شال : چَہ سریاب دگ ءَ شکی ئیں گاڑی یے ءَ سی کلو تراک کنیں مواد درکپتگ

شال : چَہ ترکگ ءَ پیش پولیس ءَ چَہ یک گاڑی یے ءَ سی کلو تراک کنیں مواد در گیپتگ ۔ ایس ایچ او سریاب راجہ قیوم ءَ گوں اھوالکاراں گوشتگ کہ پولیس ءَ چیریں ھالے رستگ کہ شال ءِ میتگ سریاب دگ ءَ ایری گیشن کالونی ءِ گور ءَ یک شکی ئیں آلٹو ے سڑک ءِ کش ءَ اُوشتاتگ پمیشکا پولیس ءَ شتگ ءُ گاڑی پٹ اِتگ چَہ پٹگ ءَ گاڑی ءَ سی کلو تراک کنیں مواد در اَتکگ ۔ زانگ بہ بیت کہ محرم  ءِ ماہ بندات اِنت ءُ مروچی اولی محرم اِنت اے اسلامی ماہ ءِ تہ ءَ اسلام ءِ پیگمبر ءِ نماسگ امام حسن گون یزید ءَ جنگ ءَ  شھید بوتگ پمیشکا اے ماہ ءَ مِھتر علی ءُ حسن ءِ منوگریں شیعہ  پرس ءُ پٹورہ کن اَنت ۔ شیعھیانی امام بارگاہ ءَ ابید بازار ءُ دگانی سر ءَ ھم دراجیں جلوس در کپ اَنت ءُ اے ماہ ءَ چَہ اے کاراں بد بروکیں دگہ مذھبی گل آھانی سر ءَ مدام اُرش کن اَنت ۔ شال ءَ ھزارھانی یک آبادی یے ھست کہ شیعہ اِنت ءُ آ مدام شیعہ نہ منوکیں گلانی نشانگ اَنت ءُ اے ماہ ءِ تہ ءَ آ گیشتر ایشا٘ں نشانگ ھم کن اَنت ۔ مروچی کہ محرم ءِ اولی روچ اِنت چَہ یک گاڑی یے ءَ تراک کنیں مواد ءِ دزکپگ کہ گیشتر مذھبی گلانی پیشگیں کارپد ءَ گوں نزیکی کنت ھمے شیعہ کشیانی درچ بیت کنت کہ پاکستان ءِ تہ ءَ یک گچینی مذھبی گل ءُ ٹکے ءِ چیر دستی ءُ آئی ایس آئی ءِ لھتیں مردمانی کمک ءَبرجاہ اِنت ۔