شام ءَ شاھی لشکر ءُ زھرشانی کنوکیں مردمانی میان ءَ جنگ ءُ چوپاں بیست ءُ یک مردم بیران

 شام: شام ءِ شھر حمص  ءَ شاھی لشکر ءُ زھرشانی کنوکیں مردمانی میان ءَ جنگ ءُ چوپاں بیست ءُ یک مردم بیران بیتگ۔انسانی حقانی یک گلے ءِ ردا مُرتگیں مردماں پولیس کارندہ ءُ عام شھری ھواراں۔۔شام ءِ شھر الحمص شاہ بشارالاسد ءِ ھلاپ ءَ زھرشانی ءِ بُنجاہ جوڑ بیتگ۔ یو۔ این۔ او ءِ گُشگ ءِ ردا شام ءَ گوستگیں شش ماھانی نیام ءَ سئے ھزار مردم بیران بیتگ ءُ ٹپیانی کساس سک بازیں۔۔۔ھندی ھالانی ردا شھر حمص ءِ ھلک خالدیہ ءُ بابِ صبا ءَ ٹینک ءُ بکتر بند گاڑی اوشتارینگ بیتگ انت،،ھالانی ردا جنازھے سرا بشارالاسد لشکر ءَ تیرگواری کُتگ۔ چر ایشی آسرا دو کس بیران بیتگ انت۔۔زھرشانی کنوکاں یک سد ءُ چل ءُ ھشت دگ بلاک کُتگ اَنت ءُ ٹریفک مھتل داشتگ۔۔ بشارالاسد سرکار ءِ گوشگ انت کہ حمص شھر ناشرکاراں وتی بُنجل جور کُتگ ءُ شھریانی ءِ سرا اُرش کنگ ءَ انت۔انسانی حقانی باسک رامی عبدالرحمان ءِ گوشگ ءِ ردا آشوبی زھرشانی کنوکاں استان عندلیب ءِ ھند اعصام ءَ سرکاری گاڑیانی سرا اُرش کُتگ ءُ مانداشتگ انت،،چر ایشی ءَ بشارالاسد سرکاری لشکر ءِ یک آفیسرے ءُ دو کارندہ مُرتگ انت۔۔ بلے دنیگہ اے وئیل ءِ راستی منگ نہ بیتگ۔۔یک شنبہ ءِ روچ ءَ عرب لیگ ءَ بشاری سرکار ءُ ھلاپ کارانی سرا زور دیان ءَ گوشتگ کہ آ زوت ءَ چہ زوت سلاھی گپ ءُ تران ءَ بُنگیج بہ کن اَنت۔۔ماں مصر ءَ برجاہ داشتگیں عرب لیگ ءِ ادارکے مراگش ءَ شام ءِ باسکے وا مھتل دارگ نہ بیتگ، بلے سعودی عرب ءُ مزن ھور ءِ آ دگہ مُلکاں پہ ادارکی شام ءِ ھرابیں جاور ھالانی پژدر ءَ وتی سفیر چہ شام ءَ واپس لوٹائینتگ اَنت۔۔۔