چمالنگ ءُ کوھستان ءِ مری ءَ زورگریں فوج ءِ لشکرکشی ءَ بازیں جانی ءُ مالی تاوان ءِ گمان اِنت

شال : بلوچ نیشنل وائس ءَ وتی بیان ءِ تہ ءَ گوشتگ کہ پاکستانی فوج ءَ بلوچستان ءِ دمگ کوھستان مری ءُ چمالنگ ءِ سر ءَ لشکرکشی کرتگ چَہ زوگریں ریاست ءِ اے لشکرکشی ءَ بازیں مردمانی بیران بوگ ءِ ترس اِنت  ۔ بیان ءِ تہ ءَ گوشگ بوتگ  کہ چمالنگ ءِ دُور ءُ چَہ رسانکی آسراتیاں زِبھریں دمگ ءُ ھنداں بیوکیں اے لشکرکشی ءِ سرجمیں ھال سر نہ بوگ ءَ اَنت البت چَہ دژمن ءِ نیمگ ءَ بیوکیں شیلنگ ءُ تیر گواری ءِ سبب ءَ مزنیں کساسے ءَ جان ءُ مالی تاوان بوتگ ۔ بیان ءِ تہ ءَ اے ھم گوشگ بوتگ کہ زانگ بہ بیت کہ چمالنگ چَہ مال ءُ مڈیاں سر ریچیں کوھی دمگے ، ریاست ءُ آئی ءِ ادارھانی مدام ھمے جھد بوتگ کہ اے دمگ ءُ بلوچستان ءِ سھرءُ مڈیاں وتی دست ءَ بہ کن اَنت بلے بلوچ سرمچار ءُ سردار مری ءِ پلہ مرزیں بلوچانی جھدانی برورد ءَ آ بے سوب بوگ ءاَ نت ۔ چمالنگ ھما ھند اِنت کہ  آ اُود ءَ ذولفقار بھٹو ءِ زمانگ ءَ ھم زورگریں سرکاری لشکر ءَ ھزارھاں بلوچ شھید کرتگ اے جنگ ءِ تہ ءَ زورگریں لشکر ءَ مزنیں کساسے ءَ تاوان رستگ ۔