من ءَ دنیا گُشيت دیوانگ

گوشنت کہ جنگ  ءِ تھا اولی  مرگ راستی  ءِ بیت۔ دروگ ءِ پُتینکانی  تھا راستی ءِ چیر دیگ ءِ جُھد الم  بیت۔ بلے ٹکی ءُ چاگردی تضاد ءُ چاگردی زانت ءِ درچ ءَ بچارے تا راستی  چیر  بیت  نہ  کنت۔ بلوچ وتگڑیں   پاکستان ءِ ایردستیں راجانی  تھا درساں  چہ گیش زُلم زدگیں راجیں ۔ کہ ادا زلم ءُ زوراکی ، ناانصافی  وتی آخری  سیمسراں سر بیتگ۔ سیاسی  باسکاں  چیریں ایجنسی آوار جن اَنت ۔ آھانی وارث  زھرشانی کن اَنت بلے آھانی گپ گوشدارگ  نہ بنت۔ زبانان زوراکی ءِ کُبل جنگ بیتگ۔ ریاست ءَ راجی جُنز ءِ ایرجیگ کنگ ءَ ھر وڑیں رھبند کارمرز کُتگ۔ کُلیں مزنیں شھراں پیراملٹری ءِ سپاھی اوشتارینگ بیتگاں ، شھر  فوجی بُنجلاں  گوں بدل کنگ  بیتگ اَنت، ھر دگ ءُ چاھراہ ءِ سرا بزگیں مھلوک پٹگ بنت ءُ آھانی شرپ لگتمال کنگ بیت۔ وھدیکہ دومی  نیمگ ءَ ایشانی دیمگیری ھاترا مزاحمت بیت تا اے تچنت ءُ وتی  ھونڈانی  تھا ٹپ انت۔ ریاستی زوراکی، فوجی آپریشن ءُ آوار جنی ءِ سرجمیں توجیلاں  بے سوب  بیئگ ءَ پد نو ریاست ءَ راجی مزاحمتی جنز ءَ را وت ماں وتی جنگ ءُ بجنگانی  نیمگ ءَ ترینگ ءِ نوکیں توجیلی  بندات کُتگ۔ اے  چوشکہ سیاستی کارندھانی  کوشگ ءُ پدا آھانی  راجی  سلاہ بندیں گلانی  نام ءَ دیگ ءِ بے سوبیں جُھد،،، مولا بخش دشتی ءَ بگر تاں سلام ایڈوکیٹ ءَ اے دُراہ آئی۔ ایس۔ آئی ءِ بلوچ راجی جُنز ءِ ھلاپ ءَ بد گُمانی  پیدا کنگ ءِ توجیلاں کہ مئے بازیں دوست  ھم پہ اے توجیلانی  سرپد بیئگ ءَ نزانتکاراں  ، بلکیں آ پہ لاشعوری اے رد انقلابی  کرد ءِ پیلھی ءَ گوں ھوار کپتگاں۔ اگاں پہ راستی ما بچاریں تا بلوچ راجی جُنز ءِ بُنکی راھبند  سوشلزم لیکہ ئے بُنیاد ءَ ایر کنگ  بیتگ۔ بلوچ چاگرد ءِ تھا ھم اے سگ ءُ اوپار  استیں کہ آ سیاسی اختلافانی بُنیاد ءَ اے  ھدا سر نہ بیت کہ سیاسی اختلافانی بُنیاد ءَ دومی ءَ بہ  جنت ءُ  بہ کُشیت۔ سلام بلوچ ءِ  گما آئی ءِ کسانکیں جنک ھم شھید بیت، پدا  آئی۔ ایس۔ آئی ءِ ایجنٹ چہ کوئٹہ چاؤنی ءَ فون جن اَنت ءُ اے کوش ءَ دودا بلوچ ءِ نام ءَ زیراَنت۔ پدا بلوچی چینلے ابئید ءِ پٹ ءُ پول ءَ ھمے نیوز ءَ شنگ کنت۔ او دشتی  جنگ بیت یک  نوکیں گلے ءِ  نام ءَ زیرگ بیت ۔بی۔ایل۔ ایف اول سرا اے کوش ءَ ایر جنت ، بلے پدا اے کوش یک انچیں دروشمے ءَ پہ ٹگی راجی جُنز ءِ سرا مشگ بیت ءُ پدا بلوچ سیاسی  قیادت ءِ نادانی ءُ نہ زانتکارے ءَ  یک انچیں درچے دیگ بیت کہ  بلوچ  راج ءِ تھا الم تاں مرچی ھم اے بد گمانی استیں دشتی بہ بیت یا نسیم یا آدگہ اے سرمچاراں کُشتگاں ۔وھدیکہ سرمچار ھر کارے بہ کناں آ ذمہ ءَ وتی سرا زوراں۔ نوں بلوچ راج ءَ پہ جوانی یک گپے سرا چار ءُ تپاس کنگی انت کہ آیا  اے کرداں کئے کنگیں او  ھمے  سیمے دست کئیگ انت کہ اے  سرجمیں  کردانی منطقی درچاں راجی جُنز ءِ نیمگ ء ترینگ ءِ جُھد ءَ کنگ انت۔ بلوچ میڈیا ءِ  غیر ذمہ داری تاں چنچو اے بد گُمانی ءِ ودی کنگ ءَ ھواریں ،  بلوچ ندکار چیا راستیں گپ ءِ درنگازی ءَ نہ کناں،
            ..............................................................
                 ”من وتی گومازاں گُریزاناں”
ردیں کار ھر وڑا رد گُشگ بیت۔ تُری ھر کسے بہ کنت۔ کسانیں مردمے ردی ءَ  زاھر  کنگ  ءُ  ٹوھیں  مردمانی ردیاں چیر دیگ راجانی  بدبھتی ءِ  مستریں  نشانی  اِنت۔ راستی  ءِ  چیر دیگ  ءُ  وتی  شر ءُ ھرابیں  کردانی  پلہ  مرزی ھم  راجاں  سیاسی ءُ چاگردی  تکاں  تاوان بار  کنت ، وتی  ھر  فیصلہ  ءِ  سرا چار ءُ  تپاس  نہ کنگ ءُ وتی ھر گپے سرا  اوشتگ ءُ دگرانی  گپانی  گوش  نہ  دارگ  ھم پہ  راجانی  سیاسی  زند  ءَ  جوانیں  ھبرے  نہ اِنت۔ ھالتاک  ءَ  بانکیں  گھار خواتین پینل ءِ رھشون  بانک  مھر جان ءِ ھالترانے  شنگ بیتگ اَت کہ ” دژمن گوں  وتی  ھندی  دلاراں  ھوار بلوچ  سیاسی  چاگرد ءِ  تھا  بد  گُمانے  پیدا  کنگ  ءِ  جُھدا  اِنت”  اے  گپ  سد در سد  راستیں  گپے، بلے  دژمن  ءَ  ھمے  بد گُمانے پیدا کنگ ءِ  موہ کیا  داتگ ؟  اے  ذمہ ءَ  کس  وتی  سرا  زُرت  نہ کنت۔ ھما  کرد  کہ قوم  پروشی یے درچ  ءَ  کاینت  کیا پہ نزانتکاری  ءُ  لاشعوری کُتگ انت؟  یک  انچیں  وھدی ءَ  کہ  دُژمن  چو  مستیں فیل ءَ بلوچستان ءِ  ھلک ءُ  میتگاں  لگتمال  کنان ءُ آس  دیانیں ، اے  وھد ءَ بی۔ این۔ ایم ءِ دو بھراں کنگ ءِ راہ  کیا  ھموار  کُتگ ؟ مولا بخش  ءُ حبیب  جالب ءِ  کوش ءَ پد کنفیوژن پیدا  کنگ  ءِ  راہ  کیا  گیشینتگ ؟ راجی  جُنز ءِ ڈائرکشن ءَ  چہ بدیں دُژمن ءِ  نیمگ ءَ پد گردینگ ءُ  لھتے نیم  زِندیں پارٹی آنی ھلاپ ءَ  بس  بیان  بازی ءِ حدا محدود کنگ  ءِ  توجیل  کیا  کُتگ ؟  بی۔ آر۔ پی ءَ چہ بی۔ این۔ ایف ءَ در کنگ  ءُ دُژمن ءَ بد گُمانی  پیدا کنگ ءِ موہ  کیا  داتگ؟ اے بد گُمانی پیدا کنگ ءِ سرجمیں راہ ءُ رھبند منی ءُ تئی  او مئے ٹوھیں رھشونانی دست ءَ گیشینگ  بیتگاں، دُژمن  وا  الم موہ چست  کنت۔ بلے  راستی سک  تھل ایں۔ ردیانی  منگ  ھم  بلاھیں  دلے  لوٹیت۔ھر  کسے  وس  ءُ  واک  ءَ  ڈن انت۔ شھید غلام محمد ءِ جیل ءَ در آیگ ءَ  رند من ءُ تو او ھمے راج ءَ آئی ءِ کردار ءِ سرا بد گُمانی  پیدا کنگ ءِ جُھد کُتگ۔ یک ٹوھیں لیڈرے ءِ ردا کیا آئی ءِ مقابلہ ءَ اوشتگ ءِ سوڈگ  کُتگ۔ دانکہ زانتکار گُشنت کہ راجی رھشونے ءِ کرد ءُ قابلیت بس لھتے مردمانی تھا پیدا بنت۔  بلے مارا لیڈرے ءِ شوق ءَ انچو کور کُتگ کہ ما وتگڑیں جمہوریت ءِ نام ءَ وتی پادان وت تپر جتگ۔ ( اول منی جند بہ بیت) دُژمن ءَ گیش چہ  مئے  وتی  پیدا کُتگیں  بدگُمانیاں  نپ  چست کُت  سئے  ٹوھیں  لیڈر  چہ  ما پُلیت۔ اے  کرد منی  ءُ تئی  دست  ءَ  سرزد  بیتگاں۔ پدا  دُژمن  وا دُژمن ایں آ کُجام  وڑی ءَ مئے  سیاسی  جنز ءَ  را نزور کنگ لوٹیت۔ نو  آسر ھمدا سر بیتگ کہ دُژمن  کُجام  وڑی ءَ پہ مئے  نزور  کنگ ءَ بلوچ  سیاسی  چاگرد ءِ  تھا بد  گُمانے  پیدا کنگ ءِ  جُھد ءَ اِنت ، او ما وتی ردیانی سرا  چار ءُ تپاس کنگ ءُ آھانی منگ ءُ کشگ ءُ چگل  دیگ ءَ   ابئید وتی  کُتگیں  ردیانی سرا  نشتگ ءُ آھانی  جنازہ ءَ وانگا انت۔
.................................................................
           قلم کاراں وتی زانت ءُ ھیال یے
           بھا  پہ   دانگے   بادام    بستگ
ند(قلم) دُنیا ءِ گرانبھائیں سوغاتے،  کہ انسان ءَ چہ پاکیں اللہ ءِ نیمگ ءَ رستگ۔ دُنیا ءِ کُلیں چیزاں پیش قلم جوڑ کنگ بیتگ۔ ند ءِ گُما دغا کنگ یا ایشی ءَ رد کارمرزگ ، قلم ءَ وتی  ذاتی نپ یا نام کشگ ءِ واستہ کارمرز کنگ ءَ انسان دنیا ءِ تھا ھم نشان بیت او آخرت ءَ خدا ھم آ کس ءَ معاف نہ  کنت کہ آئی ءَ قلم رد کارمرز کُتگ۔ رسول اللہ صلعم ءَ قلم ءِ گُما دغا کنوکانی سرا لعنت کُتگ۔ پمیشا ھرکسے اے فرض انت  کہ آ شر ءَ شر ءُ ھراب ءَ را ھراب بو گُشیت۔ دومی  قلم دُنیا ءِ مستریں طاقت ایں۔ ھمے قلم ءَ دُنیا ءِ ٹوھیں ٹوھیں بادشاھانی تھت چپی کُتگ اَنت۔ قلم زُلم ءِ ھلاپ ءَ آواز چست کنگ ءِ مستریں وسیلت ایں۔ قلم اگاں پہ مُخلصی ءُ راستی کارمرزگ بہ بیت تا گُڑا قلم ءِ طاقت دُنیا ءِ کُلیں طاقتاں چہ گیش انت۔ قلم ءِ گزب ءَ چہ دُنیا ءِ ھچ زالم ءُ زوراک رک اِت نہ کنت۔ ھمے قلم وھدے کہ کارل مارکس ءُ لینن ءِ دست ءَ پہ ایمانداری کارمرز بیت تا دُنیا ءِ مستریں سوشلسٹ آشوب ءَ آؤرت کنت۔ ھمے قلم اِنت کہ جوزمارتی ءِ دست ءَ کیوبن  سلاہ بندیں آشوب ءِ فکری بُن ھشت ءَ ایر کنت۔ بنگلا دیش  ءِ آجوئی  جُنز بہ بیت یا فرانسیسی سوشلسٹ آشوب  ٹیگور ءُ جان فال سارتر ءِ فکرانی پیداواراں۔ پدا قلم کار راجانی ھما حساس ءُ ماروکیں مردم بنت کہ آ وتی قلم ءِ وسیلہ ءَراجاں ءَ چہ کوھنیں ءُ روایتی تنداں  بوجنت ءُ او راج ءَ یک مھکمیں قومی رھبندی ءِ درچ ءَ کارنت ءُ قوم ءَ یکجاہ ءُ تپاکی ءِ درس ءَ دینت ءُ بزاں قوم ءَ را وتگڑیں ٹَکی ءُ قبائلی رھبنداں چہ بوجگ ءُ آئی ءَ یک منظمیں قومیتے ءِ درچ ءَ آرگ ءِ ذمہ داری پہ راجی ندکار ءِ سرا فرض انت۔ ندکار دُژمن ءِ چالاں چہ قوم ءَ سرپد کنگ ءَ ابئید بلکیں راج ءِ رھشون ءِ ردیاں ھم ڈسیت۔ او گوں وتی منطق ءُ دلیلاں راہ ءَ ردیں رھشون ءِ قومی درچ ءَ آرگ ءِ جُھد ءَ کنت۔۔ آ ردی ءَ رد گوشیت ءُ شری ءِ پلہ مرزی ءَ کنت۔ بلے مئے ندکاراں  پہ وت دگہ وڑیں رھبندی جوڑ کُتگ۔ آ  وتی  دلپسندیں رھشون ءِ شر ءُ ھراب ءِ پلہ مرزی ءَ کنت۔ آ وتی ذاتی کست ءُ کینگ ءَ یک انچیں سیاسی  رنگے ءَ دیم ءَ کاریت ءُ وتی ناپسندیں مردم ءِ سرا ھمنچُک وتگڑ ءُ بے بُنیں بُھتام بندیت کہ کسانیں کسانیں اختلافاں یک انچیں کست ءُ کینگے رنگے دات  کہ آ دومی  ناپسندیں  مردم ءَ قومی لڑا آیگ ءَ ابئید بلکیں گیشتر  دُژمن ءِ سرپاں رؤگ ءُ ھوار بیئگ ءِ  سکین رسیت۔ راجی قلم کار ءِ اے کرد قوم پروشی ءِ لاشعوری قِسمیں۔ بلے مجال نہ انت  کہ یک مردمے ھمے واجہ ءِ اے کردا ایر بجنت ءُ بو گُشیت کہ واجہ  چو نہ انت کہ تو کنگ ءَ ئے ۔ قلم ءَ پہ ذاتی نپانی ھاترا یا نام کارمرزگ انسان ءِ مستریں بد بھتی ایں۔ گُڑا بزاں آ مرد خُدا ءَ نواھیت،  چیا کہ  ھمے درباری ایں  قلم کار ءَ پہ وت  دگہ سلاھے ھم ایر کُتگ ۔بِزاں وتی  اختلاف داروکانی ھاترا غداری یے سرٹیفیکیٹ ۔  اے وا انسان ءِ تبے کہ آئی ءِ گورا پسہ یے دیگ ءَ ھچ دلیل ءُ منطق  مہ بیت گُڑا آ چو مُلا ءِ وڑا نندیت ءُ فتوٰی دات۔ او اگاں راستیں گپ ءَ کسے بو گُشے گُڑا دنیگہ اے راج ءِ تھا راجی ندکار پیدا نہ بیتگ۔ او اگاں استیں گُڑا آ لنککانی سرا ھساب بنت۔ او آھانی گپانی گوشداروک نیست۔ نو ھمے  وت گلا ءُ وت ستاھیں ندکارانی ردیاں چہ دُژمن ءَ بلوچ چاگرد ءِ تھا بد گُمانے پیدا کنگ ءِ موہ  رستگ۔  نو اے کُلیں  مُخلص ءُ ایمانداریں ندکارانی فرض  جوڑ بیت کہ آ اے  بدیں نادُراھی ءِ گَرو دار ءِ  ھاترا پہ بے ریائی دیم ءَ بیاینت ۔ آ  دژمن ءِ بدیں کردانی پاشک کنگ ءَ دیم ءَ بیا اَنت۔ آ اے  ھم بہ ڈس انت کہ دُژمن گیشتر راجی زند ءِ کُجام تکانی تھا بد گمانے پیدا  کنگ ءِ جُھدءَ  کنت۔ او  دوست  دروشمیں  دُژمنانی  شکل  چون  بیت۔  او اے  گپ ءَ ھم مہ چاراں کہ آھانی وانوک یا گوشداروک  کم اَنت۔  چیا کہ  راستی ھما زھر ءُ کُچلیں کہ آئی ءِ ایر برگ سک گرانیں بلے نادُراھیانی برگ ءَ یک ءُ ٹک اِنت۔ دروگ سر زاھرءَ سک  شیرکن ءُ  ڈولداریں  بلے راج ءَ چو رمیز ءِ وڑا تھا وران ءُ پروشان کنت ( روان اِنت)

  

 (او  ”من ءَ دُنیا گوشیت دیوانگ” ءِ سرھال ءَ شنگ بیوکیں سرجمیں گپ منی ذاتی لیکہ انت۔ او بلاگ ایڈمین ءِ تپاکی المی نہ اِنت۔ او بیت کنت  آ اے سرھال ءِ آسر بیئگ ءَ پیسر منی جند ءَ چہ بلاگ ءَ بینڈ بہ کنت۔۔چیاکہ منی پرشتگیں بلوچی ءُ اُردو نبشتانک روزنامہ آساپ ءَ ابیئد بلوچستان ءِ دگہ ھچ اخبار ءَ چاپ نہ کُتگ اَنت۔)