کلات : نام ءِ گل بلوچ دود ءُ ربیدگاں لگتمال کنگ ءَ اِنت ' دشت گوران مئے ھند اِنت ' کمبر مینگل

کلات : پہ نام ءِ ءُ شکی ئیں گل ءِ نام ءَ بلوچ دود ءُ ربیدگانی لگتمال کنگ ءِ جھد بوگ ءَ اِنت نہ ما دھشت گرد اِنت ءُ نہ دھشت گردانی مارا پلہ مرزی گون اِنت ۔ مینگل ٹک وتی دژمن ءءُ آھانی ناپاکیں پندل ءُ بزدلیں مردانی دیم ءَ میلانگ بوگ ءَ ھروھد ءَ ساڑی اِنت ۔ دشت گوران ءِ بابت ءَ نام ءِ گل ءِ بیان ءَ گوں ترندی ءَ ایرجن اِیں ۔ اے ھبر لونگ خان شھید ءِ بچ کمبر خان مینگل ، پسند خان مینگل ءُ بالاچ مینگل ءَ یکجاھیں پریس کانفرنس ءِ تہ ءَ کرتگ اَنت ۔ کمبر ءَ گوشتگ کہ نام ءِ شکی ئیں گل ءِ جارکش ءَ ھالتاکاں بیان داتگ کہ دشت گوران ءَ دھشت گرد چیر اَنت ما ایشی ءَ ایر جن اِیں ءُ گیشین اِیں کہ دشت گوران مئے ھند اِنت ءُ گوستگیں چندیں سال اِنت ٹکی گر ءُ چل برجاہ اِنت کہ ایشانی تہ ءَ بازیں گرانھریں زند زوال بوتگ بلے اے جنگ ءُ میڑ مئے وتی ٹکی ءُ ذاتی اَنت اگاں ایشانی تہ ءَ یک گل ءُ گروپے ءَ  دور کنگ ءِ واھگ ھست گڑا پیلو ئِے بہ کنت ۔ آئی ءَ گوشتگ کہ مروچی بلوچستان ءَ نام ءِ گلانی چَہ ربیدگاں دریں کارپدانی سبب ءَ بلوچ دود سر گوز کنگ بوگ ءَ اَنت ھما مردم مئے سر ءَ جنگ مشگ لوٹ اَنت آ دشت گوران  ءِ دپتر ءَ سیل بہ کن اَنت نہ ما چَہ جنگ ءَ ترسوک اِنت ءُ نہ کہ یک راج ، ٹک یا گلے ءَ وتی ٹکی جیڑھانی تہ ءَ دزمانجنی کنگ ءَ کِل اِیں ۔ زانگ لوٹ اِیت زیک چارشمبے ءِ ھالتاکاں پاکستانی ایجنسیاں تحریک نفاذ امن نامیں گلے ءِ نیمگ ءَ بیانے داتگ ءُ دشت گوران ءَ دھشت گردانی چیر بوگ ءِ نام گیپتگ ، پاکستانی ایجنسیانی اے گل بلوچ سرمچاراں دھشت گرد ءِ نام ءَ بند اِیت ۔