شال : سرکار ءِ دست مئے مردمانی ھون ءَ ریٹو اَنت گوں آھاں نشت نہ کن اِیں ' اخترمینگل ۔۔ داں بلوچستان ءِ جیڑہ ھست اے پی سی ءَ روگ سوت مندنہ اِنت ' ڈاکٹرمالک

اخترجان مینگل

ڈاکٹر مالک

شال : گوستگیں روچ ءَ پاکستانی ٹی وی چینلے ءَ بلوچستان نیشنل پارٹی ءُ نیشنل پارٹی ءِ سروکاں وتی اسلام آباد ءَ  بیوکیں آل پارٹیز کانفرنس ءَ نہ روگ ءِ سبب بیان کرتگ اَنت ۔ ڈاکٹرمالک ءَ گوشتگ کہ داں بلوچستان ءِ جیڑہ نہ گیش اِیت  ھچ رنگیں اے پی سی ءَ بھرزورگ سوت مند نہ بیت ءُ اخترجان مینگل ءَ گوشتگ کہ گوں بلوچانی سر سندوکیں ھاکماں ھچ رنگیں شرے ءِ اُوست بندگ گناہ کبیرہ اِنت ۔ بلوچستان نیشنل پارٹی ءِ کماش اختر جان ءَ گوشتگ پاک امریکا ءِ جیڑہ ءِ سر ءَ بیوکیں آل پارٹیز کانفرنس ءَ یک روچے پیش سیکرٹری اسٹبلشمنٹ ءَ لوٹکی داتگ ءُ پھلی لوٹ اِتگ کہ ما سرپد نہ بوتگ اِیں کہ شمارا لوٹکی نہ رستگ من چَہ آئی ءَ جست کرتگ کہ بلوچستان پاکستان ءِ بھر اِنت آئی ءَ دمان ءَ پسو داتگ کہ الم بلوچستان پاکستان ءِ بھر اِنت اے ھبر ءِ سر ءَ من گوشتگ کہ بلوچستان بِھ پاکستان ءِ بھر منگ نہ بوتگ اگاں اے زمین ٹَک پاکستان ءِ بھربوت اِنت گڑ ا اد ءَ پنچ رند ءَ لشکرکشی کنگ نہ بوتگ پرچا کہ مشرف وھد ءِ آمرانہ پالیسی دنیگت برجاہ اَنت ۔ گوستگیں ھشت ماہ ءِ تہ ءَ چَہ دوسد ءَ برز بلوچ ورناھانی تیر جتگیں میتانی بلوچاں ٹیکی دیگ بوتگ اگاں اے رنگیں جبراکی ءَ پد ھم بلوچستان پاکستان ءِ بھر منگ بیت گڑا کشمیر ھندوستان ءُ فلسطین ازرائیل ءِ بھر اِنت پرچا کہ آ اُود ءَ جبراکی بوگ ءَ اِنت ۔آئی ءَ گوشتگ کہ اے پی سی ءَ بھرنہ زورگ ءِ سبب لوٹکی نہ رسگ بِھ نہ بوتگ بلکیں ما گوں آھاں چون نشت کن اِیں ، گوں ھماھاں کہ مئے مردمانی کشگ ءَ ھوار اَنت ءُ آھانی دست گوں مئے مردمانی ھوناں ریٹو اَنت ، اے رنگیں مردم ءَ گوں نندگ ءِ گمان ھم نہ بیت ۔ یک جستے ءِ پسو ءَ آئی ءَ گوشتگ کہ سرکار ءَ وتی گوستگیں چار سال ءِ کارکردگی ءِ تہ ءَ ایوک کمیٹی جوڑ کرتگ ۔ پنچ سال پیلو کنت یا ناں اے درگت ءَ ھچ گوشگ نہ بیت بلے اے ھبر پدر اِنت کہ اد ءَ ھما سرکار وتی پنچ سال ءَ پیلو کنت کہ فوج ءِ پلہ مرزی یے گون بہ بیت ۔ بلوچستان ءَ ترس ءِ یک انچیں جاورے ودی کنگ بوتگ کہ سیاسی کارکنانی چَہ لوگ ءَ درکپگ ءُ سڑک ءِ سر ءَ آیگ ھم جنجالے جوڑ بوتگ ءُ مردم بیگواہ کنگ ءُ آھانی دیم شرتگیں میتانی دور دیگ ءِ درچ برجاہ اِنت آھانی کھول چَہ وتی دگہ چکانی ترس ءَ ایف آئی آر ھم نوشتہ کنائینت نہ کن اَنت ۔آئی ءَ گوشتگ کہ نہ اُمیت بوگ کفر اِنت بلے گوں انوگیں نام ءِ ھاکماں اُوست بندگ ءَ گناہ ء کبیرہ سرپد بئے آں ۔چَہ بلوچانی سر سندوکیں ھاکماں شرے ءِ ھچ گمان نیست کہ ایشاں بِھ بلوچانی ٹپانی درمان کنگ ءَ سنگینی ءَ نہ جیڑ اِتگ بلکیں مدام بلوچانی ٹپ کدینتگ اَنت ءُ تورینتگ اَنت اِش ۔ بنجاھی دری کارانی وزیر رحمن ملک ءَ مئے پارٹی  ءِ بنجاھی کارگشاد حبیب جالب ءِ کشنندھانی دادگس ءَ آرگ وتی جاہ ءَ انچیں بیانے داتگ کہ پہ مئے ٹپانی سر ءَ واد  پر ریچگ ناں بلکیں تیزاپ ریچگ ءَ ھساب اِنت ۔اے ھاکمانی سر ءَ چوں بھیسہ کنگ بیت کہ مھتریں کتاب قرآن مجید ءِ سوگند وارتگ ءُ مئے مردم اِش چَہ کوہ ءَ ایر گیپتگ ءُ پاھو داتگ اَنت ۔آھاں کہ قرآن ءِ ھیال نہ کرتگ پہ آھاں راھبندانی پروشگ ھچ مزنیں ھبرے نہ اِنت ۔آئی ءَ گوشتگ کہ یک کچے ءَ ھالرسانک ءُ سول سوسائٹی ءِ کردار پہ بلوچ جیڑہ ءِ چست کنگ ءَ ساڑایگ کرز اِیت بلے سیاسی گل ءُ سرکار ءَ سرپد بوگ ءَ ابید ھم سنگینی پیش نہ داشتگ ۔سروزیر ءَ شال ءِ ترءُ تاب کرتگ آ شال ءَ بلوچستان سرپد بیت بلے بلوچستان ءِ دگہ ھنکینانی ھچ سرکاری جھگیر ءَ داں مروچیگ ءَ تر ءُ تاب نہ کرتگ ناں چَہ مردماں جست کرتگ کہ آھانی دوست کیا کشتگ اَنت ۔ نیشنل پارٹی ءِ کماش ءُ پاکستانی سینیٹر ڈاکٹرمالک ءَ اے پی سی ءَ نہ روگ ءِ سبب اے گوشتگ کہ باز رند ءَ گوں ھاکماں گوشتگ کہ بلوچستان ءِ جیڑہ ءِ سر ءَ سنگینی پیش بہ دار اَنت ءُ مھکمیں گامگیج چست بہ کن اَنت بلے اے درگت ءَ کس ءَ سنگینی پیش نہ داشتگ ۔پیپلز پارٹی ءِ لیڈر شپ ءَ کمپرومائز کرتگ ءُ اَتکگ ءُ آئی ءَ اے شورکرتگ کہ پہ بلوچستان ءَ وتی سرکار ءَ ندر نہ کنت ۔بلوچستان ءَ اسٹبلشمنٹ ءُ پاکستانی ایجنسی بے مھار کنگ بوتگ اَنت ۔اسٹبلشمنٹ ءِ گپ نہ زوروکیں سیاسی کارکن بے دردی ءَ گوں کشگ بوگ ءَ اَنت ءُ ما باز رند ءَ گوشتگ کہ بلوچستان ءَ اسٹبلشنٹ ءُ ایجنسیانی ھاکمی اِنت کہ وتی ھاکمی ءَ گوں زور ءَ برجاہ دارگ لوٹ اَنت ۔ بلوچستان ءِ جیڑہ سکیں سنگینیں جیڑھے اے گوں سنگینی ءَ گیشینگ لوٹ اِیت زور ءُ آمرانہ پالیسی یلو کنگ لوٹ اَنت ءُ گوں گپ ءُ تران ءَ جیڑھانی گیشینگ ءِ راھے شوھاز کنگ لوٹ اِیت ۔ چَہ گپ ءُ تران ءَ ابید بلوچستان ءِ جیڑہ ءِ ھچ رنگیں گیشینگ ءِ راہ نیست ءُ داں وھدے کہ بلوچستان ءِ جیڑہ نہ گیش اِیت ھچ اے پی سی ءَ روگ ءَ سوت نیست ۔