بام ھال وبتاک ءَ کار کنگ ءُ اھوالکاری راھبند
Saturday, June 30, 2012
بام ھال ، بلوچی زبانءَ ھال شنگ کنوکیں یک گلکاری بزاں ٹیم وب بلاگے ۔ پہ اھوالکاری ءُ ھالرسانی ءَ شنگ بیوکیں وب بلاگاں المی اِنت کہ آھانی گستاک ءَ گیش گیش سرھال جتائیں بنگپانی سر ءَ ایر بہ بنت داں سیل کنوک کمتریں وھد ءِ تہ ءَ شنگ بوتگیں ھالاں ونت بہ کن اَنت ۔
گستاک ءِ ترامگ ءَ کمے وبساچی ءِ زانت المی اِنت داں وبتاک ءِ تہ ءَ بے ڈولی مہ اِت ٹوھیں وبتاکانی تہ ءَ پہ اے کار ءَ زانتکاریں مردم دارگ بنت ءُ ' پوسٹاں ' چَہ شنگ کنگ ءَ پیش شونکار چار اَنت ءُ پھک نویس کنگ ءَ پد شنگ کن اَنت ۔ بلے پہ بام ھال رنگیں بے مز ءُ سوت ءَ کارکنوکیں ادارھے کہ ناں اے جاوراں پہ وتا کارگسے داشت کنت ناں شونکار اگاں ھمے رواجی رپک ءُ راھاں بہ روت سوبمند نہ بیت ۔ پمیشکا بلوچی بلاگنگ ءُ بام ھال ءَ ھمگرنچیں وبساچ ءُ ترامکاراں جھد کرتگ کہ اے وب بلاگ انچیں رنگیں ساچگ ءُ نچین بہ بیت کہ اھوالکاراں ابید چَہ اھوال نویسی ءُ پوسٹ کنگ ءَ دگہ کار سر ءَ مہ بیت ءُ ترامگ ءُ نچینگ ءِ کار وتکاریں رنگے ءَ بہ بنت ۔
ھمے جھدانی برورد اِنت کہ بام ھالءِ وب بلاگ ءِ نوکیں دروشم ءَ ھالانی شنگ کنگ چَہ پیشگیناں سک آسان اِنت ۔ پیسر ءَ ھالانی آر ٹی ایل بزاں رائٹ ٹو لفٹ [ چَہ راست ءَ چپی ] نیمگ ءَ ترینگ ءُ نوشت آبانی مستر کنگ ءَ کوڈ لوٹ اِتگ اَت ۔ دروشم ءِ نزوری ءِ سبب ءَ انچوش شنگ بوتگیں ھال سک ھورت گندگ بوتگ اِت اَنت ءُ ڈلگ ءُ بولڈ آپشنزانی کارمرد کنگ ءَ بے ڈول سما کپتگ اِنت ، نوکتریں دروشم ءِ تہ ءَ اے وتکاریں رنگے ءَ بنت ۔ پہ اے کارانی یاتگرگ ءَ جھل ءِ سوجانی شری ءِ
سر ءَ بہ وان اِت پرچا کہ ' پوسٹ ' کنوک کسانیں ردی یے سب ءَ بلاگ ءِ گستاک ءُ نکان تاک ھر دو بے ڈول بوت کن اَنت ۔
لھتے کار چَہ بام ھال ءِ ترامجاہ [ ڈیش بورڈ ]ءَ روگ ءَ پیش
- تو چَہ جی میل ءَ پہ بام ھال ءَ اھوالکاری ءَ دزبندی دیم داتگ؟
- تئی دزبندی ءِ پسو ءَ ترا چَہ ای میل ءَ لوٹکی اَتکگ ؟
- تو لوٹکی من اِتگ ءُ چَہ '' بلاگر '' ءَ لاگ اِن بوتگ ئے ؟
- ۔ پہ وت' بام پنا م ' یا ڈسپلے نیمے گچینتگ ؟
- ۔ یونیکوڈ نویسگ دربرتگ ؟
- اُردو پونیٹک کی بورڈ یا ایشی ءَ بدل ءَ انچیں کی بورڈے انسٹال کرتگ کہ بلوچی نوشتہ کرت بہ کنت ؟
اگاں برز ءَ داتگیں کار پشت کپتگ اَنت گڑا چَہ جھل ءِ داتگیں لنکاں سوج گر اِت ءُ چَہ ایشانی کنگ ءَ پد دیمتر ءِ سوجاں بہ وان اِت ۔
دلگوش : سوجانی تہ ءَ بام ھال ءِ جاہ ءَ بام نوشتانک ءِ نام داتگ ، بلے اے سوج پہ بام ھال ءَ ھم ھمیش اَنت ، البت بام ھال ءُ بام نوشتانک ءِ تہ ءَ پوسٹ ءُ ھال شنگ کنگ ءِ وڑ ءُ پیمانی تہ ءَ دگری ھست ۔
- پہ اھوالکاری ءَ باسکبندی دزبندی کنگ
- لوٹکی یا دزبندی تاک ءِ منگ ءُ اھوالکارانی لڑ ءَ ھوار بوگ۔
- ڈسپلے نیم ءِ بدل کنگ ءُ عربی سیاھگ ءَ نویسگ ۔
- یونیکوڈ نویسگ یاتگرگ پہ ونڈوز ایکس پی
- پہ بلوچی نویسگ ءَ کی بورڈ ءُ چَہ ان پیج ءَ یونیکوڈ ءَ ترینگ ۔
یونیکوڈ چی اِنت ؟
بام ھال ءِ تہ ءَ شنگ بوتگیں ھالانی فونٹ انگریزی فونٹانی پیمیں فونٹ نہ اَنت کہ ماں ونڈوز ، ورلڈ یا ان پیج ءَ کارمرد بنت ۔ بلکیں یونیکوڈ کریکٹر اَنت ایشانی شری اِیش اِنت کہ ماں ھرچ کمپیوٹر ءُ موبائل براوزرانی تہ ءَ گندگ بنت ءُ پہ ایشی ءَ ھچ انسٹالیشن نہ لوٹ اِیت ۔
بام ھال ءِ تہ ءَ ان پیج ءَ نویس اِتگیں فونٹ شنگ بوت نہ کن اَنت البت برز ءَ سوج دیگ بوتگ کہ چَہ ان پیج ءَ نوشتگیں فونٹ چِہ پیم ماں یونیکوڈ ءَ بدل کنگ ءُ شنگ کنگ بنت ءُ پونیٹک کی بورڈانی لنکس ھم داتگ اَنت۔ پہ ھماکساں کہ ان پیج ءَ نوشتہ کنگ ءَ ھیل اِش کرتگ ھر دو راھبند آسان اَنت ۔
بام ھال ءِ گستاک ءَ ھالانی ڈب ءُ آھانی کار :
ماں بام ھال ءِ گستاک ءَ ھمک ھال وتی بنگپ ءِ ھساب جتائیں ڈب بزاں بکسے ءَ گندگ بیت ۔ کش ءَ داتگیں ھکسے تہ ءَ بام ھال ءِ بکس ءُ آھانی بنگپ نشون داتگ اَنت داں شما بہ زان اِت کجام بنگپ ءِ ھال کجام ڈب ءِ تہ ءَ گندگ بیت ۔
پہ مزن کنگ ءَ ھکس ءِ سر ءَ رائٹ کلک کن اِت ءُ دگہ ونڈوے ءَ پچ ئِے کن اِت داں شری ءِ سر ءَ گندگ بہ بیت ۔
بلوچ سرمچار : راستی دست ءَ چَہ درسان برزترین ڈب ءَ بلوچ سرمچار ءِ بنگپ ءَ شنگ بوتگیں ھال گندگ بنت ۔ ھما گل کہ پہ بلوچستان ءِ آجوئی ءَ سلاھبندیں جھد کنگ ءَ اَنت بلوچ سرمچار ءِ نام ءِ سر ءَ یات کنگ بنت
بلوچ راجدوست : چَہ بلوچ سرمچار ءِ ڈب ءِ چیر ءَ بلوچ راجدوست ءِ بنگپ ءَ ھال شنگ بنت ۔ ھما گل کہ بلوچستان ءِ آجوئی ءِ منوک ءُ پلہ مرز اَنت راجدوست گل گوشگ بہ بنت زانگ بہ بیت اے لڑ ءِ تہ ءَ پاکستانی پارلیمان ءِ منوک ءُ پاکی سیاست ءَ پُنڈ اِتگیں گل ءُ راھشون ھوار نہ اَنت بلے توری وتا نامے راجدوست لیک اَنت پرچا کہ راجدوستی ءِ زگر ءُ زانشتی ساڑا ھمیش اِنت کہ '' ھما گل کہ پہ وتی راج آجوئی ءَ جھد ءَ اِنت ۔'' چَہ ایشاں ابید دگہ کس اے رم ءَ ھوار مہ بیت پہ پارلیمانی سیاستداناں بام ھال ءِ تہ ءَ پاکستان ءُ رودرتکی بلوچستان ءِ ڈب داتگ اَنت ۔اگاں ھال چَہ رودرتکی بلوچستان ءِ شھر ءُ ھندے ءَ شنگ بوتگ گڑا رودتکی بلوچستان ءِ بنگپ ءَ شنگ کنگ بہ بیت اگان چَہ اسلام آباد ءُ پنجاب ءِ دگہ شھرے ءَ گڑا ' پاکستان ' ءِ بنگپ ءَ شنگ بہ بیت داں ھمے ڈباں گندگ بہ بیت ۔
پاکستانی سرکار ءِ آوار جتگیں ۔ راجی بامرد : اے ڈب ءِ تہ ءَ ' پاکی سرکار ءِ آوار جتگیں ' بنگپ ءَ شنگ بوتگیں ھال گندگ بنت ، اے جگربریں ھال ھما بلوچانیگ اَنت کہ پاکی رستریں لشکر ءَآوار جتگ اَنت ۔
پاکستانی سرکار ءِ کشتگیں ۔ شھید : اے ڈب ءَ ھما شھیدانی ھال شنگ بنت کہ پاکی رستریں لشکر ءَ گوں دیم پہ دیمی جنگ ءَ ندر بنت ، آوار جنگ یا راست نشانگ کنگ ءَ پد شھید کنگ بنت ۔
رودرتکی بلوچستان : پہ پاکستان ءِ چیردستیں بلوچستان ءِ ھالاں ۔
روکپتی بلوچستان : پہ ایران ءِ چیردستیں بلوچستان ءِ ھالاں ۔
کراچی : کراچی ءَ جاھمنندیں بلوچ ءُ کراچی ءِ ھال ھمے ڈب ءَ گندگ بنت ۔
مزن ھور : مزن ھور ءُ آ اُود ءَ نشتگیں بلوچانی ھال ھمد ءَ شنگ بنت ۔
اوگانستان :پہ اوگانستان ءِ جاور ءُ جیڑگانی سر ءَ ھالاں۔
پاکستان : ابید چَہ بلوچستان ءُ سندھو دیش ءَ پاکستان ءِ دگہ تہ ءُ توکی ھال ءُ سیاسی چست ءُ ایرانی درگت ءَ ھال ھمد ءَ گندگ بنت ۔
ایران : ابید چَہ روکپتی بلوچستان ءُ کردستان ءَ ایران ءِ تہ ءُ توکی ھال ھمے جاہ ءَ گندگ بنت ۔
جھان : برز ءَ داتگیں ملکاں ابید دنیا ءِ دگہ ملکانی ڈلگ ءُ مزنیں ھال ھمے بنگپ ءِ سر ءَ شنگ بنت ۔
سائنس : راستی نیمگ ءَ وتکاریں چَہ برز ءَ جھل کپوکیں سلائیڈے ءِ تہ ءَ سائنسی بنگپانی سر ءَ ھال شنگ بنت ۔
ازم ۔ ادب ۔ شاتکامی : اد ءَ تامری ، ادبی ءُ انٹرٹینمنٹ بزاں شاتکامی ھال شنگ بنت ۔ شاتکامی ھالانی تہ ءَ بھمانگیں گپ ءُ ھبر یا گینز بک ءَ چاپ بیوکیں رکارڈ ھم ھوار اَنت ۔
سندھو دیش : جھل ءِ نیلیں پٹی ءِ تہ ءَ سندھو دیش ءِ بنگپ ءَ سند ھ ءِ راجدوستانی کارپد ءُ آھانی درگت ءَ ھال گندگ بنت ۔
سسا ءُ ٹپاس : ھالانی سر ءَ سسا ءُ ٹپاس بزاں تجزیانی سرھال ھمد ءَ گندگ بنت ۔
گچینی ھال : گچینی بزاں خاصیں ھال ابید چَہ بلوچ سرمچار ءُ راجدوستانی کہ [ چَہ ھمے سلائیڈ ءَ نزیک اَنت ] برز ءَ سلائیڈے تہ ءَ گندگ بنت داتگیں ھکس ءِ تہ ءَ ھمے سلائیڈ ءِ سر ءَ سھریں رنگ ءَ ' گچینی ھال ' نوشتہ اِنت ۔
اھوالکار پہ گچینی ھالانی زانگ ءَ یک راھبندے بہ بیت اگاں ھرچ ھالے گچینی ھال ءِ نام ءَ شنگ بہ بیت گڑا وب بلاگ ءِ بنگپ گوں یک دومی ءَ مانگیش اَنت چوش کہ نکان تاک ءَ ھالانی جھل ءَ داتگیں ' ھمے درگت ءَ دگہ ھال ' ءِ تہ ءَ چَہ یک دومی ءَ دگری کنوکیں ھال ھم ھوار بنت ۔ ھما ھال کہ گچینی ھال ءِ بنگپ بزاں لیبل دیگ بہ بیت ایشی ءِ پجیگ ءَ دگہ ھم لیبلے دیگ بہ بیت چوش کہ ھال اگاں روکپتی بلوچستان ئیگ اِنت گڑا 'روکپتی بلوچستان ' ءُ گچینی ھال ھردوانی لیبل دیگ بہ بنت [ لیبل گچین کنگ ءِ سوج دیمتر ءَ ھست ] ۔ اے ھم زانگ لوٹ اِیت کہ ھمک ھال ءُ رپورٹ گچینی نہ اِنت بلکیں گچینی ھالانی تہ ءَ کسے ءِ آوار جنگ ، شھید کنگ ، میتگے ءِ سر ءَ لشکر کشی کنگ ، مزنیں مردمے ءِ بیرانی ، انچیں ھوپ ءُ وھیل کہ آئی ءِ تہ ءَ چَہ سئے ءَ گیشتر مردم بیران بہ بیت ، دنیا ءِ انچیں ھال ءُ ھبر کہ آھانی بلوچستان یا سرجمیں دنیا ءَ اَرزش ھست ، گچینی ھالانی لڑ ءَ کاینت ۔
بت ءُ بتم : جھل ءَ ھکسانی وَسُروکیں سلائیڈ ءَ ھکس گندگ بنت ۔ اے جاہ ءَ شھیدانی جوڑ کرتگیں اسکیچ ، یا کم گندگ بوتگیں ھکس ، یا انچیں ندارگ ءُ جاورانی سر ءَ کشتگیں ھکس ایر کنگ بہ بنت کہ پیسرگیں ھالانی ھوار نہ اَنت ۔
چَہ داتگیں ھال ڈباں ابید بام ھال ءِ تہ ءَ نوکیں ڈب ھم ھوار کنگ بیت نوکیں ڈبانی بنگپ ماں ' ترامجاہ ' وت گندگ بنت ۔ پہ شما [ اھوالکار ءَ ] المی اِنت کہ ھالاں برز ءَ داتگیں بنگپاں یکیں چَہ ترامجا ہ ءَ داتگیں بنگپ ءَ گچین بہ کنت [ اے درگت ءَ دیمتر ءَ سوج داتگ ] داں ھال ءِ سرھال [ ھیڈ لائن ] ماں گستاک ءَ گندگ بہ بیت ءُ چَہ ایشی ءَ چاروکاں آسانی بیت ۔ ھال شنگ کنگ ءِ وھد ءِ اے ھبر ءِ ھم ھیالداری ءَ بہ کن اِت ھالانی سرھال اینچک مزن مہ بنت کہ چَہ وتی داتگیں جاہ ءَ بہ گْوز اَنت ءُ بے ڈول سما بہ دئے اَنت ۔ پہ ایشی ءَ اھوالکار باید شنگ کنگ ءَ پد وتی ھال ءَ ماں گستاک ءُ نکان تاک ھردو جاہ ءَ بہ چار اِیت اگاں بے ڈولی ئِے سما کرت گڑا ھال ءِ سرھال ءَ کستر بہ کنت داں جاہ بہ کنت ۔
بام ھال ءِ ترامجاہ :
ھما جاہ ءَ کہ ھال نویسگ ءُ شنگ کنگ بیت ترا مجاہ یا ڈیش بورڈ گْوش اَنت ۔ چَہ بلاگر ءَ جی میل اکاونٹ ءُ پاس ورڈ ءِ دیگ ءَ پد ترامجاہ جھل ءِ ھکس ءِ پیم ءَ گندگ بیت ۔
ھال پوسٹ کنگ :
- پنسل ءِ نشان جتگیں زردیں بٹن ءَ کلک کن۔
- چَہ کلک ءَ پد پوسٹ ایڈیٹنگ تاک پچ بیت کہ آئی ءِ تہ ءَ ورڈ ءُ دگہ نویسگی سوفٹ ویئرانی رنگ ءَ نویسگ ءِ جاہ ۔ نوشتگیناں کسان مزن کنگ۔ نمبر لسٹ دیگ ۔ نوشتگیناں رنگدار کنگ لنک دیگ ءُ دگہ بٹن داتگ اَنت ۔ میان ءِ اسپیتیں جاہ ءَ وتی پوسٹ ءَ بہ نویس یا کاپی پیسٹ کن ۔ دلگوش کنگی اِنت کہ ھال چَہ ورڈ ءُ ایچ ٹی ایم ایل یا دگہ وبتاکے ءَ کاپی کنگ ءَ پد تچک ءَ پیسٹ کنگ مہ بیت چوش ھما وبتاک ءِ 'ترام 'بزاں سیٹنگ ھوار بنت پمیشکا چَہ پیسٹ کنگ ءَ پیش یک برے ونڈوزے ٹیکسٹ ڈاکومنٹس ، ونڈوز سیون ءِ اسٹکی نوٹس یا دگہ انچیں سوفٹ ویئرے ءِ تہ ءَ پسیٹ کنگ بہ بیت کہ ایچ ٹی ایم ایل کوڈ ھوار مہ بنت ءُ چَہ ھمود ءَ کاپی کنگ ءَ پد نوں بلاگر پوسٹ ترامجاہ ءَ پیسٹ کنگ بہ بیت ، چوش ' ایچ ٹی ایم ایل ' کوڈ ھوار نہ بنت۔ اے ھم دلگوش دیگی اِنت۔ اھوالکار ءَ پہ نوشتگ ءَ دگہ ھچ رنگیں 'بٹن ' کارمرد کنگی نہ اِنت بزاں ناں 'الائنمنٹ ' بزاں نوشت چپ ءُ راست کنگی اَنت ،ناں بولڈ ، نارمل ، رنگدار ءُ ناں فونٹ گچین کنگی اِنت ۔ بلکیں بلاگر ءِ ڈیفالٹ سینٹگ ءِ تہ ءَ 'نویسگ ' یا گوشتگیں وڑ ءَ پیسٹ کنگی اَنت ۔ ترامجاہ ءِ تہ ءَ بلے توری نوشتگ 'ایل ٹی ایل ' بزاں انگریزی زبان ءِ پیم ءَ چَہ چپ ءَ راست گندگ بہ بنت یا سک ھورت بہ بنت چَہ پبلش ءَ پد ماں وب بلاگ ءَ واناک ءُ براھدار گندگ بنت بلے اگاں فونٹ چَہ ھمد ءَ سرینگ بہ بنت گڑا بوت کنت کہ وبتاک ءِ وتکاریں ' کوڈ ' کار مہ کن اَنت۔
راستی نیمگ ءَ پوسٹ سینٹگ ءِ چیر ءَ لیبل نویس اِتگ ۔ لیبل ءِ سر ءَ کلک کنگ ءَ جھل ءَ یک اسپیتیں بکسے درا بیت چَہ ھمیشی ءِ تہ ءَ داتگیں بنگپاں گچین۔ چَہ یک ءَ گیشتر بنگپ ھم زورگ بیت بلے پہ اے رنگیں گچین کاری ءَ دلگوش دیگ لوٹ اِیت کہ ھال گوں یک دومی ھوار مہ بنت ءُ ' ھمے درگت ءَ دگہ لھتیں ھال 'ءِ جاہ ءَ گوں یک دومی ءَ دگری کنوکیں ھال ھوار مہ کپ اَنت ۔ یک بنگپے چَہ ھمے داتگیں بنگپاں گچین کنگ بیت پرچا کہ اے داتگیں بنگپ ماں گستاک ءَ گندگ بنت چَہ ایشاں ابید داتگیں بنگپ ءِ ھال ' گستاک 'ءَ داتگیں جتائیں ھالانی 'ڈبانی ' تہ ءَ دراھی نہ کنت ۔ یک بنگپے ھما شھر یا ھند ءُ دمگ ءِ نام بہ بیت کہ چَہ آ اُود ءَ ھال شنگ بوگ ءَ اِنت چوش کہ اگاں ھال چَہ 'پنجگور ' ءَ شنگ بوگ ءَ اِنت گڑا چَہ ' لیبلز ' ءِ تہ ءَ ' پنجگور ' ءِ گچین کنگ ءَ پد دومی انچیں ' بنگپے بہ زور کہ ' گستاک ' ءَ ڈب داتگ ۔ اگاں چَہ انچیں شھرے ءَ ھال شنگ بوتگ کہ ماں ' لیبلز' ءَ پیسر ءَ ھوار نہ اِنت گڑا ھمے جاہ ءَ پیسر ءَ ھمائی ءَ بہ نویس ءُ رند ءَ ' ھال ڈب ' ءِ بنگپ ءَ بہ زور ۔ دلگوش دیگی اِنت کہ چَہ وتا نوکیں ' بنگپے ' دیگ ءَ پیش دلجم بہ بئے کہ تئی داتگیں بنگپ پیسر ءَ ' لیبلز ' ءَ ھوار نہ اِنت پرچا کہ کسانیں دگری یے ءَ گوں ھال چَہ وتی بنگپ ءَ گستا بیت ءُ گستاک ءَ گندگ نہ بیت۔ - برز ءَ '' بپلش '' ءِ زردیں بٹن ءِ چپی کش ءَ کہ جاھے ءَ '' پوسٹ ٹائیٹل '' نوشتگ سرھال ءَ ھمد ءَ بہ نویس ۔ سرھال ھمینچک کستر بہ بیت جوانتر اِنت چَہ ایشی ءَ ' گستاک ' زوت لوڈ بیت ءُ براھدارتر گندگ کئیت ۔
- پوسٹ ٹائِٹل ءِ راستی نیمگ ءَ ءَ پبلش ءِ زردیں پٹن ءَ کلک کن کمے پروسیز بوگ ءَ پد پوسٹ ماں بلاگ ءِ تہ ءَ شنگ بیت ۔ چَہ پبلش کنگ ءَ پیش ھال ءَ یک رندے دلجمی ءَ بہ وان ، ردیاں بہ گر ءُ پھک نویس بہ کن ۔
ھالانی تہ ءَ ھکس ھوار کنگ:
پہ ھالانی تہ ءَ ھکس ھوار کنگ ءَ ھمد ءَ کلک کن ، چَہ ایشی ءَ بلوچی بلاگنگ ءِ سوج تاک پچ بیت۔ ھکس سک مزن مہ بنت داں گوں ھال ءَ زوت تر لوڈ بہ بنت ۔ اےھم دلگوشگور کنگ لوٹ اِیت کہ بام ھال ءِ وبتاک ایوک پہ ھالانی شنگ کنگ ءَ اِنت پہ نوشتانکانی شنگ کنگ ءَ بام ھال ءِ گستائیں وب بلاگ ' بام ھال بلاگ ' ھست۔ پہ بام ھال بلاگ ءِ باسکبندی ءَ جتائیں دزبندی پکار اِنت ۔ پہ بام ھال نوشتانک ءِ باسکبندی ءَ ھمد ءَ کلک کن ۔
اُمیت اِنت کہ شما بام ھال ءِ اھوالکار بوگ ءَ داتگیں سوج دلجمی ءَ ونتگ اَنت ءُ چَہ وتی اے اُگدہ ءَ آژناک ئے کہ چَہ شمئے کسانیں ردی یے ءَ بام ھال ءِ گستاک بے براہ بوت کنت ، بام ھال ءَ گوں ھمکاری باور ءُ یک دومی ءِ سر ءَ ستک کنگ اِنت ھمے واھگ دارگ بیت کہ شما اے ستک ءُ باور ءَ نہ پروش اِت ۔
کار ءِ بنا کنگ ءَ پیش جھل ءِ داتگیں سوج ءُ سراں ھم بہ وان اِت ۔
- بلوچی راست نویس
- اھوالکاری ءِ بستار
- اھوالکار
- ھال
- ھال نویسی
- اھوالکار ءِ کار راھبند
- سرھال /ھیڈ لائن
- بلوچی زبان ءَ ھال نویسی ءِ اَرزش
- پہ اھوالکاری ءَ انٹرنیٹ ءِ کارمرد
- بام ھال ءِ مول ءُ مراد
- پہ اھوالکاراں راھبند
- راست ءُ تچکیں اھوالکاری
- چَہ موبایل ءَ بلاگر ءَ کار کنگ
Comments[ 0 ]
Post a Comment