بلوچستان یونیورسٹی یک تباھیں ادارھے جوڑ بوتگ ' بلوچ اسٹوڈنٹس ایکشن کمیٹی

شال : بلوچ اسٹوڈنٹس ایکشن کمیٹی ءَ بلوچستان ءِ مالی جنجالانی سر ءَ بے تاھیری درشانتگ ءُ گوشتگ کہ اے جاورانی سبب ءَ یونیورسٹی ءِ بندش ءُ استاد ءُ کارمنداں دزمزدیگ ھم جنجالے بوت کنت ۔ اد ءَ شنگ بوتگیں یک بیانے ءِ تہ ءَ جارکش ءَ گوشتگ کہ مروچی یونیورسٹی ھما جنجالانی دیمپان اِنت آ گوستگیں پالیسیانی آسر اَنت ءُ ایشی ءِ تچکیں ذمہ واری ھما گروپس ءُ مافیا ءِ سر ءَ اِنت کہ چَہ سالاں سال یونیورسٹی اِش دستیگ کرتگ ءُ نشتگ اَنت ۔ اے گروپساں پہ وتی ذاتی ءُ ٹکی لباں  بلیک میلنگ ءَ ابید دگہ ھچ نہ کرتگ ۔ اے ھبر وائس چانسلر ءَ وتی پریس کانفرنس ءِ تہ ءَ پدر کرتگ اَنت ۔ یونیورسٹی ءِ دپتر ھمیش اِنت کہ ھر وھدے یک شریں وائس چانلسرے ءَ یونیورسٹی ءِ جیڑھانی گیشوار ءِ جھد کرتگ گڑا زانشت دژمنیں ٹکاں نہ ایوک اے جھد سوبین بوگ ءَ نہ اِشتگ بلکیں آئی ءِ سر ءَ دروگ ءُ راستیں گپ اڈ کرتگ ءُ پندل کرتگ ، آ انگیر کنگ بوتگ۔ ھمے سبب اِنت کہ یونیورسٹی ءِ کارانی دیم ءَ برگ یک وانندہ ءُ سنگینیں مردمے ءِ وس ءَ ڈن بوتگ ۔ بژن ءِ ھبر اِنت کہ استادانی نام ءَ ھم یک بلیک میل گروپے بلیک میلنگ ءِ سیاست ءَ ھوار اِنت ۔ اے وانگ ءُ پولکاری ءِ بدل ءَ وتی توامیں ھاٹیگاں ایوک اے ھبر ءِ سر ءَ ھرچ کنگ ءَ اَنت کہ یونیورستی ءِ بندبست کاراں بلیک میل بہ کن اَنت ۔ پہ ایشی ءَ وڑوڑیں پندل کنگ بوگ ءَ اِنت ۔ شریفیں مردمانی بدنام کنگ ءَ وتگڑیں ھبر جوڑ کنگ بوگ ءَ اِنت پمیشکا بلوچستان یونیورسٹی یک جوانیں ادارھے جاہ ءَ یک تباھیں ادارھے جوڑ بوتگ ۔