نئی دھلی ' گوستگیں تراک ما کرتگ آیوکیں سئے شنبے ءَ شاپنگ مالے ءِ دیم ءَ بم تراکین اِیں ' چھوٹو ءِ بیھار

نئی دھلی [ ھالچار ] ھندوستان ءَ نئی دھلی ءِ ھائی کورٹ ءَ ڈن بوتگیں تراکانی ذمہ واری انڈیں مجاھد [آئی ایم ] نامیں گلے ءَ ھم وتی سر ءَ زرتگ ءُ دگہ تراکانی بیھار داتگ ۔ درملکی ھال رسانکدرءِ رد ءَ ھندوستانی سیکورٹی ایجنسیاں چَہ چھوٹو نامیں مردمے ءِ نیمگ ءَ یک ای میلے رستگ کہ آئی ءَ اے بم تراک وتی سر ءَ من اِتگ اَنت ءُ بیھار داتگ کہ دومی تراک دیم ءِ سئے شنبے ءَ یک شاپنگ مالے ءَ ڈن کنگ بیت ۔ چھوٹو ءَ چَہ حرکت الجھاد الاسلامی ءِ نیمگ ءَ تراک ءِ وتی سر ءَ زورگ رد کرتگ ۔زانگ بہ بیت کہ اے تراک پیش ءَ حرکت الجھاد الاسلامی ءَ وتی سر ءَ زرتگ اَت ءُ اے درگت ءَ چَہ جموں کشمیر ءَ یک کیفے ءِ واھند ھم دزگیر اِنت کہ چَہ آئی ءِ کیفے ءِ کمپیوٹراں اے کلودیم دیگ بوتگ ۔