شال : نیشنل پارٹی ءَ ڈاکٹر لعل بخش ءِ درگت ءَ بی ایل ایف ءِ جارکش ءِ بیان رد کرتگ
Sunday, October 02, 2011
شال : نیشنل پارٹی ءِ بنجاھی جارکش ءَ گوشتگ کہ شھید ڈاکٹر لعل بخش بلوچ ءِ کوش سکیں دلپدردی کارے ما اے کارءَ گوں ترندی ءَ ایرجن اِیں ۔ جارکش ءَ بلوچ لبریشن فرنٹ ءِ جارکش بشام بلوچ ءِ بیان رد کرتگ ءُ گوشتگ کہ اے شھید ڈاکٹر لعل بخش بلوچ ءِ کردار کشی ءُ مھلوک ءِ مارشتانی کم شرپ کنگ اِنت ۔ بیان ءِ تہ ءَ گوشگ بوتگ کہ ڈاکٹر لعل بخش یک دلستک ، مھلوک دوستیں مردے ءُ چک ءُ پاکیں کردگار ءِ واھنگ بوتگ کہ ایشی ءِ شاھدی سرجمیں ھندءِ مردم اَنت ۔ بی ایل ایف ءِ جارکش ءِ بیان آئی ءِ پد منتگیں ذھن ءَ سھرا کنت کہ آئی ءَ یک گچینی دھشت گرد ٹولے ءِ بد ءُ انسانیت سوچیں کارپد گوں بلوچ جھد ءَ ھمگرنچ کرتگ ءُ بلوچ مھلوک ءِ جھد نہ ایوک کم شرپ کرتگ بلکیں گوں اے دھشت گرد ٹک ءَ سیادی ءُ ھمگرنچی برجاہ داشتگ چَہ ایشی ءَ بلوچ مھلوک ءِ مارشت پدرد بوتگ اَنت۔ نیشنل پارٹی ءُ آئی ءِ شھید راھشونانی جھد ءِ ارزش ءُ کردار ءَ ھرکس زانت ءُ سرپد اِنت ۔اے ٹک ءَ شھید ڈاکٹر نیسم جنگیان ءِ پجیگ ءَ 13بے میاریں مردم کشتگ کہ آھاںی تہ ءَ 2مری ، 2پشتون پت ءُ چک ، رخشتانی بلڈرز ءِ چار پوریاتگر ءِ پجیگ رضا، ملاانجام ءُ دگہ بازیں بے میاریں مردم نشانگ کرتگ کہ ایشانی ذ٘مہ واری بی ایل ایف ءَ من اِتگ اَنت ۔ نیشنل پارٹی ءِ جارکش ءَ گوشتگ کہ پارٹی گوں بلوچ جھد ءَ اُستمانی راہ ءُ راھبنداں بندوک اِنت بلے جھد ءِ نام ءَ یک ٹکے بلوچ جھد ءَ تاوان دیگ لوٹ اِیت کہ گوں وتی ناپاکیں مُراداں بلوچ سیاسی واکاں وت ما وت گرءُ چیل کنائینگ ءُ بلوچ چاگرد ءَ وت ما وتی جنگ ءُ برات کشی ءِ نیمگ ءَ برگ لوٹ اِیت ۔ بیان ءِ تہ ءَ گوشگ بوتگ کہ بی ایل ایف ءِ نام ءَ یک ٹکے ءِ بیمناکیں دیم مھلوک ءِ دیم ءَ ڈاکٹر لعل بخش ، ڈاکٹر نسیم جنگیان ، شھید مولابخش دشتی ءُ محمد حسین شھید ءِ شھادت ءَ پد پدر بوتگ ۔اے ٹک نیشنل پارٹی ءِ راجی راھشوناں کشگ ءُ آھانی ذمہ واری ءَ زورگ ءَ پد درسانی دیم ءَ پدر بوتگ ۔ اے ٹک چَہ وتی گیش اِتگیں راہ ءُ راھبنداں گسر بوتگ ۔ داں کولواہ ءَ بہ گر شھرک ءَ کشگ بوتگیں سیزدھیں مردم کہ بی ایل ایف ءِ نام ءَ کشگ بوتگ اَنت سرکاری چاریگ نہ بوتگ اَنت ءُ نہ کہ مھلوک ءِ سوتاں تاوان دئیں کار کنوک بوتگ اَنت ۔ایوک وتی تب ءُ پسند ءِ ھساب ءَ بے میاریں مردم نشانگ کنگ بوتگ اَنت ۔ جارکش ءَ گوشتگ کہ نیشنل پارٹی ءِ جھد اِنت کہ ھچ سیاسی پارٹی ءِ ھلاپ ، سیاسی ، لیکوی ءُ راہ ءُ رپکی گستائی ءَ ابید ھم یک دوستی ءُ سیاسی سیادی یے بہ دار اِیت ۔پارٹی ءِ شھید راھشونانی ھلاپ ءَ ھالتاکہ بیان ءُ دورگیں نام ءَ نوشتگیں نوشتانکانی سر ءَ پارٹی ءَ گوں سنگینی ءَ نوٹس زرتگ پمیشکا بی ایل ایف ءِ نام ءَ بشام بلوچ ءِ بیان ءِ پارٹی ءَ پسو کنگ المی زانتگ ۔
پیش ءِ بلوچاں گشتہ مردمءَرا وتی گندگی ئے بو نہ گیرت،اے بتل گوں نیشنل پارٹی ءِ بیاناں وتی راستی ءَ چو روچءَ پدر کنت،نیشنل پارٹی ھما راہءَ روگءَ اِنت کہ آئی ھر کنڈا بنامی روزوائی لِلک پیش داریت و منزل تہاری ،گلامی و بد بھتی اِنت۔اے پارٹیءَ وتی جند ئے راہ گار کرتہ بلے اے دگراں راہ ئے گاری ئے گشیت،مارءَ پہ نیشنل پارٹی ءِ ھما سادگیں و نیک نیتیں باسکانی رد ورگا اَرمان بیت کہ آھانءَنوں نیشنل پارٹیءَپہ راج ءِ سرمچارانی چارو گریءَ ساڑی کرتہ،و آچارو آزادی پسنداں گرایننت آھاں کوشاریننت۔نوں کہ راجی لشکر آھاں پہ چشیں سِلیں کارءَ چہ ھکل دئیگ و مکن کنگءَ رند سزا دنت گڈءَ اے نام گپتیں بلوچ گل ھمے دلارانی وارث بیان ھمیشانی سیاد و وارثاں سرمچارانی خلافءَ پریس کانفرنس کنگ و آھاںءَ بنام کنگءَ سکین دنت،شہید صباء دشتیاری یک رندی پہ باز بژن اے راست پدر کرتگ اَت۔نیشنل پارٹی جوانیءَ گندیت کہ پہ اے مردماں کہ بلو چ سرمچاراں کُشتگ اَنت ھچ کس دلپدردی درشاں نہ کنت،بلے پدءَ ھم آ نہ ایوکہ چشیں روزوھاں چِنت و وتی کنت بلکیں پہ آھانی کوشءَ گوں بلوچ کشیں ریاستءَ ھمشور بیت،وتی باسکاں ایف۔سی و ایدگہ چیریں اداراھانی کمکءَگوں کنت،و وتی سیشن ئے تھا اے گپ ئے ضرورت ءِ سرءَ زور دنت کہ سرمچارانی دیم ءِ گرگءَ نیشنل پارٹی وتی سلھہ بندیں لشکرے جوڑ بکنت۔چہ چشیں بیان و ھبر ءِ اُشکنگءَ پد مردم اے واجہاں گشت کنت کہ شما چشیں لشکر جوڑ کنوکیں شیراِت گڈءَ برواِت ریاست ئے خلافءَ لشکر جوڑ کن اِت کہ آئی شمئےمات(بلوچستان)وتی زونڈانی چیرءَکرتہ وھمک روچ گیچینیں بچاں چست کنت بارت لاشاں اِش دور دنت۔نیشنل پارٹی و بی۔این۔پی عوامی و مینگل سے ئیں گل اے گپءَبزان اَنت تاں کہ آ پاکستان ءَ برو بخیر نہ گش اَنت آھانی ھمک گپ دروگ و آھانی ھمک چست بوتگیں قدم رَد زانگ بیت۔زندگ و سوبین باتنت مئے سرمچار ۔
ReplyDelete