد ءَ جاہ ء اِیش کہ ایران دوھزار ھشت ءَ جوھری سلاھداریں ملکے بوت اِنت مروچی دوھزار دوازدہ ءَ پہ جوھری ھاٹیگ ءِ رسگ ءَ دوسال دور اِنت ۔ 

نزیکیں سالاں بازیں ایرانی سائنسدان تھران ءِ دگ ءُ دمکانی تہ ءَ کشگ بوتگ ءُ اسٹگس نیٹ  نامیں یک کمپویٹر وائرسے ءَ ایران ءِ جوھری ترتیب ءُ کار مان اَڑینتگ اَنت ۔ تھران ءَ ھمے گْوشتگ کہ امریکہ، ازرائیل ءُ برٹش ءِ چیریں ادارھاں پہ آئی ءِ ایرموش ءَ اے کار کرتگ اَنت ۔

سرجان ءَ گْوشتگ ایم سیکسٹین میان اُستمانی تک ءَ پابندیانی الم کنگ ءَ آپریشنانی یک دْرچے بنا کنت ءُ ھرچ کارے کہ مئے دست ءَ بیت ما میان رودرتک ءِ تہ ءَ اے پشت کپتگیں جنجالانی سُست کنگ ءَ ، کن اِیں ۔''

ھمے ماہ ءِ بندات ءَ ایران ءِ جوھری برنامہ ءِ سر ءَ ایران ءُ جھانی مزن واکداریں ملکانی نیام ءَ جھلے تک ءَ نیادے بوتگ اَت ۔ دیوان ءِ آسر ءَ ھردو نیمگ ءِ تْرانکاراں ھمے گْوشتگ کہ تْرانکار نزیکیں رمسے ءَ پد ءَ دوچار کپ اَنت ۔ جار ءِ تہ ءَ ھچ رنگیں دیمروی نشون دیگ نہ بوتگ بلے ھر دونیمگ ءَ کس پہ اے گْوشگ ءَ ساڑی ھم نہ اَت کہ آھانی ھبر ھچ پہ ھچ بوتگ اَنت ۔

چَہ امریکہ ءُ یورپ ءِ نیمگ ءَ ایران ءِ تیل ءِ باپار ءُ مالیات ءِ نزور کنگ ءِ توجیلانی سبب ءَ ایران ءَ یک رندے پد ءَ ھرمز تنگدپ [ آبنائے ھرمز ] ءِ بند کنگ ءِ بیھار داتگ کہ مزن ھور ءِ تیلی منورانی گْوزگ  ءِ مھمیں راھے ۔ایران ءَ اے ھم گْوشتگ کہ نوکیں پابندی  پہ جوھری جیڑہ ءِ گیشوار ءَ اسرمند نہ بنت ۔

چَہ دوھزار دہ ءَ ایران وتی پروسیڈ کرتگیں یورنیمیاں پنچ ءَ گر داں بیست درسد شودگ ءَ اِنت ۔ اے شود[ پیورٹی] چَہ جوھری سلاہ جوڑ کنگ ءِ لوٹ ءَ نود درسد کم اِنت بلے گوں آسانی سلاہ جوڑ کنگ ءِ کچ ءَ رسینگ بوت کنت ۔

دوھزار یازدہ ءَ تھران ءَ گْوشتگ کہ آئی ءَ یورنیم ءِ کساس چَہ بیست درسدی ءَ سئے سری گیش کرتگ ءُ کم کم ءَ وتی سامان ایرانیانی مِھتریں شھر قم ءِ نزیک ءِ کوھانی تہ ءَ یک مزن پھنات ءُ شاھگانیں انچیں جھلیں ھونڈے  ءَ برتگ اَںت کہ بم ءَ گوں تْراکینگ ءُ تاوان دیگ نہ بیت ۔