غلامی سانكلانى سِندگ ءَ ھون ءِ گُڈی ترمپ ءَ ھم ریچاں، مئے مول ءُ مراد گوں دُنیا ءَ بلوچ ءِ پلہ مرزی ءِ لوٹ اِنت۔ براھمدگ بگٹی
Thursday, March 29, 2012
ھال: بلوچ رھشون، بلوچ ریپبلکن پارٹی ءِ سروک واجہ براھمدگ بگٹی ءِ گُشتگ راجی جھد ءِ بنکی مول ءُ مراد غلامی ءِ سانکلانی سِندگ اِنت، پہ ایشی ءَ ھون ءِ گُڈی ترمپ ءَ تاں جد ءُ جھد برجاہ مانیت۔ میان استمانی تکاں بلوچ ءِ پلہ مرزی ءَ توار چِست بیئگ باز جوانیں گامگیجی، مئے مول ءُ مراد چہ عالمی دُنیا ءَ بلوچ راجی جھد ءِ پلہ مرزی ءِ لوٹ اِنت۔ ماں بلوچستان ءَ پاکی استان ءِ نیمگ ءَ فوجی ارش یکشلا برجاہ اِنت ، چرایشی ءَ چہ گل ءِ بنکی جوڑشت (اسٹرکچر) جیڑھانی آماچ بوتگ۔ بلے گل ءِ دوبر کاررھبند دیگ ءِ جھد ءَ کنگ ءَ اِنت۔ آئی ءَ گُشتگ بلوچ پہ راجی جھد ءِ پروش دیگ ءَ دُشمن ءِ زلم ءُ زوراکی ءُ ارشاں تیزی اَتکگ۔ انسانی حقانی ھلاپ ورزی یکشلا برجاہ اِنت۔ بلوچ ورناہ کوھانی تھا آجوئی ءِ جنگ ءَ کنگ ءَ اَنت۔ آھانی جھد ءِ مول ءُ مراد رھشونونی ڈیھ ءِ واپسی ءِ ھاترا نہ اِنت۔ بلکیں پہ ڈیھ ءِ آجوئی ءِ ھاترا وتی سراں ندر کنگ ءَ اَنت۔ آئی ءَ گُشتگ بلوچ جیڑہ ءِ گیشوار درانڈیھیں رھشونانی کیسانی ھلاس کنگ ءُ اے۔پی۔سی ءِ لوٹائینگ نہ اِنت۔ بلکیں ایشی ءَ ھمے نشون رسیت کہ پاکی استان بلوچ راجی جیرھ ءِ بنکی لوٹ ءَ سرپد نہ اِنت یا پہ زانت پاد پِر دات۔بلوچ سرمچارانی تیزیں ارشاں دُشمن سرین پروش کُتگ ، پمیشا دژمن پہ بے دردی لس بلوچ مھلوک ءِ کُشت ءُ کوش ءَ کنگ اِنت۔ بلوچ ورناہ ءُ زھگ ءُ زالبول آوار جنگ ءُ آھانی ٹپ ءُ ٹوریں لاش ماں دگ ءُ میداناں دور دیگ بیئگ ءَ اَنت۔ آئی ءَ گُشتگ کہ پاکی استان ءِ کاسگ چٹ سیاھیں دروگ بندگ ءَ اَنت کہ بلوچستان ءَ فوجی آپریشن بند کنگ بیتگ۔ اگاں عالمی میڈیا ءُ میان استمانی گلاں چار ءُ تپاس ءِ موہ دیگ بہ بیت گُڑا سرجمیں راستی پدر بیت کہ ماں بلوچستان ءَ پاکی زلم ءُ زوراکی ءُ کُشت ءُ کوش چونیں رنگے ءَ یکشلا برجاہ اِنت۔ آئی ءَ گُشتگ مرچی وھد ءِ لوت ھمیش اِنت کہ بلوچ راج یکمُشت ءُ یکدسی ءَ گوں راجی جنز ءَ ھوار بہ بنت۔ ابئید ءِ تپاکی ءُ یکمُشتی ءَ قبضہ گیر ءِ سانکلانی پروش دیگ ناممکن اِنت۔ آئی ءَ گُشتگ وھدی میان استمانی تکاں بلوچ جنز ءِ پلہ مرزی ءَ تواری چست بیت تہ دژمن بلوچ چُک چینی ءِ کِرداں گیشی کاریت، ایشی ءِ پدریں مثال مرچی پنجگور ءُ مکران ءَ فوجی آپریشن ءِ تیاری اِنت کہ دژمن ءِ نیمگ ءَ برجم دارگ بیئگ اِنت۔ آئی ءَ گُشتگ مکران ءُ پنجگور دُژمن فوج ءَ انگر کُتگ اَنت ءُ اودا یک رندی پدا چو ڈیرہ بگٹی ءُ کوھلو ءَ آپریشن ءِ تیاری بیئگ اِنت۔ جنگی گُراب ءُ ٹوھیں فوجی سلاھانی وسیلت ءَ بلوچ راج ءِ چک چینی ءِ کار یکشلا برجاہ اِنت۔ اے سرجم بلوچ راجی وتواکی ءِ ماں امریکی کانگریس ءَ پیش بیتگیں منگ نامہ ءِ پژگرد ءَ بیئگ ءَ اَنت۔ اے سرجمیں کرد دژمن استان ءِ کاسگ چٹانی دیم ءَ شھمات اَنت کہ آ تہ انگت ھمے گپ ءَ جنگ ءَ اَنت کہ ماں بلوچستان ءَ ھچ وڑا فوجی آپریشن بیئگ ءَ نہ اِنت۔
(یونائٹڈ بلوچستان زندہ بات)
Comments[ 0 ]
Post a Comment