لشکری ءَ یک ارب ءِ نزیک ءَ زر پہ کجام کار ءِ مز ءَ سرکار ءَ داتگ ' صادق عمرانی

شال: گوش اَنت کہ دزءِ مات داں کدی پیگ پچ اِیت اے بتل ءَ مراد اِیش اِنت کہ پاکستان پیپلزپارٹی بلوچستان ءِ کماش ءُ پاکستان چیردستیں بلوچستان سرکار ءَ اُستان وزیر صادق عمرانی ءَ لشکری ءِ چَہ سرکار ءَ زر زورگ  ءُ وتی کیسگ ءَ جنگ ءِ راز پاشک کرتگ ۔ آئی ءَ وتی بیان ءِ تہ ءَ گوشتگ کہ اے ھبرپیتبند اِنت کہ گوستگیں روچ ءَ چَہ منی نیمگ ءَ بیوکیں پریس کانفرنس ءِ تہ ءَ چیف آف ساراوان محمداسلم رئیسانی ءِ ھچ رنگیں نام گرگ نہ بوتگ بیھار دیگ وَ دور ءِ ھبر اِنت ۔ اے ھبر چوش روچ ءِ رژناھی ءَ سھرا اِنت ءُ اے راستی ما پدر کرتگ کہ بلوچستان سرکار ءِ تھی کارانی ءُ تمنی کارانی چار گزار ءَ شانزدہ اگست ءَ یک پرمانے داتگ ، پرمان تاک ءِ نمبر 3076اِنت ۔ ڈپٹی کمشنر کچھی ءَ ھشتاد ءُ یک کروڑ ھپتاد لکھ سی ءُ نو ھزار روپیہ دیگ بوتگ کہ اے زراں نواب زادہ لشکری رئیسانی ء نواب غوث بخش رئیسانی ءَ دیگ بہ بنت۔ اے زر نیشنل بینک ڈھاڈر ءَ گوں چیکے ءَ دیگ بوتگ اَنت رند ءَ ھمے زر الفلاح بینک کوئٹہ برانچ ءَ ایر کنگ بوتگ اَنت ۔آئی ءَ گوشتگ کہ اے بھتام جنگ نہ اِنت بلکیں راست ءُ چیر نہ بیوکیں ھبرے کہ مھلوک ءِ دیم ءَ آرگ بہ بیت۔ اینکس باز زر نوابزادہ لشکری ءَ پرچا دیگ بوتگءُ اے پہ کجام کار ءِ مزءَ دیگ بوتگ اَنت  ۔ صادق عمرانی ءَ گوشتگ کہ اے گپ ءَ باید سراوان ہائوس وت بہ گیشین اِیت پرچا کہ جارکش راستیاں سرپد نہ بیت یک ارب ءِ نزیک ءَ زر ءِ جیڑہ گوں بیھار ءَ چیر دیگ نہ بیت اے درگت ءَ نام گیپتگیں مردم راستے ءَ مھلوک ءِ دیم ءَ بیار اَنت کہ اے راستی ءِ جیڑہ گوں جارکش ءَ چیر نہ بیت ۔ چَہ صادق عمرانی ءِ اے ھبراں بازیں بلوچ راجدوست تکانی نیمگ ءَ بوتگیں اے ھبر ءِ راست بوگ ءِ گمان بیت کہ رئیسانی ٹک ءَ گوں سیادی داروکیں لھتیں مردم تحریک نفاذ امن ءُ ھمے رنگیں دگہ ناماں بلوچ سیاسی جھدکارانی نشانگ کنگ ءُ کشگ ءِ کاران گون اَنت ءُ اے زر پہ ھمامردمانی دارگ ءُ چارینگ ءَ دیگ بوتگ اَنت ۔