شھید سلام ایڈوکیٹ ءِ کوش ءِ ایرجنگ ءَ مستونگ ءَ دربندی نوشکے ءَ مھلوک ءَ زھرشانی کرتگ

مستونگ +نوشکے : بلوچستان نیشنل پارٹی ءِ سروک عبدالسلام ایڈوکیٹ ءُ آئی ءِ کسانیں جنک ءِ کوش ءِ ھلاپ ءَ مستونگ ءَ دربندی ءُ نوشکے ءَ زھرشانی کنگ بوتگ ۔ بلوچستان نیشنل پارٹی ءِ جارکش ءِ رِد ءَ خضدار ءَ پارٹی سروک عبدالسلام ایڈوکیٹ ءُ آئی ءِ جنک ءِ کوش ءِ ایرجنگ ءَ یک شمبے ءِ روچ ءَمستونگ ءُ آئی ءِ کوچگی دمگاں دربندی بوتگ ۔ ھمے درگت ءَ پارٹی ءِ بنجاھی راھشون عبدالروف مینگل ، امان اللہ زھری ، نصیر احمد موسیانی ءَ وتی یکجاھیں بیان ءَ گوشتگ کہ پارٹی سروک عبدالسلام ءُ آئی ءِ جنکو ءِ کوش بلوچ دژمن پالیسیانی درچ اِنت ۔ خضدار ءَ اے رنگیں کارانی ذمہ واری راھبند پرینوکیں ادارھانی سر ءَ اِنت کہ آھاں بلوچ دژمن واک بے مھار کرتگ اَنت ۔ ھنکین بندبست اے رنگیں کارانی ذمہ وار اِںت مروچی ھم پارٹی کارکن شھید  کنگ بوگ ءَ اَنت ۔کسانیں جنکو ءِ کشگ بلوچ دود ءِ سرگوز کنگ اِنت اے ھمینچک ایرجنگ بہ بیت کم اِنت ۔ باید انسانی حقانی گل ءُ دازرسی کنوک گامگیج  بہ زور اَنت ءُ بلوچستان ءَ برجاھیں جبر ءِ سر ءَ دلگوش بہ دئے اَنت ۔ بیان ءِ تہ ءَ گوشگ بوتگ کہ بی این پی راج زرمبش ءِ نام اِنت کہ گوں زور ءَ ھلاس کنگ نہ بیت ءُ بیوکیں پندل سوبمند نہ بنت وتکواکی ءِ حق ءِ جھد ءَ بلوچ داں وتی ھون ءِ گڈی ترمپ ءَ برجاہ دار اِیت ۔