میان رودرتک ءِ آشوبی بدلیاں چہ سعودی عرب باز دلتپرکہ اِنت

یمن ءَ سیاسی گپچل ءُ زھر شانیاں چہ گوں یمن سرکار ءِ گُم ءَ سعودی ءِ ھمگرنچی ءُ ھمدردی عجبیں نشوندھی ئے دیگ اِنت۔ یمن ءِ یک آشوبی  کارندھے ءِ گوشگ ءِ ردا  یمنی آشوبی ورناہ سعودی وتگڑیں بادشاہ ءَ گوں شکی ئیں چماں چار اَنت۔ یمنی ورناہ عادل عبدلاربائی ءِ گوشگ انت کہ گوں سعودی بادشاھت ءِ گُم ءَ ھچ وڑیں ھمگرنچی بیت نہ کنت چیاکہ سعودی عرب ءَ جمھوریت ءِ ھچ وڑیں چھرگ نہ جنت۔ اے ھم راست انت کہ علی عبداللہ صالح گوں سعودی بادشاہ ءِ کمک ءُ مدت ءَ یمنی اُلس ءِ سرا چَٹی انت۔ ھالکاری  گوشگ ءِ ردا یمن ءِ جاور ھال روچ پہ روچ بدتر بیئگ ءَ اَنت۔ایشی ءِ سوب اے ھم بیت کنت کہ عبداللہ صالح ءَ انگت ھم یقین انت کہ بلکیں سعودی بادشاھت ءِ کمک مدامی برجاہ مانیت، او سعودی مزن ھور ءِ مستریں قوت ایں۔ گوستگیں  شش ماھاں سعودی ءِ لوٹ ھمے بیتگ کہ یمن ءَ اُلسی جنز دارگ بہ بنت۔ سعودی ءَ مصر ءُ تیونس ءِ بادشاھانی ھم حمایت کُتگ۔ بلے آ وتی آسرا سر بیتاں او تھت چر آھاں پچ گرگ بوت، بحرین آشوبی جُنز ءِ گِر ءُ دار ءِ ھاترا ھم سعودی ءَ وتی ٹوپ ءُ ٹینک دیم داتگ انت۔ بلے یمن ءِ کَسہ دگہ وڑیں ۔گلف آپریشن کونسل ءَ نوکیں توجیلی  پیش کُتگ کہ علی صالح اُگدہ ءَ دزکش بہ بیت او واک ءُ اختیار ءَ پُر امنیں وڑی ءَ آشوبیانی دست ءَ بدنت۔۔ زانتکارانی گوشگ انت کہ اگاں سعودی عرب صالح ءِ چہ اُگدہ ءَ دزکش بیئگ ءَ وش بیت ایں تا گُڑا آئی ءَ اے مرد سعودی نادراہ جاہ ءَ ترھگ ءَ پد ھمودا داشتگ اَت۔ امریکی سیاسی زانتکار ئے ءِ گوشگ انت کہ بیت کنت کہ پیسرا یمن ءِ وڑیں نزوریں ھمساھگیں ملکے ءِ موجودگی پہ سعودی عرب ءَ جوان بیتگ بلے نو اے وڑ نہ انت۔ پیش ءَ سعودی ءَ یمن یک مُھکمیں مُلکی ءِ جاہ ءَ دیست نہ کُتگ ءُ نو آ  ماں یمن ءِ ھرابیں جاورانی پشدر ءَ اودا دھشت گردی ءِ گیش بوئگ ءَ تُرس ءِ آماچیں۔ سعودی ءَ ایوک ءَ اے غم  نہ اِنت کہ القاعدہ یمن ءِ ھرابیں جاورانی پشدر ءَ نپ چست کنت، بلکیں  ایران ھم عرب دُنیا ءَ وتی بالادستی ءَ آرگ لوٹیت۔ یمن ءَ ”حوت” ءُ دگہ بازیں شیعہ گلانی گُما ایران ءِ رابطہ ھم اَستاں۔  امریکی زانتکار اسٹیبئنسر ءِ گوشگ اِنت کہ اگاں یمن ءَ ایرانی سرکار ءِ دزمانجی ءِ خطرہ بہ بیت تا گُڑا  سعودی عرب ءُ آدگہ سُنی عرب ھم سعودی ءِ کمک ءَ ماں یمن ءَ وتی فوج ءَ دیم دینت۔۔بیت کنت کہ آیوکیں دیموکریٹک یمن پہ سعودی ءَ گچینی ءُ دلپسندیں  ملکی مہ بیت ۔۔ بلے ایشی  دومی دروشم  پہ سعودی ءَ  گیشتر تُرسناک  بیت۔۔۔