ھپت اگست 1947 ءَ پاکی استان ءَ بلوچستان ءِ آجوئیں بستار من اِتگ۔ خان آف کلات

بام: بلوچ رھشون خان آف کلات ءَ ھندی بلوچی چینل ءَ تران کنان ءَ گشتگ کہ بلوچستان ءِ بابت ءَ استان ءِ کاردارانی گپ ءُ بلوچستان ءِ اسل راستی ءَ باز فرق اِنت۔ راستی اِش اِنت کہ پاکستان ءَ ھپت اگست 1947 ءَ بلوچستان ءِ وتواکیں بستار من اِتگ ءُ پدا پہ زور 27 مارچ 1948 ءَ لشکر کشی کُتگ ءُ بلوچستان ایردست کُتگ۔ مکران ءُ خاران ءُ لسبیلہ بلوچستان ءِ تاریخی بھر بیتگ اَنت۔ آئی ءَ گُشتگ مسٹر جناح ماں انگریزی سرکار ءِ گورا بلوچستان ءِ آجوئیں بستار ءِ منارینگ ءَ قانونی مشیر بیتگ۔ واجہ خان آف کلات ءَ لھتے تاریخی راستی پدر کنان ءَ گُشتگ کہ مئے ریکارڈ ءَ ھما تاریخی کاگد است اَنت کہ آھانی سرا جناح ءُ وائسرائے ھند ءِ دزنشاناں کہ ھمے نشوندھی رسیت کہ ایشاں پیش ءَ بلوچستان ءِ آجوئیں بستار من اِتگ۔